អាល់កៃដាគំរាមប្រធានាធិបតីបារាំង និងអំពាវនាវឲ្យសម្លាប់អ្នកដែលជេរប្រមាថព្យាការីអ៊ីស្លាម
សង្រ្គាមពាក្យសម្តីហាក់មិនទាន់ស្ងប់ស្ងាត់រវាងប្រទេសបារាំង និងអ្នកកាន់សាសនាអ៊ីស្លាម។ នៅថ្ងៃចន្ទ ទី២ វិច្ឆិកា ក្រុមជីហាតនៃអង្គការភេរវនិយមអាល់កៃដាក្នុងតំបន់ម៉ាក្រេប Aqmi បានអំពាវនាវឲ្យសកម្មជនរបស់ខ្លួនសម្លាប់អ្នកណាដែលជេរប្រមាថព្យាការីអ៊ីស្លាមម៉ាហូម៉េត និងគំរាមសងសឹកប្រឆាំងប្រធានាធិបតីបារាំងលោកម៉ាក្រុងដែលបានថ្លែងការពារសិទ្ធិសេរីភាពក្នុងការបញ្ចេញមតិ និងការគូររូបថ្លុក។
ចុះផ្សាយនៅថ្ងៃ៖
ការអំពាវនាវរបស់ Aqmi បានធ្វើឡើងនៅក្នុងសេចក្តីប្រកាសព័ត៌មានមួយដោយបញ្ជាក់ថា សម្លាប់អ្នកដែលប្រមាថព្យាការីជាសិទ្ធិរបស់អ្នកកាន់សាសនាអ៊ីស្លាមគ្រប់រូប។ តាមរយៈការអំពាវនាវនេះ ក្រុមជីហាតនៃអង្គការភេរវនិយមអាល់កៃដាក្នុងតំបន់ម៉ាក្រេប Aqmi ចង់ឆ្លើយតបនឹងការថ្លែងរបស់ប្រធានាធិបតីបារាំងលោកអេម៉ានុយអែល ម៉ាក្រុង។ នៅក្នុងពិធីគោរពវិញ្ញាណក្ខន្ធចំពោះគ្រូបង្រៀនម្នាក់លោក Samuel Paty ដែលត្រូវបានភេរវជនកាត់ក្បាលក្នុងថ្ងៃទី១៦ តុលាក្រោយពីបានបង្ហាញរូបថ្លុកព្យាការីម៉ាហូម៉េតដល់កូនសិស្ស លោកម៉ាក្រុងបានបញ្ជាក់ថា ប្រទេសក្នុងនាមសេរីភាពបញ្ចេញមតិនឹងមិនបោះបង់រូបថ្លុកទេ។
ការថ្លែងយ៉ាងដូចនេះរបស់លោកម៉ាក្រុងបានបំផុសឲ្យមានការរិះគន់ខ្លាំងក្លា និងកំហឹងពីពិភពអ្នកកាន់សាសនាអ៊ីស្លាម រួមទាំងការអំពាវនាវឲ្យធ្វើពហិការលើផលិផលបារាំង។ ក្នុងរយៈពេលប៉ុន្មានថ្ងៃចុងក្រោយនេះ មានមនុស្សជាច្រើនពាន់នាក់នៅក្នុងប្រទេសអ៊ីស្លាមជាច្រើនបានចុះផ្លូវធ្វើបាតុកម្មប្រឆាំងបារាំង។ ជាថ្មីម្តងទៀតក្នុងថ្ងៃចន្ទ ទី២ វិច្ឆិកា មានប្រជាជនបង់ក្លាដែសប្រមាណ ៥០ ០០០នាក់បានធ្វើបាតុកម្មដោយដុតទង់ជាតិបារាំង និងរូបថតលោកម៉ាក្រុង។ សេចក្តីប្រកាសព័ត៌មានរបស់ Aqmi បានបញ្ជាក់បន្ថែមថា ការធ្វើពហិការលើផលិផលបារាំងជាកាតព្វកិច្ចមួយ តែនៅមិនទាន់គ្រប់គ្រាន់ទេ។
នៅក្នុងន័យនេះ Aqmi បានអំពាវនាវឲ្យមានការសងសឹកប្រឆាំងនឹងលោកម៉ាក្រុងដោយសរសេរគំរាមថា « យើងនឹងមិនភ្លេចសកម្មភាពដ៏ឃោរឃៅរបស់អ្នកទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ