ជំនួបរវាងសេនាប្រមុខលីប៊ីឧត្តមសេនីយហាវតារ និងប្រធានាធិបតីអេហ្ស៊ីបលោកស៊ីស៊ីក្នុងទីក្រុងគែរ
នៅក្នុងប្រទេសអេហ្ស៊ីប បណ្តាញព័ត៌មានផ្លូវការបានប្រាប់ឲ្យដឹងពីជំនួបរវាងសេនាប្រមុខលីប៊ីឧត្តមសេនីយខាលីហ្វា ហាវតារ និងប្រធានាធិបតីអេហ្ស៊ីបលោកអាប់ឌែល ហ្វាតា អាល់ស៊ីស៊ីក្នុងទីក្រុងគែរនាថ្ងៃអាទិត្យ ទី១៤ មេសា។ ជំនួបរវាងលោកហាវតារ និងស៊ីស៊ីក្នុងទឹកដីអេហ្ស៊ីបពេលនេះបានធ្វើឡើង ក្នុងពេលដែលនៅលីប៊ីឯណោះ កម្លាំងទ័ពរបស់ឧត្តមសេនីយហាវតារ និងកម្លាំងទ័ពរបស់នាយករដ្ឋមន្រ្តីលោកហ្វាយេ អាល់ សារ៉ាកំពុងបន្តប្រយុទ្ធគ្នាយ៉ាងខ្លាំងក្លា។ តាមតួលេខបណ្តោះអាសន្នចុងក្រោយផ្តល់ដោយអង្គការសុខភាពពិភពលោក ការប្រយុទ្ធគ្នាបានបណ្តាលឲ្យមានមនុស្សស្លាប់យ៉ាងតិច ១២១នាក់ និងរបួសជាច្រើនរយនាក់ផ្សេងទៀត។
ចុះផ្សាយនៅថ្ងៃ៖
ស្តាប់ - ០២:១២
រូបភាពនៃជំនួបរវាងសេនាប្រមុខលីប៊ីឧត្តមសេនីយខាលីហ្វា ហាវតារ និងប្រធានាធិបតីអេហ្ស៊ីបលោកអាប់ឌែល ហ្វាតា អាល់ស៊ីស៊ីក្នុងទីក្រុងគែរត្រូវបានផ្សព្វផ្សាយដោយទូរទស្សន៍រដ្ឋអេហ្ស៊ីប។ គេមិនដឹងថា តើឥស្សរជនទាំងពីរបាននិយាយគ្នាពីរឿងអ្វីខ្លះទេ ហើយអ្នកនាំពាក្យប្រធានាធិបតីអេហ្ស៊ីបក៏មិនបានឆ្លើយភ្លាមៗនឹងសំណួររបស់ AFP ដែរ។ តែបើតាមទូរទស្សន៍រដ្ឋអេហ្ស៊ីបដដែល ឧត្តមសេនីយហាវតារ និងលោកស៊ីស៊ីបាននិយាយពីស្ថានការណ៍វិវត្តន៍ចុងក្រោយនៅក្នុងប្រទេសលីប៊ី។ ស្ថានការណ៍ចុងក្រោយដែលគេចង់និយាយនោះ គឺការប្រយុទ្ធគ្នារវាងកម្លាំងទ័ពរបស់ឧត្តមសេនីយហាវតារ និងកម្លាំងទ័ពរបស់លោកនាយករដ្ឋមន្រ្តីហ្វាយេ អាល់ សារ៉ា។
គួររម្លឹកថាសព្វថ្ងៃ ទឹកដីលីប៊ីកំពុងពុះចែកជាពីរ នៅម្ខាង រដ្ឋាភិបាលសហភាពជាតិទទួលស្គាល់ដោយសហគមន៍អន្តរជាតិរបស់លោកហ្វាយេ អាល់ សារ៉ាដែលកំពុងកាន់កាប់ទីក្រុងទី្រប៉ូលី ហើយនៅម្ខាងទៀត ឧត្តមសេនីយហាវតារកំពុងគ្រប់គ្រងតំបន់ប៉ែកខាងកើត។ ជាផ្លូវការ ប្រទេសអេហ្ស៊ីបបានគាំទ្រលើសំណើរបស់អង្គការសហប្រជាជាតិដែលស្វែងរកការរៀបចំបោះឆ្នោតមួយនៅលីប៊ីដើម្បីបិទបញ្ចប់ភាពហែកហួរផ្ទៃក្នុង។ តែក្រៅផ្លូវការវិញ អេហ្ស៊ីបក៏ដូចជាប្រទេសអេមីរ៉ាតអារ៉ាប់រួម និងអារ៉ាប៊ីសាអូឌីតបានលួចគាំទ្រសេនាប្រមុខហាវតារស្ងាត់ៗ។ ក្រោមភ្នែក ច្រមុះរបស់ទីក្រុងគែរ អាប៊ូដាប៊ី និងរីយ៉ាដ ឧត្តមសេនីយហាវតារជាកំពែងប្រឆាំងនឹងពួកអ៊ីស្លាមជ្រុលនិយម។
អេហ្ស៊ីបត្រូវបានគេចាត់ទុកជាប្រទេសដែលបានផ្តល់អាវុធ និងលុយកាក់ឲ្យកម្លាំងទ័ពរបស់ឧត្តមសេនីយហាវតារ។ តែទន្ទឹមគ្នានេះ អេហ្ស៊ីបក៏ចង់ឃើញជម្លោះនៅលីប៊ីត្រូវបានដោះស្រាយតាមផ្លូវចរចាដែរ ពោលមិនមែនផ្លូវយោធាទេ។ ក្រសួងការបរទេសអេហ្ស៊ីបបានអំពាវនាវដល់ភាគីជម្លោះលីប៊ីទាំងពីរឲ្យបិទបញ្ចប់ការប្រយុទ្ធគ្នា និងក៏បានអំពាវនាវឲ្យប្រឆាំងនឹងក្រុមជនប្រដាប់អាវុធជ្រុលនិយមដែរ។ ប្រភពព័ត៌មាននៅទីក្រុងគែរបានឲ្យដឹងថា អេហ្ស៊ីបចង់ឲ្យមានបទឈប់បាញ់មួយរវាងកម្លាំងទ័ពរបស់ឧត្តមសេនីយហាវតារ និងកម្លាំងទ័ពរបស់នាយករដ្ឋមន្រ្តីលោកសារ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ