ភូមា ក្លាយជាប្រទេសផលិតអាភៀនទី១លើពិភពលោក និង វ៉ាដាច់ អាហ្វហ្កានីស្ថាន
ប៉ុន្មានឆ្នាំថ្មីៗនេះ ភូមា បានបង្កើនដីដាំអាភៀនយ៉ាងខ្លាំង។ ឆ្នាំ២០២៣ ភូមា ក្លាយជាប្រទេសទី១ ឈាននាំមុខគេលើពិភពលោក ខាងផលិតអាភៀន និងបានវ៉ាដាច់នាំមុខប្រទេស អាហ្វហ្កានីស្ថាន ទៀតផង គឺបន្ទាប់ពីពួករដ្ឋអំណាចតាលីបង់កាត់បន្ថយការផលិតអាភៀន។ បើធៀបក្នុងរយៈពេល ២ ទសវត្សរ៍ចុងក្រោយនេះ គឺគ្រាន់តែមួយឆ្នាំ២០២៣ ភូមា បានផលិតអាភៀនក្នុងចំនួនច្រើនជាងឆ្នាំណាៗទាំងអស់។ នេះបើតាមរបាយការណ៍របស់ ការិយាល័យប្រឆាំងឧក្រិដ្ឋកម្មគ្រឿងញៀន នៃ អង្គការសហប្រជាជាតិ ចេញផ្សាយថ្ងៃអង្គារ ទី១២ ធ្នូ។
ចុះផ្សាយនៅថ្ងៃ៖
ស្តាប់ - ០២:៤៧
ភូមា ជាបងធំមួយនៃ«តំបន់ត្រីកោណមាស» ជង្រុកធំនៃអាភៀន និងគ្រឿងញៀនក្នុងតំបន់អាស៊ីអាគ្នេយ៍។ «តំបន់ត្រីកោណមាស» មានបីប្រទេស ថៃ ឡាវ និង ភូមា។ ភូមា ផលិតអាភៀនបានប្រមាណ ១ ០៨០ តោន ក្នុងឆ្នាំ២០២៣ គឺច្រើនជាងឆ្នាំ ២០២២ ដែលមានប្រមាណតែ ៧៩០ តោន។ នេះបើតាមរបាយការណ៍អង្កេតរបស់ ការិយាល័យប្រឆាំងឧក្រិដ្ឋកម្មគ្រឿងញៀន នៃ អង្គការសហប្រជាជាតិ និងដែលបានប៉ាន់ប្រមាណថា អាភៀន បាននាំប្រាក់ចំណូលដល់សេដ្ឋកិច្ចជាតិភូមា ក្នុងរង្វង់ចន្លោះ ពី ១ ទៅ ២,៤ ពាន់លានដុល្លារ ពោលគឺអាចស្មើនឹង ចន្លោះពី ១,៧% ទៅ ៤,១% នៃប្រាក់ចំណូលក្នុងស្រុកសរុប។ អង្គការសហប្រជាជាតិ ក៏បានគូសបញ្ជាក់ថា គ្រាន់តែមួយឆ្នាំ២០២៣ ភូមា បានផលិតអាភៀនក្នុងចំនួនច្រើនជាងឆ្នាំណាៗទាំងអស់ បើធៀបនឹងរយៈពេល២០ឆ្នាំចុងក្រោយនេះ។
របបសឹកភូមា ឡើងកាន់អំណាចដោយរដ្ឋប្រហារ នៅឆ្នាំ២០២១។ ដូច្នេះ សេដ្ឋកិច្ចជាតិភូមា ជាប់គាំង អស្ថិរភាព និងជួបការរលំបាកក្នុងចូលទីផ្សារអន្តរជាតិ។ ហេតុដូច្នេះហើយ ទើបរបបសឹកយោធា បានជំរុញឲ្យអ្នកវិនិយោគនិងប្រជាកសិករនាំគ្នាដាំអាភៀនឲ្យកាន់តែច្រើន។
នៅភូមា ទំហំដីដាំ អាភៀន មានប្រមាណ ៤១ ៣០០ ហិកតា ស្មើនឹង ១ភាគ៣ នៃផ្ទៃដីដំណាំកសិកម្ម ហើយ ដីដាំអាភៀន ប្រមាណ ៩០% គឺឋិតនៅក្នុងរដ្ឋស្ហាន (Shan) ប៉ែកខាងជើងប្រទេស ដែលគ្រប់គ្រងដោយក្រុមយោធារបបសឹក។ រដ្ឋស្ហាននេះ ក៏ជាទីដែលចម្រូងចម្រាស់រវាងក្រុមកម្លាំងប្រដាប់អាវុធ ជនជាតិភាគតិច និងកម្លាំងរដ្ឋអំណាចរបបសឹក។
នៅរដ្ឋស្ហាន ប៉ែកខាងកើតវិញ ចរន្តផលិតកម្មអាភៀនបានកើនឡើង ស្ទើរតែ៥០%។ ឆ្នាំ២០២២ ជាមធ្យម ផ្ទៃដី ១ ហិកតា ផលិតបានអាភៀន ជិត ២០ គីឡូក្រាម ក៏ប៉ុន្តែ ក្នុងឆ្នាំ២០២៣ វាកើនឡើងដល់ជិត ៣០ គីឡូក្រាម ឯណោះ ក្នុង ១ ហិកតា។ នេះក៏ព្រោះតែ ភូមា បានខំបង្កើនការវិនិយោគទុន បង្កើនបច្ចេកទេសផលិត និងដាក់ជីបំប៉ន់បន្ថែម ជាដើម។
អ្នកវិភាគជាច្រើន មើលឃើញថា របបសឹកភូមា គ្មានចេតនានឹងទប់ស្កាត់ជំនួញពាណិជ្ជកម្មអាភៀនទេ។ មន្ត្រីជាន់ខ្ពស់ភូមា ជាប្រធានការិយាល័យកណ្តាលប្រឆាំងសារធាតុញៀន ក៏ធ្លាប់បានទទួលស្គាល់ថា យុទ្ធនាការប្រឆាំងគ្រឿងញៀន ហាក់ដូចជាគ្មានប្រសិទ្ធភាពឡើយ នៅភូមា។
ភូមា នៅទីបំផុត បានក្លាយជាប្រទេសនាំចេញអាភៀនទី១លើពិភពលោក និង វ៉ាដាច់ អាហ្វហ្កានីស្ថាន។ នេះក៏ព្រោះតែ អាហ្វហ្កានីស្ថាន ក្រោមកណ្តាប់ដៃពួករដ្ឋអំណាចតាលីបង់ បានហាមឃាត់ជំនួញអាភៀន ហើយនិងកាត់បន្ថយផ្ទៃដីដាំអាភៀនយ៉ាងគំហុក។ ជាក់ស្តែង ក្នុងឆ្នាំ២០២២ ដីដាំអាភៀនរបស់អាហ្វហ្កានីស្ថាន មានចំនួន ២៣៣ ០០០ ហិកតា ប៉ុន្តែ ដល់ជិតដាច់ឆ្នាំ២០២៣នេះ ទំហំដីដាំអាភៀន នៅអាហ្វហ្កានីស្ថាន បានធ្លាក់ចុះខ្លាំង មកត្រឹមតែជាង ១ម៉ឺនហិកតា តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ