អ្នកសង្កេតការណ៍យោធាអ.ស.ប.៣នាក់រងរបួសនៅព្រំដែនលីបង់-អ៊ីស្រាអែល
នៅព្រំដែនលីបង់-អ៊ីស្រាអែល, យ៉ាងហោច អ្នកសង្កេតការណ៍យោធា ៣ នាក់ របស់អង្គការសហប្រជាជាតិ និងអ្នកបកប្រែភាសាម្នាក់ផង បានរងរបួស ព្រោះតែការផ្ទុះគ្រាប់បែកបង្កៃ១ កាលពីថ្ងៃសៅរ៍ ទី៣០មីនា នៅពេលដែលពួកគេចុះបំពេញបេសកម្មជាមួយក្រុមទាហានមួកខៀវ នាប៉ែកខាងត្បូងលីបង់។ ទីកន្លែងនោះ ក៏កំពុងតែរងការវាយប្រហារគ្នាកាន់តែខ្លាំង រវាងទាហានអ៊ីស្រាអែល និងក្រុមចលនាប្រដាប់អាវុធហេសបូឡាលីបង់ ចាប់តាំងពីផ្ទុះសង្គ្រាមនៅហ្កាហ្សា។
ចុះផ្សាយនៅថ្ងៃ៖
ស្តាប់ - ០២:៤៧
អ្នកសង្កេតការណ៍យោធា ៣ នាក់ របស់អង្គការសហប្រជាជាតិ ដែលរងរបួសដោយផ្ទុះគ្រាប់នោះ ជាជនជាតិន័រវេស ឈីលី និងអូស្ត្រាលី។ អ្នកឆ្លើយឆ្លងព័ត៌មានវិទ្យុបារាំងRFI ប្រចាំលីបង់ បានបញ្ជាក់ថា ការផ្ទុះគ្រាប់ បង្កគ្រោះថ្នាក់នោះ ហាក់មានសភាពពុំច្បាស់សោះ។ ដ្បិតថា ប្រភពព័ត៌មានខុសៗគ្នា អះអាងផ្សេងៗគ្នា។ ពីសំណាក់ភាគីទាហានលីបង់ បានប្រកាសថា បុគ្គលិករបស់អង្គការសហប្រជាជាតិទាំងនោះ រងគ្រោះព្រោះតែការវាយប្រហារផ្លូវអាកាស តាមរយៈយន្តហោះដ្រូនរបស់អ៊ីស្រាអែល។ ផ្ទុយទៅវិញ រដ្ឋអ៊ីស្រាអែល បដិសេធយ៉ាងប្រញាប់ ទាត់ចោលការចោទប្រកាន់នេះ និងថា ខ្លួនពុំបានវាយប្រហារលើកន្លែងជួបគ្រោះថ្នាក់នោះឡើយ។
បើយោងតាមអ្នកនាំពាក្យរបស់ភ្នាក់ងារអង្គការសហប្រជាជាតិប្រចាំលីបង់, កន្លែងផ្ទុះគ្រាប់នោះនៅជិតនឹងកន្លែងរបស់ក្រុមយាមល្បាតអង្គការសហប្រជាជាតិនៅលីបង់។ កងកម្លាំងបណ្តោះអាសន្នរបស់អង្គការសហប្រជាជាតិប្រចាំលីបង់ កំពុងបំពេញបេសកម្មចុះសង្កេតការណ៍ និងត្រួតពិនិត្យបទឈប់បាញ់រវាង លីបង់ និងអ៊ីស្រាអែល អនុលោមតាមកិច្ចព្រមព្រៀងឆ្នាំ១៩៤៩។
អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរស៍ បានសម្តែងការសោកស្តាយចំពោះគ្រោះថ្នាក់នេះ ហើយនិងថ្លែងក្តីបារម្ភចំពោះការបាញ់បោះដែលចេះតែបន្តអូសបន្លាយនៅព្រំដែនលីបង់និងអ៊ីស្រាអែល។ នាយករដ្ឋមន្ត្រីលីបង់ និងក្រសួងការបរទេសលីបង់ ចាត់ទុកថា នោះជាគ្រោះថ្នាក់ដ៏ធ្ងន់ និងបំពានច្បាប់អន្តរជាតិ។
នៅប៉ែកខាងត្បូងលីបង់នោះ ពុំមែនជាលើកទី១នោះឡើយដែលកើតមានគ្រោះថ្នាក់ប៉ះពាល់ដល់សុវត្ថិភាពបុគ្គលិកអង្គការសហប្រជាជាតិប្រចាំលីបង់។ ខែវិច្ឆិកា២០២៣ ក្រុមកងកម្លាំងល្បាតអន្តរជាតិ ក៏ធ្លាប់ត្រូវទាហានអ៊ីស្រាអែលបាញ់ប្រហារដែរ តែកាលណោះ កុសលល្អ គ្មានអ្នកគ្រោះថ្នាក់។
ការកម្រើកសកម្មភាពវាយប្រហារគ្នារវាងអ៊ីស្រាអែលនិងពួកហេសបូឡាលីបង់ បានផ្ទុះឡើងកាន់តែខ្លាំង ចាប់ពីសង្គ្រាមរវាងអ៊ីស្រាអែលនិងពួកហាម៉ាសប៉ាឡេស្ទីន នាថ្ងៃទី៧តុលាឆ្នាំទៅមិញ។ ពួកហេសបូឡាគាំទ្រខាងពួកហាម៉ាស។ ចន្លោះសង្គ្រាមប្រមាណ៦ខែមករានេះ នៅខាងទឹកដីលីបង់ មានស្លាប់មនុស្សប្រមាណ ៣៤៧ នាក់ ភាគច្រើនជាពួកប្រដាប់អាវុធហេសបូឡាលីបង់។ ក្នុងទឹកដីលីបង់ដដែល អ៊ីស្រាអែលវាយប្រហារផ្លូវកាសសម្លាប់ម្តងមួយៗមេក្រុមប្រដាប់អាវុធដែលប្រឆាំងអ៊ីស្រាអែល។ ថ្ងៃសុក្រទី ២៩ មីនា អ៊ីស្រាអែលបានកម្ចាត់ផ្តាច់ជីវិតមេកើយហេសបូឡាធំម្នាក់ទៀត។ ចំណែកប៉ែកខាងជើងអ៊ីស្រាអែលវិញ ក្នុងរយៈពេលសឹកចម្បាំងជិតកន្លះឆ្នាំនេះ ទាហានអ៊ីស្រាអែល១០នាក់និងជនស៊ីវិល៨នាក់ បាត់បង់ជីវិត ព្រោះតែស្នាដៃហេសបូឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ