ប៉េកាំងសុំឲ្យឈប់បាញ់ ក្រោយសម្ព័ន្ធជនជាតិភាគតិចភូមាដណ្តើមបានក្រុងយុទ្ធសាស្ត្រជាប់ព្រំដែនចិន
របបសឹកភូមាកំពុងចាញ់លើសមរភូមិប្រយុទ្ធជាមួយក្រុមប្រដាប់អាវុធជនជាតិភាគតិចនៅភាគខាងជើងប្រទេស ដោយរបូតក្រុងយុទ្ធសាស្ត្រជាប់ព្រំដែនចិនពីដៃ។ នេះបើតាមសេចក្តីប្រកាសរបស់អ្នកនាំពាក្យរដ្ឋាភិបាលភូមា។ ក្នុងស្ថានភាពបែបនេះ ចិនបានចេញសេចក្តីអំពាវនាវភ្លាមឱ្យភាគីទាំងពីរបញ្ឈប់ការប្រយុទ្ធគ្នា។
ចុះផ្សាយនៅថ្ងៃ៖
ស្តាប់ - ០២:៤០
នៅក្នុងសារសំឡេង អ្នកនាំពាក្យរដ្ឋាភិបាលសឹកភូមា បានអះអាង រដ្ឋាភិបាល ស្ថាប័នរដ្ឋបាល និងកងកម្លាំងរក្សាសន្តិសុខបានដកចេញពីក្រុងChinshwehaw ដែលស្ថិតជាប់របងខេត្តយូណានរបស់ចិនអស់រលីងហើយ។ ៦ថ្ងៃចុងក្រោយមកនេះ សម្ព័ន្ធជនជាតិភាគតិចប្រដាប់អាវុធបីក្រុមបានរួមដៃគ្នាបើកការវាយប្រហារនិងប្រយុទ្ធជាមួយកងកម្លាំងយោធាភូមានៅ១០កន្លែងផ្សេងគ្នា នៃរដ្ឋShan ភាគខាងជើង។ នេះបើតាមអ្នកនាំពាក្យរដ្ឋាភិបាលសឹកភូមាដដែលដោយមិនលម្អិតព័ត៌មានទាក់ទងនឹងចំនួនជនរងគ្រោះទេ។
សម្ព័ន្ធប្រដាប់អាវុធជនជាតិភាគតិចបី គឺក្រុមប្រដាប់អាវុធរំដោះជាតិTaaung (TNLA) ក្រុមប្រដាប់អាវុធអារ៉ាកាន (AA) និងសម្ព័ន្ធប្រជាធិបតេយ្យជាតិភូមា (MNDAA) បានចងមេត្រីភាពរួមដៃគ្នាប្រមូលកម្លាំងប្រយុទ្ធបានប្រមាណយ៉ាងហោច១៥០០០នាក់។ សម្ព័ន្ធបានប្រកាសតាំងពីថ្ងៃចន្ទទី៣០តុលា២០២៣ ដណ្តើមកាន់កាប់បាននូវទីតាំងយោធាភូមាជាច្រើន និងត្រួតត្រាផ្លូវយុទ្ធសាស្ត្រសម្រាប់ផ្តោះប្តូរពាណិជ្ជកម្មជាមួយចិនដែលជាដៃគូដ៏ចម្បងរបស់ភូមា។
ជម្លោះប្រដាប់អាវុធនេះ បានបង្កឱ្យមនុស្សជាង៦ពាន់នាក់ធ្វើបំលាស់ទី និងជាច្រើនពាន់នាក់ទៀតណាស់ភៀសខ្លួនទៅប្រទេសចិន។ នេះបើតាមការព្រមានរបស់អង្គការសហប្រជាជាតិកាលពីថ្ងៃចន្ទ។ ប៉ុន្តែអ្នកជំនាញមិនអាចផ្ទៀងផ្ទាត់តួលេខជនរងគ្រោះដែលភាគីជម្លោះម្ខាងបន្ទាបម្ខាងបំប៉ោងទេ។ ក្រុមជាតិពិន្ធុប្រដាប់អាវុធថាមានអ្នករបួស ស្លាប់និងចាប់ខ្លួនជាប់ក្នុងដៃ យោធាជាច្រើនសិបនាក់ តែភ្នាក់ងារសារព័ត៌មានបារាំងAFP មិនអាចទាក់ទងបញ្ជាក់បានទេ។
ក្រុមប្រដាប់អាវុធជនជាតិភាគតិចនេះ បានតស៊ូប្រឆាំងនឹងរដ្ឋាភិបាលកណ្តាលភូមាតាំងពីជាច្រើនទសវត្សរ៍មកហើយដើម្បីការពារស្វ័យភាពនិងការគ្រប់គ្រងធនធានធម្មជាតិនៃរដ្ឋShan ដែលស្ថិតជាប់ព្រំដែនចិន។ ហេតុដូច្នេះហើយបានជាចិនព្រួយបារម្ភយ៉ាងខ្លាំង និងចេញសេចក្តីអំពាវនាវនៅថ្ងៃព្រហស្បតិ៍នេះ ឱ្យភាគីទាំងពីរបញ្ឈប់ការប្រយុទ្ធគ្នាជាបន្ទាន់ ហើយងាកមកដោះស្រាយជម្លោះដោយសន្តិវិធី។ ចិនជាប្រទេសតែមួយគត់ដែលបន្តមានទំនាក់ទំនងមាំមួនជាមួយរបបសឹកភូមា តែប៉េកាំងក៏រក្សាចំណងទាក់ទងល្អជាមួយក្រុមប្រដាប់អាវុធជនជាតិភាគតិចភូមានៅជាប់ព្រំដែនដែរ។ កាលពីថ្ងៃអង្គារទី ១វិច្ឆិកា រដ្ឋមន្ត្រីក្រសួងសន្តិសុខសាធារណៈចិន បានជួប លោក មីន អ៊ុងឡាំង ប្រមុខដឹកនាំរបបសឹកភូមា នៅក្រុងណៃពិដដើម្បីពិភាក្សាអំពីទង្វើវាយប្រហាររបស់ក្រុមឧទ្ទាមប្រដាប់អាវុធដែលបង្កការប៉ះពាល់យ៉ាងខ្លាំងដល់សន្តិភាពនិងស្ថិរភាពតំបន់។ នេះបើតាមសម្រង់ព័ត៌មានចុះផ្សាយក្នុងសារព័ត៌មានរដ្ឋភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ