AIEA បារម្ភពីវត្តមានមជ្ឈមណ្ឌលនុយក្លេអ៊ែររបស់អ៊ីរ៉ង់ដែលអ៊ីរ៉ង់មិនបានរាយការណ៍
នាយកទីភ្នាក់ងារថាមពលបរមាណូអន្តរជាតិ AIEA បានថ្លែងពីក្តីបារម្ភជុំវិញវត្តមានមជ្ឈមណ្ឌលនុយក្លេអ៊ែរនៅអ៊ីរ៉ង់ជាច្រើនដែលអ៊ីរ៉ង់មិនបានរាយការណ៍។ ទន្ទឹមគ្នានេះ នាយក AIEA ក៏បានបញ្ជាក់ពីកំណើនបរិមាណស្តុកសារធាតុអ៊ុយរ៉ាញ៉ូមចម្រើនរួចដែរ។ ព័ត៌មានទាំងនេះត្រូវបានចែកនៅក្នុងរបាយការណ៍ចំនួនពីរដែលសារព័ត៌មានជាច្រើនបានទទួលក្នុងថ្ងៃចន្ទ ទី៣១ ឧសភា។ អ្វីជាការកត់សម្គាល់ ដំណឹងមិនល្អមួយនេះបានធ្លាក់មក ខណៈដែលកិច្ចចរចាដើម្បីស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ កំពុងបន្តធ្វើនៅក្នុងទីក្រុងវីយែន ប្រទេសអូទ្រីស។
ចុះផ្សាយនៅថ្ងៃ៖
គឺនៅក្នុងរបាយការណ៍ចុងក្រោយរបស់ខ្លួនដែលនាយកទីភ្នាក់ងារថាមពលបរមាណូអន្តរជាតិ AIEA លោក Rafael Grossi បានសម្តែងក្តីបារម្ភពាក់ព័ន្ធនឹងវត្តមានទីតាំងនុយក្លេអ៊ែរជាច្រើននៅអ៊ីរ៉ង់ និងដែលអ៊ីរ៉ង់មិនបានរាយការណ៍ប្រាប់ AIEA ទេ។ ក្នុងរយៈពេលប៉ុន្មានសប្តាហ៍ចុងក្រោយនេះ កិច្ចពិភាក្សាបច្ចេកទេសជាច្រើនត្រូវបានរៀបចំឡើងរវាង AIEA និងអ៊ីរ៉ង់ដើម្បីបំភ្លឺជុំវិញវត្តមាននុយក្លេអ៊ែរជាច្រើនកន្លែង។ តែ AIEA មានការសោកស្តាយថា កិច្ចពិភាក្សានោះមិនបានហុចលទ្ធផលអ្វីទាំងអស់ និងថា AIEA មិនដែលស្គាល់ទីតាំងនុយក្លេអ៊ែរទាំងអស់នោះទេ។
ទន្ទឹមគ្នានេះ AIEA បានបញ្ជាក់នៅក្នុងរបាយការណ៍មួយទៀតថា បរិមាណសារធាតុអ៊ុយរ៉ាញ៉ូមចម្រើនរួចដែលអ៊ីរ៉ង់បានស្តុកមានលើស ៣ ២០០គីឡូក្រាម ពោលលើសជិត ១៦ដងដែលកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ បានកំណត់។ តួលេខជាងជាង ៣ ២០០គីឡូក្រាមគ្រាន់ជាតួលេខប៉ាន់ស្មានប៉ុណ្ណោះ ព្រោះ AIEA មិនអាចផ្ទៀងផ្ទាត់បានទេដោយសារតែអ៊ីរ៉ង់ទើបបានរារាំងមិនឲ្យក្រុមអធិការរបស់ AIEA ទៅកាន់អ៊ីរ៉ង់។ អ្វីជាការកត់សម្គាល់ របាយការណ៍នេះបានធ្លាក់មក ខណៈដែលក្រុមប្រទេសហត្ថលេខីនៃកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ កំពុងបន្តចរចាគ្នានៅក្នុងទីក្រុងវីយែន ប្រទេសអូទ្រីស។
កម្មវត្ថុនៃកិច្ចចរចាដែលបានចាប់ផ្តើមនាដើមខែមេសា គឺដើម្បីព្យាយាមស្រោចស្រង់កិច្ចព្រមព្រៀងមួយនេះឡើងវិញ។ កិច្ចព្រមព្រៀងដែលត្រូវបានអតីតប្រធានាធិបតីអាមេរិកដកអាមេរិកចេញកាលពីឆ្នាំ ២០១៨ និងដែលប្រធានាធិបតីអាមេរិកថ្មីលោកចូ បៃដិនចង់នាំអាមេរិកឲ្យត្រឡប់ចូលវិញ។ យ៉ាងណាក៏ដោយ របាយការណ៍របស់ AIEA ពេលនេះនឹងត្រូវដាក់ឲ្យក្រុមប្រឹក្សាភិបាល AIEA សិក្សា ពិនិត្យនៅក្នុងកិច្ចប្រជុំដែលគ្រោងធ្វើនៅសប្តាហ៍ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ