ផែនការលម្អិតនៃការកម្ទេចអាវុធគីមីស៊ីរី
អង្គការហាមឃាត់អាវុធគីមី បានអនុម័តផែនការកម្ទេចអាវុធគីមីស៊ីរីហើយ ! អាវុធគីមី របស់រដ្ឋាភិបាលលោក បាស្ហារ អាល់អាសាទ ទាំងជាង១០០០តោន នឹងត្រូវបំផ្លាញចោលទាំងស្រុង យ៉ាងយូរបំផុត នៅថ្ងៃទី ៣០មិថុនា ២០១៤ នៅក្រៅដែនដីស៊ីរី។ ផែនការមានលក្ខណៈលម្អិត មានការចង្អុលទិសដៅត្រូវធ្វើតាមលំដាប់លំដោយ ប៉ុន្តែនៅមានសំនួរជាច្រើន គ្មានចម្លើយនៅឡើយ។
ចុះផ្សាយនៅថ្ងៃ៖
ស្តាប់ - ០២:២០
ផែនការ បានកំណត់ ពេលវេលា និង កាលបរិច្ឆេទ យ៉ាងច្បាស់ ដាច់ពីគ្នា ៖ អាវុធគីមីទាំងអស់ នឹងត្រូវដឹកចេញពីស៊ីរី ឱ្យបានមុនថ្ងៃទី ៤ ខែកុម្ភៈ២០១៤ ដើម្បីឱ្យប្រតិបត្តិការកម្ទេចប្រព្រឹត្តទៅដោយប្រាកដ និងយ៉ាងលឿន។ រោងចក្រ និងមជ្ឈមណ្ឌលផលិតអាវុធគីមី នឹងត្រូវរំលាយចោល នៅរវាងថ្ងៃទី ១៥ ធ្នូ ២០១៣ ដល់ថ្ងៃទី ១៥មីនា ២០១៤។ ចុងក្រោយ គឺការកម្ទេចអាវុធគីមីត្រូវបញ្ចប់ទាំងស្រុងនៅថ្ងៃទី៣០មិថុនា ឆ្នាំ២០១៤ …
លោក Christan Chartier អ្នកនាំពាក្យអង្គការ ហាមឃាត់អាវុធគីមី OIAC ៖
« មានទិសដៅពីរច្បាស់លាស់ ទីមួយគឺអាវុធគីមីស៊ីរីត្រូវបំផ្លាញចោល នៅក្រៅប្រទេសស៊ីរី។ ទីពីរ រាល់អាវុធគីមីស៊ីរី នឹងត្រូវកម្ទេចចោលឱ្យអស់ ជាចុងក្រោយនៅថ្ងៃទី ៣០មិថុនា ២០១៤។ ជាកម្ទេចទាំងស្រុង និងមិនអាចបកក្រោយវិញបានទេ។ ចំណែកភ្នាក់ងារគីមីពុលខ្លាំងបំផុត ត្រូវតែដឹកចេញពីប្រទេសនេះយ៉ាងយូរនៅថ្ងៃទី ៣១ធ្នូ២០១៣។ គ្រាប់គីមី ថ្នាំពុលគីមីមិនពុលខ្លាំង នឹងត្រូវយកចេញពីស៊ីរី នៅថ្ងៃទី៤ កុម្ភៈ ២០១៤។ នៅក្នុងប្រទេសវិញ ស៊ីរីត្រូវកម្ទេចឱ្យអស់សម្បកគ្រាប់ គ្មានផ្ទុកសារធាតុគីមី នៅថ្ងៃទី ៣១មករា២០១៤ ឯរោងចក្រ និងមជ្ឈមណ្ឌលទាំងអស់ស៊ីរី ត្រូវរំសាយនិងកម្ទេចចោលទាំងស្រុង នៅថ្ងៃទី១៥មីនា ២០១៤ »។
ប៉ុន្តែ សួរថាតើគេត្រូវដឹកអាវុធគីមីដ៏សន្ធឹកសន្ធាប់នោះ ទៅកម្ទេចនៅទីណា ?! គ្មានទេចម្លើយ ហើយមិនទាន់ទាំងបានអីផង អាល់បានី បានបដិសេធ ជាស្រេច មិនឱ្យអង្គការហាមឃាត់អាវុធគីមីខ្ចីដីប្រើទេ ព្រោះមានសម្ពាធប្រជាជន។ ពាក់ព័ន្ធនឹងបញ្ហាហិរញ្ញវត្ថុវិញ ក៏គ្មានដែរចម្លើយ ថាតើនរណាជាអ្នកចេញថ្លៃ ប្រតិបត្តិការ និងសម្ភារៈនោះ។ អង្គការហាមឃាត់អាវុធគីមី នឹងត្រូវពិនិត្យពិច័យចំណុចនេះ នៅសប្តាហ៍ខាងមុខ។ គេបានដឹងខ្លះៗថា ប្រទេសស្វីសបានស្នើផ្តល់សម្ភារៈ ម៉ូស្គូផ្តល់ជំនួយការបច្ចេកទេស ន័រវេស និងដាណឺម៉ាក ឱ្យខ្ចីនាវាសម្រាប់ដឹកអាវុធគីមីចេញទឹកដីស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ