ចិន និងអារ៉ាប៊ីសាអូឌីតកំពុងបន្តបង្កើនកិច្ចសហប្រតិបត្តិការរវាងគ្នានៅលើគ្រប់វិស័យ
នៅថ្ងៃអាទិត្យ ទី១១ មិថុនានេះ ប្រទេសអារ៉ាប៊ីសាអូឌីតធ្វើជាម្ចាស់ផ្ទះរៀបចំសន្និសីទពាណិជ្ជកម្មរវាងចិន និងអារ៉ាប៊ីសាអូឌីត។ មានអ្នកចូលរួមជាង ២ ០០០នាក់មកពី ២៣ប្រទេសនៅក្នុងសន្និសីទក្រោមប្រធានបទ « សហការដើម្បីភាពរុងរឿង »។ នេះជារូបភាពថ្មីនៃការបន្តបង្កើនកិច្ចសហប្រតិបត្តិការ និងការរឹតចំណងរវាងចិន និងអារ៉ាប៊ីសាអូឌីតនៅលើគ្រប់វិស័យ។
ចុះផ្សាយនៅថ្ងៃ៖
ស្តាប់ - ០១:៥១
នេះជាលើកទី១០ ដែលចិន និងអារ៉ាប៊ីសាអូឌីតបានរៀបចំឲ្យមានសន្និសីទពាណិជ្ជកម្មរវាងគ្នា។ តែអារ៉ាប៊ីសាអូឌីតធ្លាប់បានសន្យាថា ការរៀបចំលើកទី១០ នេះជាការរៀបចំដ៏សំខាន់ និងអស្ចារ្យមិនធ្លាប់មានពីមុនមកទេ។ មានប្រធានបទជាច្រើនដែលត្រូវលើកយកទៅជជែកនៅក្នុងសន្និសីទ រួមមាននៅក្នុងវិស័យបច្ចេកវិទ្យា កសិកម្ម អចលនទ្រព្យ ឬមួយក៏នៅក្នុងវិស័យនវានុវត្តន៍ជាដើម។ គួរបញ្ជាក់ថា នៅក្នុងដំណើរទស្សនកិច្ចរបស់ប្រធានាធិបតីចិនលោកស៊ី ជីនពីងនៅអារ៉ាប៊ីសាអូឌីតកាលពីខែធ្នូ ឆ្នាំ ២០២២ កន្លងទៅ លោកស៊ីបានសន្យាការផ្តើមសករាជថ្មីនៅក្នុងទំនាក់ទំនងរវាងទីក្រុងប៉េកាំង និងទីក្រុងរីយ៉ាដ។
តាំងពីពេលនោះមក ចិនបានរៀបចំ និងដើរតួនាទីជាអាជ្ញាកណ្តាលឲ្យមានការរំកិលរកគ្នាជាថ្មីរវាងអារ៉ាប៊ីសាអូឌីត និងអ៊ីរ៉ង់ដែលជាសត្រូវស៊ូពូជនឹងគ្នានៅក្នុងតំបន់។ ជាលទ្ធផល ប្រទេសទាំងពីរបានភ្ជាប់ទំនាក់ទំនងការទូតរវាងគ្នាឡើងវិញ។ ក្នុងពេលជាមួយគ្នា អារ៉ាប៊ីសាអូឌីតបានចូលរួមជាមួយអង្គការនៃកិច្ចសហប្រតិបត្តិការក្រុងសៀហៃដែលដឹកនាំដោយចិន។ តែគេមិនត្រូវភ្លេចនិយាយទេថា រាត្រីទឹកឃ្មុំដែលកំពុងបន្តមានរវាងចិន និងអារ៉ាប៊ីសាអូឌីតនេះមិនអាចកំបាំងមុខអ្នកផ្សេងបានឡើយ ពិសេសគឺអាមេរិកដែលជាសម្ព័ន្ធមិត្តប្រវត្តិសាស្រ្តរបស់អារ៉ាប៊ីសាអូឌីត។
ក្នុងសប្តាហ៍នេះ ប្រមុខការទូតអាមេរិកលោកអង់តូនី ប៊្លីនកិនបានទៅបំពេញទស្សនកិច្ចនៅក្នុងប្រទេសអារ៉ាប៊ីសាអូឌីត។ ទស្សនកិច្ចនេះបានធ្វើឡើងតែប៉ុន្មានថ្ងៃ មុននឹងអារ៉ាប៊ីសាអូឌីតរៀបចំសន្និសីទពាណិជ្ជកម្មជាមួយចិនក្នុងថ្ងៃអាទិត្យ ទី១១ មិថុនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ