លោកម៉ាក្រុង អះអាងថាទៅអាល់ហ្សេរី ក្នុងនាមជាមិត្ត មិនចង់ជាប់ក្នុងរនាំងអតីតកាលទេ
លោកប្រធានាធិបតីបារាំង អេម៉ានុយអែល ម៉ាក្រុង បានអញ្ជើញទៅដល់ទីក្រុងអាល់ហ្សេ ប្រទេសអាល់ហ្សេរី កាលពីរសៀលថ្ងៃពុធ ទី៦ធ្នូ។ ដំណើរទស្សនកិច្ច ដែលមានរយៈពេលតែជាង១០ម៉ោងនេះ ត្រូវបានលោកប្រធានាធិបតីបារាំង អះអាងថា លោកទៅក្នុងនាមជាមិត្ត ហើយថាលោក មិនចង់ឲ្យបារាំង និងអាល់ហ្សេរី នៅជាប់គាំង ថ្នាំងថ្នាក់ចិត្តនឹងគ្នា ដោយសារតែរនាំងអតីតកាលនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
“ខ្ញុំមកនេះ គឺមកក្នុងនាមជាមិត្តរបស់អាល់ហ្សេរី”។ នេះគឺជាប្រសាសន៍របស់លោល អេម៉ានុយអែល ម៉ាក្រុង ប្រធានាធិបតីបារាំង ថ្លែងប្រាប់ទៅកាន់អ្នកកាសែត ពេលចុះពីយន្តហោះ នៅក្រុងអាល់ហ្សេ។ មកទទួលលោក ម៉ាក្រុង គឺមានលោកប្រធានសភាជាន់ទាបអាល់ហ្សេរី លោកនាយករដ្ឋមន្ត្រី Ahmed Ouyahia និងលោករដ្ឋមន្រ្តីក្រសួងការបរទេស។
លោកម៉ាក្រុង បាននិយាយបន្ថែមថា លោកប្រាថ្នាចង់ឲ្យទំនាក់ទំនង រវាងបារាំង និងអាល់ហ្សេរី កាន់តែល្អប្រសើរ។ គឺជាទំនាក់ទំនង ដែលស្មើភាពគ្នា។ លោកបន្តថា អាល់ហ្សេរី និងបារាំង ធ្លាប់បានហែលឆ្លងអតីតកាលជូរចត់នឹងគ្នា ក៏ប៉ុន្តែចាប់ពីពេលនេះ ប្រទេសទាំងពីរ ត្រូវបិទទំព័រប្រវត្តិសាស្ត្រនេះ កុំឲ្យវាមករំខាន ក្នុងការចាប់ដៃគ្នាកសាងអនាគត។ ក្រោមសំលេងហ៊ោរកងរំពងស្វាគមន៍ តាមផ្លូវក្នុងក្រុងអាល់ហ្សេ លោកម៉ាក្រុង បាននិយាយទៅកាន់យុវជនអាល់ហ្សេរីម្នាក់ថា លោកចង់ឲ្យយុវជនអាល់ហ្សេរី បានរីកចំរើន កសាងសមត្ថភាព និងអនាគត ដោយមានបារាំងចាំជួយជានិច្ច។
លោកប្រធានធិបតីវ័យក្មេង ម៉ាក្រុង បានទទួលស្គាល់ថា ទោះបីលោកកើតក្រោយសង្រ្គាមអាល់ហ្សេរី ក៏ពិតមែន តែលោកទទួលស្គាល់ប្រវត្តិសាស្ត្រជានិច្ច។ តែយ៉ាងណាលោក មិនចង់ជាប់អន្ទាក់អតីតកាលនេះ ធ្វើឲ្យងងឹត មិនអាចសំឡឹងមើលទៅអនាគតបានទេ។
សូមរំលឹកថា អាល់ហ្សេរី ធ្លាប់ស្ថិតនៅក្រោមអាណានិគមបារាំង រយៈពេល១៣០ឆ្នាំ ពីឆ្នាំ១៨៣០ ដល់ឆ្នាំ១៩៦២។ សង្រ្គាមដណ្តើមឯករាជ្យនៅទសវត្សឆ្នាំ៦០ បានធ្វើឲ្យប្រជាជាតិទាំងពីរ នៅតែមានចិត្តប្រកាន់នឹងគ្នារហូតដល់បច្ចុប្បន្ន បើទោះបីជាមានការប្រឹងប្រែង បង្កើនចំណងសហប្រតិបត្តិការ យ៉ាងណាក៏ដោយ។ បច្ចុប្បន្ននេះ បារាំង គឺជាអ្នកបោះទុនវិនិយោគ និងបង្កើតការងារនៅអាល់ហ្សេរី ច្រើនជាងគេ។
សម្រាប់បារាំង អាល់ហ្សេរី គឺជាស្ពានចំលង បារាំង ពីតំបន់ម៉េឌីទែរ៉ាណេ ទៅកាន់ទ្វីបអាហ្វ្រិក ភាគកណ្តាលនិងភាគខាងត្បូង។ ជាងនេះទៅទៀត បារាំង ត្រូវការវត្តមានរបស់អាល់ហ្សេរី ដើម្បីជួយ ក្នុងប្រតិបត្តិការរក្សាសន្តិភាព នៅតំបន់សាហែល នៅភាគខាងជើងម៉ាលី។ អាល់ហ្សេរី មានឥទ្ធិពល និងតួនាទីចាំបាច់ ក្នុងការកសាងសន្តិភាព ស្ថិរភាព នៃតំបន់សាហារ៉ាទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ