ប្រធានាធិបតីអ៊ីរ៉ង់ផ្តើមទស្សនកិច្ចមួយជុំទ្វីបអាមេរិកឡាទីននៅក្នុង ៣ប្រទេសជាមិត្ត
ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីផ្តើមទស្សនកិច្ចមួយជុំទ្វីបអាមេរិកឡាទីនចាប់ពីថ្ងៃអាទិត្យ ទី១១ មិថុនា។ មាន ៣ប្រទេសជាមិត្តដែលលោករ៉ៃស៊ីបំពេញទស្សនកិច្ច គឺវេណេស៊ុយអេឡា គុយបា និងប្រទេសនីការ៉ាហ្កា។ កម្មវត្ថុនៃទស្សនកិច្ច គឺដើម្បីពង្រឹងទំនាក់ទំនងជាមួយប្រទេសជាមិត្តទាំង ៣ នៅអាមេរិកឡាទីនក្នុងការប្រឈមនឹងសហរដ្ឋអាមេរិកដែលជាសត្រូវរួម។ គួរបញ្ជាក់ថា អ៊ីរ៉ង់ វេណេស៊ុយអេឡា គុយបា និងនីការ៉ាហ្កាជាប្រទេសដែលជាប់ទណ្ឌកម្មអាមេរិកដូចគ្នា។
ចុះផ្សាយនៅថ្ងៃ៖
ស្តាប់ - ០២:១៣
តាមបណ្តាញសារព័ត៌មានផ្លូវការរបស់អ៊ីរ៉ង់ ទស្សនកិច្ចរបស់លោកអេប្រាហ៊ីម រ៉ៃស៊ីនៅក្នុងប្រទេសវេណេស៊ុយអេឡា គុយបា និងនីការ៉ាហ្កាត្រូវបានអមដំណើរដោយគណៈប្រតិភូអ៊ីរ៉ង់មួយក្រុមធំ។ ចំណែកប្រធានបទដែលលោករ៉ៃស៊ីត្រូវលើកយកទៅជជែក គឺកិច្ចសហប្រតិបត្តិការសេដ្ឋកិច្ច នយោបាយ និងវិទ្យាសាស្រ្ត។ ដំណើរទៅកាន់ប្រទេសវេណេស៊ុយអេឡារបស់ប្រធានាធិបតីអ៊ីរ៉ង់ពេលនេះធ្វើឡើង បន្ទាប់ពីទស្សនកិច្ចរបស់ប្រធានាធិបតីវេណេស៊ុយអេឡាលោកម៉ាឌុយរ៉ូនៅអ៊ីរ៉ង់កាលពីឆ្នាំ ២០២២ និងថ្មីៗនេះ គឺទស្សនកិច្ចរបស់ប្រមុខការទូតអ៊ីរ៉ង់នៅក្នុងតំបន់។
តាមពិត អ៊ីរ៉ង់ និងប្រទេសទាំង ៣ នេះនៅអាមេរិកឡាទីនមានកិច្ចព្រមព្រៀងជាមួយគ្នាស្រាប់នៅក្នុងវិស័យប្រេង ឬផលិតផលស្បៀង។ តែបរិមាណនៃការដោះដូរនៅមានតិចតួចនៅឡើយ នេះបើតាមការអះអាងរបស់អ្នកជំនាញប្រទេសអ៊ីរ៉ង់លោក Jonathan Piron។ តាមអ្នកជំនាញរូបនេះដដែល គេបានសង្កេតឃើញអ៊ីរ៉ង់ជួយធ្វើទំនើបកម្មវិស័យប្រេងរបស់វេណេស៊ុយអេឡា និងបានបន្ថែមថា អ្វីដែលសំខាន់សម្រាប់អ៊ីរ៉ង់ គឺការសហការជាមួយធនាគារនៅអាមេរិកឡាទីនដែលអាចអនុញ្ញាតឲ្យអ៊ីរ៉ង់គេចពីភាពឯកោ និងពង្វាងពីទណ្ឌកម្មអាមេរិក។
គួរបញ្ជាក់ថា ជម្រើសរបស់ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីទៅកាន់ប្រទេសវេណេស៊ុយអេឡា គុយបា និងនីការ៉ាហ្កាពេលនេះមិនមែនជាជម្រើសចៃដន្យទេ ព្រោះប្រទេសទាំង ៣ នេះមានអាមេរិកជាសត្រូវដូចអ៊ីរ៉ង់ និងកំពុងជាប់ទណ្ឌកម្មសេដ្ឋកិច្ចអាមេរិកដូចគ្នា។ គួរបញ្ជាក់ថា លោករ៉ៃស៊ីមិនមែនជាប្រធានាធិបតីអ៊ីរ៉ង់ទី១ ដែលទៅទស្សនកិច្ចនៅគុយបា វេណេស៊ុយអេឡា និងនៅនីការ៉ាហ្កាទេ។ ក្នុងឆ្នាំ ២០១៦ លោកហាសាន រ៉ូហានីបានទៅទស្សនកិច្ចនៅគុយបា និងវេណេស៊ុយអេឡា ហើយកាលពីឆ្នាំ ២០០៧ គឺទស្សនកិច្ចរបស់លោកម៉ាមូដ អាម៉ាឌីនណេហ្សាដនៅក្នុងប្រទេសនីការ៉ាហ្កា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ