អូស្ត្រាលីតែងតាំងទីប្រឹក្សាពិសេសដើម្បីធានាតម្លាភាពនៃការស៊ើបអង្កេតនៅហ្កាហ្សា
សង្គ្រាមនៅហ្កាហ្សា ឈានចូលខែទី៧ហើយ។ ៦ខែកន្លងទៅនេះ ប្រជាពលរដ្ឋប៉ាឡេស្ទីននៅតំបន់ហ្កាហ្សា ស្លាប់ស្ទើរជារៀងរាល់ថ្ងៃ អស់ជាង៣ម៉ឺននាក់ ព្រោះតែការវាយប្រហាររបស់ទាហានអ៊ីស្រាអែល ក្នុងហេតុផលតាមកម្ចាត់ក្រុមហាម៉ាស។ ប្រមុខការទូតអូស្ត្រាលី បានប្រកាសពីថ្ងៃសៅរ៍ទី៦មេសា ថារដ្ឋាភិបាលអូស្ត្រាលីនឹងចាត់តាំងទីប្រឹក្សាពិសេស ដើម្បីស៊ើបអង្កេតចំពោះការស្លាប់អ្នកធ្វើកិច្ចការមនុស្សធម៌ ៧ នាក់ ព្រោះតែការវាយប្រហារដ្រូនរបស់អ៊ីស្រាអែល។ ការចាត់តាំងអ្នកស៊ើបអង្កេតពិសេសនេះ បន្ទាប់ពីអ៊ីស្រាអែលបានផ្តល់មូលហេតុមួយចំនួន ប៉ុន្តែ អូស្ត្រាលី យល់ថា មិនគ្រប់គ្រាន់។
ចុះផ្សាយនៅថ្ងៃ៖
ស្តាប់ - ០៣:០៨
ក្នុងសន្និសីទសារព័ត៌មាន នៅរដ្ឋធានីកង់បេរ៉ា, លោកស្រី ផែន្នី វង្ស រដ្ឋមន្ត្រីការបរទេសអូស្ត្រាលី បញ្ជាក់ចំពោះមុខអ្នកកាសែត ថាអូស្ត្រាលីនឹងចាត់តាំងទីប្រឹក្សាពិសេសម្នាក់ ដើម្បីស៊ើបអង្កេតសំណុំរឿងករណីមរណភាពរបស់អ្នកធ្វើកិច្ចការមនុស្សធម៌អន្តរជាតិ ៧ រូប ដែលបានស្លាប់បាត់បង់ជីវិត ព្រោះតែការវាយប្រហារដ្រូនរបស់អ៊ីស្រាអែល កាលពីថ្ងៃចន្ទទី១មេសា។ ក្នុងចំណោមអ្នកធ្វើកិច្ចការមនុស្សធម៌ ដែលស្លាប់ទាំង ៧ នាក់ មានជនជាតិ អង់គ្លេស កាដាណា ប៉ូឡូញ ប៉ាឡេស្ទីន និង អូស្ត្រាលី។ ក្រោយពីហេតុការណ៍នេះ អ៊ីស្រាអែលបានសារភាពថាជា«កំហុសធ្ងន់» និងបានបញ្ឈរជើងអ្នកទទួលខុសត្រូវ ២ នាក់ ដែលជាអ្នកមើលការខុសត្រូវចំពោះការវាយប្រហារដ្រូនថ្ងៃនោះ។
ទោះជាយ៉ាងនេះក្តី រដ្ឋាភិបាលអូស្ត្រាលី នៅចង់បានស៊ើបអង្កេតដែលមាន«តម្លាភាពត្រឹមត្រូវ»ចំពោះការបាត់បង់ជីវិតពលរដ្ឋខ្លួន។ ការប្រកាសចាត់តាំងអ្នកស៊ើបអង្កេតពិសេស នៅពេលនេះ បន្ទាប់ពី អ៊ីស្រាអែល បានផ្តល់ព័ត៌មាននិងមូលហេតុមួយចំនួនដែរ តែ អូស្ត្រាលី អះអាងយ៉ាងច្បាស់ថា មិនគ្រប់គ្រាន់ដូចអ្វីដែលអូស្ត្រាលីរំពឹងរង់ចាំចង់បានទេ។ ចំពោះរដ្ឋបាលក្រុងកង់ប៉េរ៉ា, ទង្វើឧក្រិដ្ឋរបស់អ៊ីស្រាអែល បង្ហាញឲ្យឃើញច្បាស់ថា អ៊ីស្រាអែលបានរំលោភបំពាននឹងច្បាប់មនុស្សធម៌អន្តរជាតិ។ ទន្ទឹមនឹងគ្នានេះ លោក José Andrés ប្រធានមូលនិធិ World Center Kitchen ដែលទទួលកិច្ចការយកជំនួយស្បៀងមនុស្សធម៌ទៅចែកនៅតំបន់ហ្កាហ្សា បានថ្លែងប្រាប់វិទ្យុABCអូស្ត្រាលីថា ការវាយប្រហាររបស់អ៊ីស្រាអែលមិនមែនតាមកម្ទេចមនុស្សឃោរឃៅទេ តែជាសង្គ្រាមប្រឆាំងនឹងមនុស្សធម៌។
តុល្យការសង្គ្រាមនៅហ្កាហ្សា រយៈពេល ៦ ខែមកនេះ ខាងអ៊ីស្រាអែល ស្លាប់មនុស្សអស់ ជាង ១ ១០០ នាក់ ចំណែកខាងតំបន់ប៉ាឡេស្ទីន បើតាមអាជ្ញាធរសុខាភិបាលក្រុមហាម៉ាស មានជនរងគ្រោះ ស្លាប់ ប្រមាណជាង ៣៣ ០០០ នាក់។
កម្មវត្ថុចម្បងបំផុតរបស់ទាហានអ៊ីស្រាអែល ដែលនាយករដ្ឋមន្ត្រី បេនចាមិន នេតាន់យ៉ាហ៊ូ តែងតាំងអះអាងនោះ គឺការតាមកម្ទេចឫសគល់រចនាសម្ព័ន្ធក្រុមហាម៉ាស និង រំដោះចំណាប់ខ្មាំងអ៊ីស្រាអែលមកវិញ។ ប៉ុន្តែ បើតាមអ្នកវិភាគស្ថានការណ៍, វត្ថុបំណងនេះមិនអាចទៅរួចឡើយ ព្រោះថា សង្គ្រាមវាយប្រហារស្ទើររាល់ថ្ងៃ ៦ ខែហើយ មិនអាចជីករំលើងក្រុមហាម៉ាស ហើយការចរចារំដោះចំណាប់ខ្មាំង ក៏គ្មានបានលទ្ធផលច្រើនសោះ បើទោះបីជាមានសេចក្តីសម្រេចឲ្យឈប់បាញ់ ពីសំណាក់ក្រុមប្រឹក្សាសន្តិសុខអង្គការសហប្រជាជាតិ ហើយយ៉ាងណាក្តី។
សឹកចម្បាំងនៅហ្កាហ្សានេះ ក៏បានធ្វើឲ្យសង្គមអ៊ីស្រាអែលបែកបាក់ប្រេះឆាសាមគ្គីគ្នាដែរ។ បាតុកម្មច្រើនឡើងៗនៅបណ្តាទីប្រជុំជន ពិសេសនៅក្រុងហ្សេរ៉ូស្សាឡឹម និងក្រុងតេល-អាវ៉ីវ ដើម្បីទាមទារបញ្ចប់សង្គ្រាម, ទាមទារ ដោះលែងចំណាប់ខ្មាំង, ទាមទារឲ្យនាយករដ្ឋមន្ត្រី នេតាន់យ៉ាហូ ចុះចេញពីតំណែង ហើយនិងរៀបចំបោះឆ្នោតមុនអាណត្តិ។ ក្រុមអ្នកប្រឆាំងនឹងរដ្ឋាភិបាលអ៊ីស្រាអែល យល់ថា លោក នេតាន់យ៉ាហូ បន្តធ្វើសង្គ្រាម ព្រោះតែ ចង់នៅរក្សាអំណាចដឹកនាំអ៊ីស្រាអែលតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ