រដ្ឋាភិបាលថៃបានអនុម័តច្បាប់ពិសេសមួយដើម្បីប្រឈមទប់នឹងមហាបាតុកម្ម
នៅថ្ងៃព្រហស្បតិ៍ ទី២២ វិច្ឆិកា រដ្ឋាភិបាលថៃបានអនុម័តច្បាប់ពិសេសមួយដើម្បីប្រឈមទប់នឹងមហាបាតុកម្មដែលគ្រោងរៀបចំនាចុងសប្តាហ៍នេះក្នុងទីក្រុងបាងកក។ ច្បាប់ពិសេសនេះនឹងត្រូវអនុវត្តន៍តែទៅលើស្រុកសំខាន់ចំនួនបីស្ថិតប៉ែកកណ្តាលក្រុងបាងកកសម្រាប់រយៈពេល ៩ថ្ងៃ។ រដ្ឋាភិបាលគ្រោងនឹងដាក់ពង្រាយកម្លំាងសន្តិសុខចំនួន ១ ៧០០០នាក់។
ចុះផ្សាយនៅថ្ងៃ៖
ស្តាប់ - ០១:៥៦
មួយថ្ងៃ មុនមហាបាតុកម្មចាប់ផ្តើមនៅក្នុងទីក្រុងបាងកក រដ្ឋាភិបាលបាននិងកំពុងបង្កើនសន្តិសុខ តាមរយៈការដាក់ពង្រាយកម្លំាងនៅទីកន្លែងសំខាន់ៗក្នុងទីក្រុងបាងកក ពិសេសគឺការអនុម័តច្បាប់ពិសេសមួយនាឱកាសនោះ។ ការអនុម័តច្បាប់ពិសេសដែលត្រូវបានលោកស្រីនាយករដ្ឋមន្រ្តីយីងឡាក់សំអាងលើហេតុផលមួយចំនួនរបស់ក្រសួងស៊ើកការសម្ងាត់រួមមាន ក្រុមអ្នករៀបចំបាតុកម្មមានបំណងចង់ផ្តួលរំលំរដ្ឋាភិបាល ក្រុមបាតុករត្រៀមនឹងប្រើអំពើហិង្សាគ្រប់ប្រភេទដោយមិនខ្លាចស្លាប់ដើម្បីបំផ្លិចបំផ្លាញប្រយោជន៍សាធារណៈ ដោយគំរាមធ្វើការវាយលុកចូលក្នុងអាគារសំខាន់ៗក្នុងទីក្រុង។ សម្រាប់លោកស្រីយីងឡាក់ រដ្ឋាភិបាលត្រូវតែការពារប្រព័ន្ធលទ្ធិប្រជាធិបតេយ្យ ក្រោមរបបរាជានិយមអាស្រ័យរដ្ឋធម្មនុញ្ញ។
តាមគម្រោង មហាបាតុកម្មរៀបចំដោយក្រុមអ្នករាជានិយមជ្រុលនឹងត្រូវចាប់ផ្តើមនៅថ្ងៃសៅរ៍ស្អែក និងអាចបន្តពេញមួយចុងសប្តាហ៍នេះ។ លោកប្រមុខក្រុមប្រឹក្សាសន្តិសុខជាតិ ឧត្តមសេនីយ Paradorn Pattanatabut បានបញ្ជាក់ថា ភាពតានតឹងនឹងអាចកើតមានដោយចៀសមិនរួច ពីព្រោះនឹងមានមនុស្សចូលរួមយ៉ាងច្រើនសម្បើម។ ក្រុមអ្នករៀបចំបានប្រកាសឲ្យដឹងថា នឹងអាចមានមនុស្សចូលរួមប្រមាណជា ៥០០ ០០០នាក់ ចំណែករដ្ឋអំណាចលើកតែចំនួន ៥០ ០០០នាក់ច្រើនបំផុត។ យ៉ាងណាក៏ដោយ នេះគឺជាគម្រោងមហាបាតុកម្មមួយដែលលោកស្រីយីងឡាក់មិនធ្លាប់ប្រទះទេ តំាងពីបានឡើងកាន់តំណែងនាយករដ្ឋមន្រ្តីជិត ១ឆ្នំាកន្លះកន្លងទៅ។
គួររម្លឹកជូនឡើងវិញថា អស់រយៈពេលជាច្រើនឆ្នំាកន្លងមកហើយដែលប្រទេសថៃបានស្គាល់ភាពបះបោរនៅតាមផ្លូវ និងពេលខ្លះ ក្រុមបាតុករថែមទំាងទទួលបានជោគជ័យក្នុងការទម្លាក់រដ្ឋាភិបាលដែលជាប់ឆ្នោតស្របច្បាប់ទៀតផង។ ជាក់ស្តែង រដ្ឋប្រហារយោធាទម្លាក់លោកនាយករដ្ឋមន្រ្តីថាក់ ស៊ីនក្នុងឆ្នំា ២០០៦ ក្រោយពីមានក្បួនបាតុកម្មរបស់ក្រុមអាវលឿង។ គឺតំាងពីពេលនោះឯង ដែលថៃបានស្គាល់វិបត្តិនយោបាយយ៉ាងប្រទាញប្រទង់គ្នារវាងក្រុមអាវក្រហម អ្នកគំាទ្រលោកអតីតនាយករដ្ឋមន្រ្តី ថាក់ស៊ីន និងក្រុមអាវលឿង អ្នកគំាទ្ររាជានិយម និងក្រុមឧត្តមសេនីយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ