អាជ្ញាធរ និងគណៈកម្មការចំនួន ៥ត្រូវផ្ទេរចេញពីគណៈរដ្ឋមន្ត្រី
នៅថ្ងៃទី ២២នេះ ប្រមុខរដ្ឋាភិបាលកម្ពុជា បានប្រកាសកាត់ផ្តាច់អាជ្ញាធរ និងគណៈកម្មការចំនួន ៥ចេញពីការគ្រប់គ្រងរបស់គណៈរដ្ឋមន្ត្រីដែលមានលោក សុខ អានបានកាន់កាប់។ អាជ្ញាធរទាំងនោះរួមមាន អាជ្ញាធរអប្សរា គណៈកម្មការគ្រប់គ្រងផ្លូវដែកជាដើមនឹងត្រូវរុញបញ្ចូលទៅឱ្យក្រសួងវប្បធម៌ និងក្រសួងសាធារណៈការគ្រប់គ្រងជំនួសវិញ។ ថ្លែងក្នុងពិធីចែកសញ្ញាបត្រដល់គរុនិស្សិតដែលបញ្ចប់ការសិក្សានៅវិទ្យាស្ថានជាតិអប់រំ លោកនាយករដ្ឋមន្ត្រីហ៊ុន សែនក៏បានស្តីបន្ទោសចំមុខតែម្តងទៅលើអ្នកនាំពាក្យទីស្តីការគណៈរដ្ឋមន្ត្រីដែលអត្ថាធិប្បាយខុសចំពោះការរៀបចំ និងបែងចែកអាជ្ញាធរ និងគណៈកម្មការដែលធ្លាប់នៅក្រោមគណៈរដ្ឋមន្ត្រី។ ក្រៅពីនេះរាជបណ្ឌិតសភាកម្ពុជា និងអាកាសចរណ៍ស៊ីវិល គឺស្ថិតនៅក្រោមការគ្រប់គ្រងរបស់ទីស្តីការគណៈរដ្ឋមន្ត្រីដដែល។ បន្ថែមពីនេះ លោកនាយករដ្ឋមន្ត្រីហ៊ុន សែន ក៏បានលើកឡើងពីការដំឡើងប្រាក់បៀវត្សន៍របស់គ្រូបង្រៀន និងមន្ត្រីរាជការផងដែរ។ ក្នុងនោះ មន្ត្រីរាជការនឹងទទួលបានប្រាក់ចំនួន ៨៣ម៉ឺន ៥ពាន់ ៣រយរៀលក្នុងមួយខែសម្រាប់ខែមេសាខាងមុខ។ ដោយឡែកគ្រូបង្រៀនវិញនឹងទទួលបានប្រាក់បៀវត្សន៍ចំនួន ៩៥ម៉ឺន ៣ពាន់ ៥រយរៀល។សូមចុចស្តាប់ប្រសាសន៍លោកនាយករដ្ឋមន្ត្រីហ៊ុន សែនដែលរៀបចំដោយស៊ុន មេសា
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
