ហ្កាហ្សា៖ បុគ្គលិកអង្គការមនុស្សធម៌អាមេរិកាំង ៧នាក់ស្លាប់នៅក្នុងការវាយប្រហាររបស់អ៊ីស្រាអែល
ប្រតិកម្មធ្លាក់ចុះជាបន្តបន្ទាប់ នៅក្រោយបុគ្គលិករបស់អង្គការក្រៅរដ្ឋាភិបាលអាមេរិកចំនួន៦នាក់ ស្លាប់នៅក្នុងការវាយប្រហាររបស់អ៊ីស្រាអែល កាលពីថ្ងៃចន្ទ ទី ១មេសា។ អាមេរិក អូស្ត្រាលី និងប៉ូឡូញ ដែលមានជនជាតិរបស់ខ្លួន ស្លាប់ ដោយសារការវាយប្រហារ នៅភាគកណ្តាលហ្កាហ្សា បានទាមទារការឆ្លើយបំភ្លឺបន្ទាន់ពីអ៊ីស្រាអែល។ មេចុងភៅអាមេរិក ដែលជាប្រធានអង្គការWorld Central Kitchen សំដែងទុក្ខសោកដោយសារការបាត់បង់ជីវិតរបស់អ្នកស្ម័គ្រចិត្ត និងប្រកាសផ្អាកសកម្មភាពផ្តល់ជំនួយមនុស្សធម៌របស់ខ្លួន នៅហ្កាហ្សា។
ចុះផ្សាយនៅថ្ងៃ៖
ស្តាប់ - ០៣:១៥
ការវាយប្រហារឥតស្រាកស្រាន្តរបស់កងទ័ពអ៊ីស្រាអែលបានប្រែក្លាយហ្កាហ្សាជាតំបន់ដ៏គ្រោះថ្នាក់ គ្មានសុខសុវត្ថិភាព។ នៅថ្ងៃចន្ទ ទី១មេសា បុគ្គលិកស្ម័គ្រចិត្ត៧នាក់របស់អង្គការក្រៅរដ្ឋាភិបាលអាមេរិកមួយឈ្មោះ World Central Kitchen ស្លាប់ នៅក្នុងការវាយប្រហារគ្រាប់ប្លោង នៅភាគកណ្តាលហ្កាហ្សា។ នៅក្នុងសេចក្តីប្រកាស នៅថ្ងៃអង្គារ អង្គការក្រៅរដ្ឋាភិបាល World Central Kitchenសំដែងការរន្ធត់ចិត្តខ្លាំង ដែលដឹងថា បុគ្គលិករបស់ខ្លួន ៧នាក់ស្លាប់នៅក្នុងការវាយប្រហាររបស់កងទ័ពអ៊ីស្រាអែល។
ក្រសួងសុខាភិបាលហាម៉ាស និយាយថា កងទ័ពអ៊ីស្រាអែលបានបាញ់ប្លោង វាយប្រហាររថយន្តរបស់អង្គការផ្តល់ជំនួយមនុស្សធម៌ World Central Kitchen។
យោងតាមអង្គការមនុស្សធម៌ World Central Kitchen ដែលមានទីតាំងនៅអាមេរិក ជនរងគ្រោះ៦នាក់ មានដើមកំណើតមកពីប្រទេសចំនួន ៥ ដូចជាអង់គ្លេស អូស្ត្រាលី ប៉ូឡូញ កាណាដា និងអាមេរិក រួមទាំងអ្នកបើករថយន្តជាតិប៉ាឡេស្ទីនម្នាក់ បានស្លាប់ នៅក្នុងពេលពួកគេកំពុងបំពេញបេសកកម្មផ្តល់ជំនួយមនុស្សធម៌ ដល់ប្រជាជនប៉ាឡេស្ទីន ដែលកំពុងជួបគ្រោះអត់ឃ្លានខ្លាំង នៅហ្កាហ្សា។
បង្កើតឡើងដោយមេចុងភៅអាមេរិក អេស៉្បាញ លោក José Andrés អង្គការក្រៅរដ្ឋាភិបាលអាមេរិក World Central Kitchenបានសហការជាមួយអង្គការក្រៅរដ្ឋាភិបាលអេស្ប៉ាញ Open Arms ដើម្បីដឹកស្បៀង ២០០តោន ជាអង្ករ ម្សៅ និងត្រីខកំប៉ុង ចេញពីកំពង់ផែប្រទេសស៊ីប ឆ្ពោះទៅកាន់ហ្កាហ្សា កាលពីពាក់កណ្តាលខែ មីនា។
នៅក្នុងសេចក្តីប្រកាស World Central Kitchenបញ្ជាក់ថា ដោយសារតែសោកនាដកម្មកាលពីថ្ងៃចន្ទ អង្គការសម្រេចផ្អាកប្រតិបត្តិការផ្តល់ជំនួយមនុស្សធម៌របស់ខ្លួន នៅក្នុងតំបន់។
នាយករដ្ឋមន្រ្តីអូស្ត្រាលីលោកអង់តូនី អាល់បាណេស នៅថ្ងៃចន្ទបញ្ជាក់ថា មានជនជាតិអូស្ត្រាលីម្នាក់រងគ្រោះស្លាប់នៅក្នុងការវាយប្រហារនៅហ្កាហ្សា។ ដូចរដ្ឋាភិបាលប៉ូឡូញ ប្រមុខរដ្ឋាភិបាលអូស្ត្រាលីទាមទារឲ្យរកមុខអ្នកទទួលខុសត្រូវលើវាយប្រហាររថយន្តដឹកបុគ្គលិកមនុស្សធម៌អូស្ត្រាលី។ អាមេរិកឯណោះវិញ តាមរយៈអ្នកនាំពាក្យរបស់ទីប្រឹក្សាសន្តិសុខជាតិ និយាយថា អាមេរិកខូចចិត្ត នឹងរន្ធត់ខ្លាំងជាបំផុត ដែលដឹងថា ការវាយប្រហាររបស់អ៊ីស្រាអែលបានសម្លាប់បុគ្គលិកមនុស្សធម៌យ៉ាងដូច្នេះ។ បើតាមអ្នកនាំពាក្យខាងលើ បុគ្គលិកអង្គការមនុស្សធម៌គួរតែត្រូវទទួលបានការការពារ ពីព្រោះ ពួកគេជាអ្នកនាំយកជំនួយ ដែលប្រជាជនប៉ាឡេស្ទីនកំពុងត្រូវការចាំបាច់។ ដូច្នេះ អាមេរិកទាមទារអ៊ីស្រាអែលត្រូវតែស៊ើបអង្កេតឲ្យបានម៉ត់ចត់បំផុត។
កងទ័ពអ៊ីស្រាអែល នៅថ្ងៃអង្គារនិយាយថា ខ្លួននឹងពិនិត្យមើលករណីនេះឲ្យបានស៊ីជម្រៅបំផុត ដើម្បីស្វែងយល់ពីឧប្បត្តិហេតុ ដែលមានស្លាប់បុគ្គលិកមនុស្សធម៌បរទេស។ កងទ័ពអ៊ីស្រាអែលនៅបានអះអាងថា ខ្លួននឹងបន្តសហការជាមួយអង្គការ World Central Kitchenនៅក្នុងការបន្តចែកជំនួយរបស់អង្គការ នៅហ្កាហ្សា។ ហ្កាហ្សាដែលកំពុងរងការវាយប្រហារដ៏សន្ធឹករបស់កងទ័ពអ៊ីស្រាអែល ៦ខែមកហើយ និងដែលកំពុងក្លាយជាទីវាលរហោឋាន មានប្រជាជនប៉ាឡេស្ទីន ស្លាប់ជាង ៣ម៉ឺននាក់ និងជាង១លាននាក់កំពុងជួបគ្រោះអត់ឃ្លាន ដោយសារតែអ៊ីស្រាអែលបិទខ្ទប់ការដឹកជញ្ជូនជំនួយមនុស្សធម៌តាមផ្លូវគោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ