ជនជាតិភាគតិចលើកោះប័រណេអូនឹងរងគ្រោះ ដោយសារការរើផ្លាស់ទីរដ្ឋធានីរបស់ឥណ្ឌូណេស៊ី
ការរើផ្លាស់ទី លើករដ្ឋធានីទៅនៅលើកោះប័រណេអូនឹងជំរុញឲ្យមានរលកបណ្តេញចេញ ប្រជាជនភាគតិច យ៉ាងតិច ២ម៉ឺននាក់។ នេះជាការព្រមានរបស់អង្គការសម្ព័ន្ធជនជាតិភាគតិច នៃប្រជុំកោះ នៅ ៣ថ្ងៃក្រោយ រដ្ឋសភាឥណ្ឌូណេស៊ីបានបោះឆ្នោតយល់ព្រមឲ្យមានការផ្ទេររ រើរដ្ឋធានីរដ្ឋបាលចេញពីហ្សាការតា ទៅកាន់កោះប័រណេអូ។ រដ្ឋាភិបាលឥណ្ឌូណេស៊ី របស់លោកប្រធានាធិបតី ហ្សូកូវីដូដូបានស្នើឲ្យគេរើទីក្រុងរដ្ឋបាលចេញពីហ្សាការតា ក្នុងហេតុផលថា រដ្ឋធានីចាស់របស់ឥណ្ឌូណេស៊ី ខ្វះហេដ្ឋារចនាសម្ព័ន្ធ សំបូរដោយខ្យល់ពុល និងឧស្សាហ៍លិចទឹក។
ចុះផ្សាយនៅថ្ងៃ៖
ស្តាប់ - ០២:២៣
សម្រាប់អង្គការសម្ព័ន្ធប្រជាជនភាគតិច របស់កោះប័រណេអូ មនុស្សយ៉ាងតិច២ម៉ឺននាក់ មកពីក្រុមជនជាតិភាគតិចចំនួន ២១ក្រុម នឹងត្រូវប្រឈមនឹងការបណ្តេញចេញពីដីភូមិ ដើម្បីទុកដីសម្រាប់គម្រោងសាងសង់អនាគតរដ្ឋធានីថ្មីរបស់ឥណ្ឌូណេស៊ី។
នៅថ្ងៃអង្គារដើមសប្តាហ៍នេះ រដ្ឋសភាឥណ្ឌូណេស៊ីបានបោះឆ្នោតអនុញ្ញាតឲ្យគេសាងសង់រដ្ឋធានីថ្មីរបស់ឥណ្ឌូណេស៊ី នៅក្នុងខេត្តកាលីម៉ាន់តានខាងកើត នៅលើកោះប័រណេអូ។ នូសាន់តារ៉ា ដែលមានន័យថា “ប្រជុំកោះ” នឹងក្លាយជារដ្ឋធានីរដ្ឋបាលថ្មីរបស់ឥណ្ឌូណេស៊ី ចំណែក ហ្សាការតាត្រូវបានរដ្ឋាភិបាលរក្សាទុកត្រឹមទីក្រុងសេដ្ឋកិច្ច។
គម្រោងសាងសង់រដ្ឋធានីថ្មី ដែលមានតម្លៃជាង ៣៣ពាន់លានដុល្លារ នឹងគ្របដណ្តប់លើដែនដីព្រៃ ៥៦ ១៨០ហិចតានៅលើកោះប័រណេអូ។ ជាសរុប គេ ត្រូវការផ្ទៃដីច្រើនជាង ២៥៦ ០០០ហិចតាសម្រាប់គម្រោងពង្រីករដ្ឋធានីទៅថ្ងៃអនាគត។
សម្រាប់អង្គការការពារសិទ្ធិជនជាតិភាគតិច គម្រោងរើទីក្រុងរដ្ឋបាលទៅនៅលើកោះប័រណេអូនឹងបង្កឲ្យមានបញ្ហាពីរ គឺការរឹបអូសយកដីភូមិរបស់ប្រជាជនភាគតិច និងការចាប់ចង ចោទប្រកាន់ជនជាតិភាគតិច ពីបទប្រព្រឹត្តឧក្រិដ្ឋកម្ម នៅពេលពួកគេតវ៉ាដើម្បីការពារសិទ្ធិរស់នៅលើដីចំការរបស់ពួកគេ។ សហគមន៍ប្រជាជនភាគតិចនៅលើកោះប័រណេអូ កំពុងជួបប្រទះ បញ្ហានៅចំពោះមុខរួចហើយ ដូចជាជម្លោះជាមួយក្រុមហ៊ុនឯកជន ដែលបានទទួលកិច្ចសន្យាវិនិយោគធ្វើចំការលើដីព្រៃ ជាង ៣ម៉ឺនហិចតារបស់ប្រជាជនភាគតិច។
ការរើផ្លាស់ទី រដ្ឋធានីថ្មី ទៅលើលើកោះប័រណេអូ មិនត្រឹមតែ ធ្វើឲ្យប្រជាជនភាគតិចបាត់បង់ការងារ ដីចំការធ្វើកសិកម្មសម្រាប់ចិញ្ចឹមជីវិត និងវប្បធម៌តែប៉ុណ្ណោះទេ ប៉ុន្តែ វានឹងប៉ះពាល់ផងដែរ ដល់ប្រព័ន្ធជីវចម្រុះ របស់កោះប័រណេអូ ដែលជាជម្រកព្រៃត្រូពិកដ៏ធំមួយ នៅលើលោក។ ក្រុមអ្នកការពារបរិស្ថានធ្លាប់បានប្រឆាំងនឹងគម្រោងរើរដ្ឋធានីទៅលើកោះប័រណេអូ ក្នុងហេតុផលថា ការសាងសង់ទីក្រុងរដ្ឋបាលនឹងទៅបំពុលបំផ្លាញបរិស្ថានមួយកម្រិតបន្ថែមទៀតនៅក្នុងខណៈពេលដែល ក្រុមហ៊ុនជីករ៉ែ និងក្រុមហ៊ុនដាំដូងប្រេងកំពុងកាប់បំផ្លាញ ព្រៃត្រូពិកនៅប័រណេអូដែលជាជំរកដ៏សំខាន់ របស់សត្វស្វា Orangs Outans ដែលជាប្រភេទសត្វប្រឈមនឹងការរលាយផុតពូជ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ