អតីតប្រធានាធិបតីបារាំង ហ្សាក់ ស្ហៀរ៉ាក់ ទទួលមរណភាពក្នុងវ័យ៨៦ឆ្នាំ
លោក ហ្សាក់ស្ហៀរ៉ាក់ អតីតប្រធានាធិបតីបារាំង បានទទួលមរណភាព នៅព្រឹកថ្ងៃព្រហស្បតិ៍ ទី២៦ កញ្ញា ២០១៩ ក្នុងជន្មាយុ ៨៦ឆ្នាំ។ នេះបើតាមការប្រកាសឲ្យដឹង ដោយក្រុមគ្រួសាររបស់លោក។ ទោះបីជាបានចូលនិវត្តន៍ និងចាកចេញពីឆាកនយោបាយ អស់ជាច្រើនឆ្នាំ តែលោកអតីតប្រធានាធិបតីបារាំង ហ្សាក់ ស្ហៀរ៉ាក់ នៅតែបានទទួលការគោរពស្រលាញ់យ៉ាងខ្លាំង។ លោកបានចំណាយពេលភាគច្រើននៃជីវិតរបស់លោក ប្រឡូកនៅក្នុងឆាកនយោបាយបារាំង ហើយធ្លាប់បានកាន់តំណែងសំខាន់ៗជាច្រើន រាប់ចាប់តាំងពីតំណែងជាចៅហ្វាយក្រុងប៉ារីស រដ្ឋមន្រ្តី នាយករដ្ឋមន្រ្តី រហូតក្លាយជាប្រធានាធិបតីអស់រយៈពេលដល់ទៅ១២ឆ្នាំ។ តើលោក ហ្សាក់ ស្ហៀរ៉ាក់ ជាមានប្រវត្តិយ៉ាងណា ?
ចុះផ្សាយនៅថ្ងៃ៖ កែប្រែថ្ងៃទី៖
កើតនៅថ្ងៃទី ២៩ វិច្ឆិកា ១៩៣២ លោកជារដ្ឋបុរសបារាំងម្នាក់។ ចូលប្រលូកនយោបាយ ក្នុងនាមជាអ្នកស្តាំនិយម លោក Jacques Chirac គឺជាស្ថាបនិកបក្សប្រជុំអ្នកសាធារណរដ្ឋ RPR នៅឆ្នាំ១៩៧៦ និងបក្សUMP នៅឆ្នាំ២០០២ និងដែលបច្ចុប្បន្នមានឈ្មោះថា បក្សសាធារណរដ្ឋ។
ការសិក្សា
មានកំណើតកើតជានៅប៉ារីស តែបានឆ្លងកាត់កុមារភាពនៅស្រុកស្រែ Corrèze រហូតដល់ធំ ទើបមកសិក្សាបញ្ចប់ថ្នាក់វិទ្យាល័យនៅរដ្ឋធានី។ ក្រោយពីបានចេញធ្វើកូនទាហានជើងទឹកអស់មួយរយៈ លោក បានត្រលប់មកបន្តការសិក្សា នៅវិទ្យាស្ថានវិទ្យាសាស្ត្រនយោបាយ នៅឆ្នាំ១៩៥១។ ក្នុងពេលសិក្សានោះ លោកឆ្លៀតទៅរៀនវគ្គខ្លី នៅសាលា ហារវ់ាត ដ៏ល្បីល្បាញរបស់អាមេរិក ព្រមទាំងរស់នៅទីនោះ ពេញមួយឆ្នាំ។ នៅឆ្នាំ១៩៥៤ លោកបានប្រលងជាប់ចូលសាលារដ្ឋបាល។ ដោយរវល់ចេញទៅបំពេញកាតព្វកិច្ចយោធា និងធ្វើសង្គ្រាមនៅអាល់ហ្សេរី លោកអាចបញ្ចប់ការសិក្សាទទួលសញ្ញាប័ត្រ ចេញពីសាលារដ្ឋបាល នៅឆ្នាំ១៩៥៩ប៉ុណ្ណោះ រួចទើបចាប់ផ្តើមជីវិតការងារ ក្នុងនាមមន្ត្រីរដ្ឋការ ពីពេលនោះមក។
ប្រវត្តិគ្រួសារ
គឺនៅពេលកំពុងសិក្សានៅវិទ្យាស្ថានវិទ្យាសាស្ត្រនយោបាយ ដែលលោកបានជួប នាង ប៊ែរណាដែត Chodron de Courcel កូនស្រីត្រកូលខ្ពស់ដ៏មានឥទ្ធិពលម្នាក់ ហើយរៀបការជាមួយមិត្តរួមសាលាម្នាក់នេះ នៅឆ្នាំ១៩៥៦។ លោកស្រី គឺជាអ្នកគាំទ្រដ៏មុតមាំ ជិវិតនយោបាយរបស់លោក Chirac។ ប្តីប្រពន្ធ Chirac មានកូនស្រីពីរនាក់ និងចៅម្នាក់។ កូនស្រីច្បងទើបទទួលមរណភាពកាលពីខែមេសា ២០១៦ ដោយរោគគាំងបេះដូង ក្នុងជន្មាយុ ៥៨ឆ្នាំ និងដែលបានធ្វើឱ្យប៉ះពាល់ដល់ផ្លូវចិត្តលោក Jacques Chirac យ៉ាងខ្លាំង។
ជីវិតនយោបាយ
លោក Jacques Chirac បានផ្តើមចូលប្រលូកនយោបាយ ជាបឋម ក្នុងនាមជាទីប្រឹក្សាស្រុក Corrèze ដោយមិនទាំងបានឈរឈ្មោះផង។ បន្ទាប់មក នយោបាយក៏បានក្លាយជាជំនក់ចិត្ត និងឡើងតួនាទីបន្តិចម្តងៗ រហូតអំណាចកំពូល។
នៅថ្ងៃទី ១៧ ឧសភា ១៩៩៥ លោក Jacques Chirac បានក្លាយជាប្រធានាធិបតីបារាំងទី២២ និងរក្សាតួនាទីនេះ ចំនួន២អាណត្តិ ១៩៩៥-២០០២ និង២០០២-០៧។ នៅឆ្នាំ២០០៧ លោក Jacques Chirac បានសម្រេចចិត្ត ប្រកាសជាផ្លូវការ មិនឈរឈ្មោះប្រកួតប្រជែងសម្រាប់អាណត្តិទីបីទេ និងបានប្រកាសគាំទ្របេក្ខភាពលោក នីកូឡា សាកូហ្ស៊ី។
នៅក្នុងប្រវត្តិនយោបាយប្រទេសបារាំង លោកគឺជាឥស្សរជនបារាំងតែម្នាក់គត់ ដែលបានក្លាយជានាយករដ្ឋមន្ត្រី ចំនួនពីរលើក ទីមួយ ពីឆ្នាំ១៩៧៤-៧៦ ដោយមានប្រធានាធិបតីជាអ្នកស្តាំនិយមដូចគ្នា គឺលោក វ៉ាឡេរី ស្ហ៊ីស្កា ដេស្តាំង និងលើកទីពីរ ពីឆ្នាំ ១៩៨៦-១៩៨៨ ក្នុងនាមជាប្រមុខរដ្ឋាភិបាលចម្រុះ ដោយមានប្រធានាធិបតីជាអ្នកឆ្វេងនិយម គឺលោក ហ្វ្រង់ស័រ មីតេរ៉ង់។
នៅឆ្នាំ១៩៧៧ លោក Jacques Chirac បានក្លាយជាអភិបាលក្រុងប៉ារីសដំបូងគេបង្អស់ គិតចាប់តាំងពីសម័យបដិវត្តមក (ជិតមួយសតវត្សរ៍ ពីឆ្នាំ១៨៧១-១៩៧៧ ប៉ារីសស្ថិតក្រោមអំណាចរដ្ឋ គ្មានអភិបាលទេ) និងកាន់កាប់តួនាទីនេះ រហូតដល់ឆ្នាំ ១៩៩៥ ឆ្នាំដែលលោកបានក្លាយជាប្រធានាធិបតីបារាំង។
ប្រជាប្រិយភាព
ថ្វីបើលោកបានចូលនិវត្តន៍ លែងធ្វើនយោបាយក្តី តែលោក Jacques Chirac នៅតែបានទទួលការស្រលាញ់គាំទ្រយ៉ាងខ្លាំង ពីសំណាក់ប្រជាពលរដ្ឋបារាំង គ្រប់មជ្ឈដ្ឋាន និងជាពិសេសពីអ្នកនយោបាយជំនាន់ក្រោយ មិនថាមកពីបក្សស្តាំនិយម ឬឆ្វេងនិយមទេ។ សូម្បីតែអនុប្រធានគណបក្សរណសិរ្សជាតិ ដែលល្បីខាងមានលក្ខណៈជាតិនិយមជ្រុល ក៏បានទទួលស្គាល់ថា លោក ហ្សាក់ ស្ហៀរ៉ាក់ មានបុគ្គលិកលក្ខណៈជាប្រធានាធិបតីពិតៗ គួរឱ្យគោរព។
កេរ្តិ៍ឈ្មោះលោកត្រូវបានប្រជាជនបារាំង ចារទុកក្នុងប្រវតិ្តសាស្ត្របារាំង ទាំងដែលលោកនៅមានជីវិតនៅឡើយ។ សារៈមន្ទីរសិល្បៈអរិយធម៌មួយនៅទីក្រុងប៉ារីស ដែលមានឈ្មោះថា Musée du Quai Branly ត្រូវបានប្តូរឈ្មោះមកជា Musée Jacques Chirac កាលពីពេលថ្មីៗនេះទៀតផង។
សុខភាព
កាលពីឆ្នាំ២០០៥ លោកJacques Chirac បានជួបបញ្ហាសុខភាពធ្ងន់ធ្ងរម្តងរួចមកហើយ ដោយមានដាច់សរសៃឈាមក្នុងខួរក្បាល តែត្រូវបានក្រុមគ្រូពេទ្យជួយសង្រ្គោះទាន់ពេលវេលា តែក្នុងឆ្នាំដដែលនោះ លោកបានចូលសម្រាកនៅមន្ទីរពេទ្យ ជាច្រើនលើក ច្រើនសា។ លោក Jacques Chirac បង្ហាញវត្តមានក្នុងពិធីផ្លូវការជាសាធារណៈ ចុងក្រោយបង្អស់ នៅខែវិច្ឆិកាឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ