ឥណ្ឌា និងប៉ាគីស្ថានសន្យាកាត់បន្ថយអំពើហិង្សានៅតំបន់កាស្មៀ
លោកនាយករដ្ឋមន្រ្តីឥណ្ឌា និងប៉ាគីស្ថានបានសន្យារួមគ្នាក្នុងការកាត់បន្ថយអំពើហិង្សានៅក្នុងតំបន់កាស្មៀ។ កិច្ចសន្យានេះបានធ្វើឡើងនៅក្នុងជំនួបទ្វេភាគីរវាងប្រមុខរដ្ឋាភិបាលនៃប្រទេសបងប្អូនបង្កើតគូសត្រូវទំាងពីរក្នុងទីក្រុងញូយ៉កកាលពីថ្ងៃអាទិត្យ ទី២៩ កញ្ញា។ សូមជម្រាបជូនថា ឥណ្ឌា និងប៉ាគីស្ថានដែលជាប្រទេសមហាអំណាចនុយក្លេអ៊ែរដូចគ្នានៅអាស៊ី បានឈ្លោះគ្នាដណ្តើមតំបន់កាស្មៀតំាងពី ៦៥ឆ្នំាកន្លងមក នោះបើទោះបីជាតំបន់នោះត្រូវបានពុះចែកគ្នាជាពីរចំណែករួចហើយក៏ដោយក្តី។
ចុះផ្សាយនៅថ្ងៃ៖
ស្តាប់ - ០២:០០
នេះជាលើកទី១ គិតតំាងពីឆ្នំា ២០១០ និងនៅក្រៅក្របខ័ណ្ឌនៃមហាសន្និបាតអង្គការសហប្រជាជាតិក្នុងទីក្រុងញូយ៉ក សហរដ្ឋអាមេរិក ដែលលោកប្រមុខរដ្ឋាភិបាលឥណ្ឌា និងប៉ាគីស្ថានបានព្យាយាមបំបាត់ភាពតានតឹងរវាងគ្នា។ ភាពតានតឹងដែលត្រូវបានកត់សម្គាល់ដោយការបន្តដណ្តើមគ្នាកាន់កាប់តំបន់កាស្មៀ។ នៅក្នុងជំនួបទល់មុខគ្នារយៈពេល១ម៉ោងនៅថ្ងៃអាទិត្យ ទី២៩ កញ្ញាក្នុងទីក្រុងញូយ៉ក លោកនាយករដ្ឋមន្រ្តីឥណ្ឌាម៉ាន់ម៉ូហាន់ ស៊ីន និងលោកនាយករដ្ឋមន្រ្តីប៉ាគីស្ថានណាវ៉ា សារីស្វបានព្រមព្រៀងគ្នាថា ការបង្កើនទំនាក់ទំនងរវាងប្រទេសជិតខាងទំាងពីរត្រូវតែឆ្លងកាត់តាមការគោរពបទឈប់បាញ់គ្នានៅតំបន់កាស្មៀ។
លោកស៊ីវសានការ មឺណុន ទីប្រឹក្សាសន្តិសុខជាតិឥណ្ឌាបានប្រាប់ឲ្យដឹងថា ប្រមុខរដ្ឋាភិបាលនៃប្រទេសទំាងពីរបានចាត់ឲ្យថ្នាក់ដឹកនំាជាន់ខ្ពស់យោធានៃប្រទេសទំាងពីរជាអ្នកស្វែងរកមធ្យោបាយប្រកបដោយប្រសិទ្ធិភាពក្នុងការអនុវត្តន៍បទឈប់បាញ់នៅតាមខ្សែបន្ទាត់ខ័ណ្ឌចែកតំបន់កាស្មៀជាពីរ។ តែរូបលោកទីប្រឹក្សាសន្តិសុខជាតិឥណ្ឌាដដែលបានគូសបញ្ជាក់ថា គេត្រូវរង់ចំានៅប៉ុន្មានខែខាងមុខដើម្បីចង់ដឹងថា តើជំនួបរវាងថ្នាក់ដឹកនំាកំពូលនៃប្រទេសគូសត្រូវទំាងពីរនាពេលនេះនឹងផ្តល់ផលវិជ្ជមាន ឬក៏អត់។ ទន្ទឹមគ្នានេះ និងបើយោងតាមលោកមឺណុនដដែល លោកម៉ាន់ម៉ូហាន់ ស៊ីន និងលោកណាវ៉ា សារីស្វក៏បានអញ្ជើញគ្នាទៅវិញ ទៅមកឲ្យទៅបំពេញទស្សនកិច្ចនៅក្នុងប្រទេសរបស់ខ្លួន តែនៅមិនទាន់បានបញ្ចាក់ពីថ្ងៃខែច្បាស់លាស់ទេ។
សូមជម្រាបជូនថា តំាងពីឥណ្ឌា និងប៉ាគីស្ថានទទួលបានឯករាជ្យរៀងៗខ្លួនក្នុងឆ្នំា ១៩៤៧មក បងប្អូនបង្កើតគូសត្រូវទំាងពីរបានធ្វើសង្រ្គាមប្រឆំាងគ្នាចំនួន ២ដងដើម្បីដណ្តើមកាន់កាប់តំបន់កាស្មៀ។ បច្ចុប្បន្ននេះទៀត និងបើទោះបីជាដីកាស្មៀត្រូវបានពុះចែកគ្នាជាពីរក៏ដោយ ក៏អំពើហិង្សានៅតែកើតមានជារឿយៗនៅតាមខ្សែបន្ទាត់ដែលខ័ណ្ឌចែកតំបន់នោះ។ ឥណ្ឌាតែងតែទម្លាក់កំហុសដាក់ប៉ាគីស្ថាន តែប៉ាគីស្ថានបានបដិសេធជានិច្ច។ គ្រាន់តែក្នុងរយៈពេល ២ខែចុងក្រោយនេះ ការផ្ទុះអាវុធដាក់គ្នាបានបណ្តាលឲ្យស្លាប់ទាហានប្រទេសទំាងពីរចំនួន ៨នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ