អ៊ីរ៉ង់ និងវ៉េណេស៊ុយអេឡាចុះហត្ថលេខាលើកិច្ចព្រមព្រៀងនៃកិច្ចសហប្រតិបត្តិការយុទ្ធសាស្រ្តរយៈពេល ២០ឆ្នាំ
នៅថ្ងៃសៅរ៍ ទី១១ មិថុនា ប្រទេសអ៊ីរ៉ង់ និងប្រទេសវ៉េណេស៊ុយអេឡាបានចុះហត្ថលេខាលើកិច្ចព្រមព្រៀងនៃកិច្ចសហប្រតិបត្តិការជាយុទ្ធសាស្រ្តលើវិស័យសំខាន់ៗរយៈពេល ២០ឆ្នាំ។ ពិធីចុះហត្ថលេខានេះបានធ្វើឡើងនៅចំពោះមុខវត្តមានប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ី និងសមភាគីវ៉េណេស៊ុយអេឡាលោកនីកូឡា ម៉ាឌូរ៉ូ។ លោកម៉ាឌូរ៉ូដែលបានទៅបំពេញទស្សនកិច្ចក្នុងប្រទេសអ៊ីរ៉ង់តាំងពីថ្ងៃសុក្រ ទី១០ មិថុនា។ គួរបញ្ជាក់ថា អ៊ីរ៉ង់ និងវ៉េណេស៊ុយអេឡាជាប្រទេសជង្រុកប្រេង និងកំពុងជាប់ទណ្ឌកម្មសេដ្ឋកិច្ចរបស់អាមេរិកដូចគ្នា។
ចុះផ្សាយនៅថ្ងៃ៖
ស្តាប់ - ០២:០១
កិច្ចព្រមព្រៀងនៃកិច្ចសហប្រតិបត្តិការជាយុទ្ធសាស្រ្តរយៈពេល ២០ឆ្នាំរវាងអ៊ីរ៉ង់ និងវ៉េណេស៊ុយអេឡាផ្តោតលើវិស័យនយោបាយ វិស័យការពារ វិស័យសេដ្ឋកិច្ច វិស័យធនាគារ វិស័យថាមពល វិស័យប្រេង វិស័យឧស្ម័ន វិស័យផលិតផលគីមីប្រេង និងវិស័យទេសចរណ៍។ « ការចុះហត្ថលេខាលើកិច្ចព្រមព្រៀងនៃសហប្រតិបត្តិការជាយុទ្ធសាស្ត្ររយៈពេល២០ឆ្នាំបង្ហាញពីការប្តេជ្ញាចិត្តរបស់ថ្នាក់ដឹកនាំនៃប្រទេសទាំងពីរក្នុងការអភិវឌ្ឍន៍ទំនាក់ទំនងទ្វេភាគីនៅលើគ្រប់វិស័យ » នេះជាការថ្លែងរបស់ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីដែលអង្គុយក្បែរប្រធានាធិបតីវ៉េណេស៊ុយអេឡាលោកនីកូឡា ម៉ាឌូរ៉ូ។
លោកម៉ាឌូរ៉ូដែលបានទៅបំពេញទស្សនកិច្ចនៅអ៊ីរ៉ង់តាំងពីថ្ងៃសុក្រ ទី១០ មិថុនាបានថ្លែងសាទរលើកិច្ចព្រមព្រៀង និងបានលើកឡើងពីមិត្តភាពមិនអាចកាត់ផ្តាច់បានរវាងអ៊ីរ៉ង់ និងវ៉េណេស៊ុយអេឡា។ បន្ទាប់មក លោកម៉ាឌូរ៉ូក៏បានប្រាប់ឲ្យដឹងពីគម្រោងនៃកិច្ចសហប្រតិបត្តិការរួមចំនួនពីររវាងប្រទេសទាំងពីរ ទី១ ការផលិតផលចំណីអាហារនៅវ៉េណេស៊ុយអេឡាដើម្បីនាំចេញទៅអ៊ីរ៉ង់ និងទៅកាន់តំបន់ និង ទី២ ការបើកសម្ពោធជើងហោះហើរត្រង់រវាងក្រុងតេហេរ៉ង់ និងក្រុងការ៉ាកាស់ដើម្បីលើកកម្ពស់វិស័យទេសចរណ៍។
គួរបញ្ជាក់ថា អ៊ីរ៉ង់ និងវ៉េណេស៊ុយអេឡាជាប្រទេសជង្រុកប្រេង និងជាប្រទេសដែលកំពុងជាប់ទណ្ឌកម្មសេដ្ឋកិច្ចរបស់អាមេរិកដូចគ្នា។ អ៊ីចឹងហើយបានជាប្រធានាធិបតីអ៊ីរ៉ង់បានឆ្លៀតវាយប្រហារអាមេរិកដោយកោតសរសើរពីការប្តេជ្ញាចិត្តតស៊ូរបស់ប្រជាជន ថ្នាក់ដឹកនាំ និងប្រធានាធិបតីវ៉េណេស៊ុយអេឡាក្នុងការប្រឈមទប់នឹងទណ្ឌកម្មរបស់អាមេរិក។ តាមពិត ប្រទេសជង្រុកប្រេងទាំងពីរអ៊ីរ៉ង់ វ៉េណេស៊ុយអេឡាធ្លាប់មានទំនាក់ទំនងជិតស្និទ្ធខ្លាំងតាំងពីសម័យប្រធានាធិបតីវ៉េណេស៊ុយអេឡាលោកអ៊ុយហ្គោ ស្ហាវេសចន្លោះឆ្នាំ ១៩៩៩ ២០១៣ និងរឹតតែជិតស្និទ្ធថែមទៀតនៅក្នុងជំនាន់ប្រធានាធិបតីលោកនីកូឡា ម៉ាឌូរ៉ូបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ