ហ្កាហ្សា ៖ ក្រុមជីហាតអ៊ីស្លាមប៉ាឡេស្ទីន និងអ៊ីស្រាអែល ព្រមព្រៀងផ្អាកបាញ់
បន្ទាប់ពីវាយប្រហារយ៉ាងសន្ធាប់អស់រយៈពេលបីថ្ងៃពេញ លើតំបន់ហ្កាហ្សា ដែលបណ្តាលស្លាប់ជីវិតជនប៉ាឡេស្ទីន៤៤នាក់ កម្លាំងប្រដាប់អាវុធប៉ាឡេស្ទីន ជីហាតអ៊ីស្លាម និងភាគីអ៊ីស្រាអែល បានព្រមព្រៀងគ្នាផ្អាកបាញ់។ ការព្រមព្រៀងឈប់បាញ់ដ៏ផុយស្រួយ បានចូលជាធរមាន នៅវេលាម៉ោង៨កន្លះ ម៉ោងសកល យប់មិញ (៧សីហា២០២២)។ ច្រកចេញចូលតំបន់ហ្កាហ្សា តាមអ៊ីស្រាអែល ក៏បានបើកវិញដែរ ដើម្បីមនុស្សធម៌។
ចុះផ្សាយនៅថ្ងៃ៖
ស្តាប់ - ០២:១១
ជាមួយនឹងអំណរ និងការជំរុញឱ្យភាគីបក្សដិបក្សប្រឹងគោរពបទឈប់បាញ់ ប្រេសិតអង្គការសហប្រជាជាតិប្រចាំតំបន់ដើមបូព៌ា លោក តូរ វេនណេសឡិន Tor Wennesland យល់ថាកិច្ចព្រមព្រៀងឈប់បាញ់រវាងក្រុមជីហាតអ៊ីស្លាមប៉ាឡេស្ទីននិងអ៊ីស្រាអែល មានលក្ខណៈផុយស្រួយណាស់។
ការិយាល័យនាយករដ្ឋមន្ត្រីអ៊ីស្រាអែល យ៉ាអៀរ ឡាពីដ បានអះអាងថាបទឈប់បាញ់បានចូលជាធរមាននៅវេលាម៉ោង១១កន្លះយប់ម៉ោងនៅក្នុងស្រុក ប៉ុន្តែអ៊ីស្រាអែលរក្សាសិទ្ធិតបតវិញ ក្នុងករណីមានការរំលោភកិច្ចព្រមព្រៀង។ ខាងក្រុមជីហាតអ៊ីស្លាមប៉ាឡេស្ទីននៅហ្កាហ្សា ក៏បានបញ្ជាក់ដូចគ្នាថាឈប់បាញ់ដែរ តែព្រមាននឹងកាន់អាវុធតតាំងវិញភ្លាមបើមានការឈ្លានពានថ្មីទៀត ពីសំណាក់អ៊ីស្រាអែល។
បទឈប់បាញ់កើតចេញជារូបរាង ដោយសារកិច្ចខិតខំប្រឹងប្រែងរបស់អេហ្ស៊ីបមានប្រវត្តិធ្វើជាអន្តរការីក្នុងជម្លោះអ៊ីស្រាអែលនិងប៉ាឡេស្ទីន តាំងពីដើមមក។ បើតាមប៉ាឡេស្ទីន កិច្ចព្រមព្រៀងឈប់បាញ់នេះ ជាលទ្ធផលនៃការប្តេជ្ញាចិត្តរបស់អេហ្ស៊ីបក្នុងការជួយរកសេរីភាពឱ្យសកម្មជនជាន់ខ្ពស់របស់ចលនាជីហាតអ៊ីស្លាមពីរនាក់ គឺ Halil Awawdesh ដែលធ្វើកូដកម្មអត់អាហារតាំងពី១៥០ថ្ងៃមក និង Bassem el-Saadi ដែលអ៊ីស្រាអែល បានចាប់ខ្លួនកាលពីថ្មីៗ នៅស៊ីហ្សកដានី។
បទឈប់បាញ់ ក៏មានចែងផងដែរ អំពីការបើកច្រកផ្លូវចេញចូលតំបន់ហ្កាហ្សាឡើងវិញជាធម្មតា ដើម្បីឆ្លើយតបទៅនឹងសេចក្តីការមនុស្សធម៌ ចាប់ពីថ្ងៃចន្ទនេះតទៅ។ ប៉ុន្តែសកម្មភាពអាចត្រលប់ទៅរកភាពដើមបាន ដោយអាស្រ័យទាំងស្រុងទៅលើការវិវឌ្ឍនៃស្ថានភាព និងប្រសិនបើមានការគោរពសន្តិសុខ។ នេះបើតាមសេចក្តីថ្លែងការណ៍ព្រមានរបស់ស្ថាប័នគ្រប់គ្រងច្រកព្រំដែននៃក្រសួងការពារជាតិអ៊ីស្រាអែល។
សូមរំលឹកថា អ៊ីស្រាអែលបានបើកប្រតិបត្តិការយោធាលើតំបន់ហ្កាហ្សា នៅថ្ងៃសុក្រទី ៥សីហា ប្រឆាំងនឹងក្រុមយោធាជីហាតអ៊ីស្លាម។ ប្រតិបត្តិការបីថ្ងៃបានផ្តាច់ជីវិតជនប៉ាឡេស្ទីន សរុបយ៉ាងហោច៤៤នាក់ និងរបួស ៣៦០នាក់។ នៅមុនបទឈប់បាញ់ចូលជាធរមាន អ៊ីស្រាអែលបានបន្តវាយប្រហារលើតំបន់ហ្កាហ្សា រហូតដល់នាទីចុងក្រោយ ដោយអះអាងថាដៅលើទីតាំងរបស់ពួកយោធាជីហាតអ៊ីស្លាម ដែលបាញ់រ៉ុកកែតមកលើដែនដីអ៊ីស្រាអែលភាគខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ