HRW៖ អេមីរ៉ាតអារ៉ាប់រួមរងខ្យល់ពុលខ្លាំងដោយឧស្សាហកម្មធ្យូងថ្ម
ក្នុងពេលដែលសន្និសីទអាកាសធាតុអង្គការសហប្រជាជាតិ កំពុងប្រព្រឹត្តទៅនៅក្នុងប្រទេសអេមីរ៉ាត់អារ៉ាប់រួម អង្គការការពារសិទ្ធិមនុស្សHuman Right Watch បានចោទប្រទេសម្ចាស់ផ្ទះថាបន្ថប់ការតស៊ូមតិស្តីពីគុណភាពខ្យល់។ ហើយបើតាមអង្គការ បរិមាណខ្យល់ពុលក្នុងកំរិតគួរប្រកាសអាសន្នដែលកំពុងកើតមាននៅក្នុងប្រទេសអេមីរ៉ាត់អារ៉ាប់រួម មួយផ្នែកបណ្តាលមកពីឧស្សាហកម្មផូស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
បើតាមទិន្នន័យប្រចាំខែកញ្ញា ខ្យល់បរិយាកាសនៅប្រទេសអេមីរ៉ាតអារ៉ាប់រួម មានកំរិតជាតិពុល ជាកំហាប់ធាតុល្អិតតូចឆ្មារPM2.5 ជិតបីដងលើសកំរិតសុវត្ថិភាពជាមធ្យមប្រចាំថ្ងៃ កំណត់ដោយអង្គការសុខភាពពិភពលោក។ សម្រាប់អាជ្ញាធរអេមីរ៉ាត គុណភាពខ្យល់ដ៏អាក្រក់ស្ទើរស្រែកអាសន្នបាននេះ បណ្តាលមកពីលម្អងដីនិងខ្សាច់ដែលតំបន់ទទួលរងគ្រោះជាញឹកញាប់ទេ។ ប៉ុន្តែបើតាមអង្គការការពារសិទ្ធិមនុស្សHuman Right Watch ការសិក្សានៅឆ្នាំ ២០២២ បានបង្ហាញឱ្យឃើញផ្ទុយពីនេះថា ផ្សែងពុលហុយចេញពីឧស្សាហកម្មផូស៊ីល ឧស្សាហកម្មបូមប្រេងនិងឧស្ម័ន មានចំណែកធំណាស់ក្នុងការធ្វើឱ្យខ្យល់បរិយាកាសឡើងពុលខ្លាំង។ ហើយអេមីរ៉ាតអារ៉ាប់រួម ដែលជាប្រទេសផលិតប្រេងឆៅលំដាប់ទី៧ពិភពលោក មានគម្រោងចំណាយទុនវិនិយោគ១៥០ពាន់លានដុល្លារពីពេលនេះដល់ឆ្នាំ២០២៧ដើម្បីបង្កើនសមត្ថភាពភាពបូមប្រេងនិងហ្កាស។
នៅក្នុងរបាយការណ៍ចេញផ្សាយនាថ្ងៃចន្ទទី ៤ធ្នូនេះអង្គការការពារសិទ្ធិមនុស្សបានបរិហាររដ្ឋាភិបាលអេមីរ៉ាតដែលកំពុងដឹកនាំពិភពលោក ដោះស្រាយវិបត្តិអាកាសធាតុនិងសុខភាពនៅក្នុងសន្និសីទអង្គការសហប្រជាជាតិស្តីពីអាកាសធាតុCOP28ថា ផលិតកម្មប្រេងនិងឧស្ម័នរបស់អេមីរ៉ាតអារ៉ាប់រួម បានចូលរួមបង្កើនខ្យល់ពុលក្នុងបរិយាកាសដែលប៉ះពាល់យ៉ាងខ្លាំងដល់សុខភាពមនុស្ស។ តែដោយហេតុតែគំនាបរបស់អាជ្ញាធរលើសង្គមស៊ីវិល ទើបគ្មាននរណាម្នាក់ហ៊ានបញ្ចេញ ក្តីព្រួយបារម្ភ និងឬមតិយោបល់ រិះគន់អំពីអសមត្ថភាពរបស់រដ្ឋាភិបាលក្នុងការទប់ស្កាត់គ្រោះថ្នាក់។ នេះបើតាមរបាយការណ៍HRW និងមិនមែនជាលើកទីមួយទេដែលអេមីរ៉ាតអារ៉ាប់រួមរងការរិះគន់។ អង្គការការពារសិទ្ធិមនុស្សធ្លាប់ចង្អុលមុខអេមីរ៉ាតអារ៉ាប់រួមជាញឹកញាប់មកហើយទាក់ទងនឹងបញ្ហាបំបិទសេរីភាពនៃការបញ្ចេញមតិនិងបង្ក្រាបសកម្មជនប្រឆាំងនោះ។
អេមីរ៉ាតលាក់បាំងព័ត៌មានស្តីពីខ្យល់ពុលក្នុងបរិយាកាសយ៉ាងជិតឈឹង។ នេះបើតាមការគូសបញ្ជាក់របស់លោកRichard Pearhouse នាយកបរិស្ថានរបស់HRW នៅក្នុងរបាយការណ៍ដោយអំពាវនាវឱ្យអាជ្ញាធរអេមីរ៉ាតមានតម្លាភាពនិងដាក់ផែនការដើរចេញពីថាមពលផូស៊ីល។
របាយការណ៍របស់អង្គការHuman Right Watch ជាលទ្ធផលនៃការសាកសួរអ្នកវិទ្យាសាស្ត្រ អ្នកជំនាញ និងសកម្មជន ព្រមទាំងសក្ខីកម្មដែលប្រមូលបានក្រុមពលករអន្តោប្រវេសន៍ អ្នកប្រឈមខ្លាំងនឹងហានិភ័យខ្យល់ពុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ