នាយករដ្ឋមន្ត្រីអ៊ុយក្រែនទៅជប៉ុនដើម្បីជំរុញការស្ថាបនាប្រទេសឡើងវិញ
នៅថ្ងៃចន្ទទី ១៩ កុម្ភៈ២០២៤នេះ លោកនាយករដ្ឋមន្ត្រីអ៊ុយក្រែន បានអំពាវនាវពីទីក្រុងតូក្យូហៅជប៉ុននិងក្រុមហ៊ុនឯកជននានាឱ្យនាំគ្នាទៅធ្វើនិយោគនៅក្នុងប្រទេសអ៊ុយក្រែន ក្រោយចប់សង្គ្រាមជាមួយរុស្ស៊ី។ ប្រមុខរដ្ឋាភិបាលក្រុងកៀវធានាថា ក្រុមហ៊ុនដែលចូលរួមស្ថាបនាអ៊ុយក្រែនពេលនេះ នឹងទទួលផលចំណេញនិងសំណាងដ៏សម្បើមនៅប៉ុន្មានឆ្នាំខាងមុខ។
ចុះផ្សាយនៅថ្ងៃ៖
ស្តាប់ - ០២:៣៩
នាយករដ្ឋមន្ត្រីអ៊ុយក្រែនលោកដេនីស ស្មីហាល់ Denys Chmygal កំពុងបំពេញទស្សនកិច្ចនៅក្រុងតូក្យូប្រទេសជប៉ុន។ ក្នុងសន្និសីទជាមួយតំណាងរដ្ឋាភិបាលជប៉ុននិងវិនិយោគិនជប៉ុន-អ៊ុយក្រែន លោកនាយរដ្ឋមន្ត្រីDenys Chmygal បានគូសបញ្ជាក់ថា ជប៉ុនជាដៃគូហិរញ្ញវត្ថុលំដាប់ទីបួនសម្រាប់អ៊ុយក្រែន ដោយតាំងពីផ្ទុះសង្គ្រាមជាមួយរុស្ស៊ីមក ជប៉ុនបានផ្តល់ជំនួយផ្សេងៗបើគិតជាទឹកប្រាក់ស្មើនឹងជាង១០ពាន់លានដុល្លារ។ ហេតុដូច្នេះហើយបានជាអ៊ុយក្រែនចង់ឱ្យជប៉ុនមានចំណែកទទួលផលពីសន្ទុះសេដ្ឋកិច្ចដ៏ខ្លាំងក្លា នៃការធ្វើទំនើបកម្មនិងស្ថាបនាប្រទេសឡើងវិញ ក្រោយចប់សង្គ្រាម។
ថាមពល ហេដ្ឋារចនាសម្ព័ន្ធ ឧស្សាហកម្មរថយន្ត បច្ចេកវិទ្យាឌីជីថល និងការទាញធនធានធម្មជាតិដូចយ៉ាងលីចូម ជាវិស័យធំ៥ ដែលអ៊ុយក្រែនមានសក្តានុពលធ្វើកិច្ចសហប្រតិបត្តិការសេដ្ឋកិច្ចជាមួយជប៉ុន។ នេះបើតាមការរៀបរាប់របស់លោកប្រមុខរដ្ឋាភិបាលអ៊ុយក្រែន ដែលបញ្ជាក់ទៀតថា ក្រុមហ៊ុនចូលទៅធ្វើវិនិយោគនៅអ៊ុយក្រែននាពេលនេះអាចនឹងទទួលផលចំណេញនិងឱកាសដ៏មហាសាលនាឆ្នាំខាងមុខ ព្រោះវិស័យឯកជនគឺជាក្បាលម៉ាស៊ីនបំប៉នកិច្ចខិតខំប្រឹងប្រែងស្តារអ៊ុយក្រែនឡើងវិញ។
ដើម្បីស្ថាបនានិងស្តារសេដ្ឋកិច្ចឡើងវិញ អ៊ុយក្រែនត្រូវការថវិកាច្រើនខ្លាំងណាស់ និងកាន់តែច្រើនឡើងជាលំដាប់។ បើតាមការវាយតម្លៃរបស់ធនាគារពិភពលោក អង្គការសហប្រជាជាតិ សហភាពអឺរ៉ុបនិងក្រុងគៀវផ្ទាល់ អ៊ុយក្រែនត្រូវការដល់ទៅ៤៨៦ពាន់លានដុល្លារ ពោលគឺ៧៥ពាន់លានដុល្លារលើសតម្លៃព្យាករលើកមុន (មីនា២០២៣)។
នៅថ្ងៃចន្ទនេះ អ៊ុយក្រែននិងជប៉ុនក៏បានចុះកិច្ចព្រមព្រៀងផ្សេងៗ ស្តីពីការស្ថាបនាហេដ្ឋារចនាសម្ព័ន្ធ និងកសិកម្មរបស់អ៊ុយក្រែនឡើងវិញ ព្រមទាំងការដោះមីន។ នាយករដ្ឋមន្ត្រីជប៉ុន បានសន្យាជួយនិងបន្តនៅក្បែរអ៊ុយក្រែនជារៀងរហូត ប៉ុន្តែដោយមានរដ្ឋធម្មនុញ្ញសន្តិនិយម ជប៉ុនផ្តោតការគាំទ្រតែលើផ្នែកមនុស្សធម៌ សេដ្ឋកិច្ចនិងការស្តារប្រទេសឡើងវិញ បន្ថែមពីលើការចូលរួមដាក់ទណ្ឌកម្មរុស្ស៊ីជាមួយបណ្តាប្រទេសមហាអំណាចនៃក្រុមហ្សេ៧។
ទស្សនកិច្ចរបស់លោកនាយករដ្ឋមន្ត្រីអ៊ុយក្រែននៅជប៉ុន ប្រព្រឹត្តទៅក្នុងខណៈដែលប្រទេសកំពុងជួយការលំបាកយ៉ាងខ្លាំងនៅលើសមរភូមិ និងបាត់បង់ Avdiïvka ក្រុងឧស្សាហកម្មនៅភាគខាងកើតប្រទេស ដោយហេតុតែមិនអាចស៊ូតតាំងនឹងការវាយប្រហាររបស់រុស្ស៊ីបាន។ តាំងពីប៉ុន្មានខែចុងក្រោយមកនេះ អ៊ុយក្រែនខ្វះអាវុធយុទ្ធភណ្ឌកាន់តែខ្លាំងឡើងៗ។ ជំនួយយោធាមកពីបស្ចិមលោកកាន់តែស្តួចស្តើង ហើយសភាអាមេរិកនៅតែមិនព្រមទម្លាយកញ្ចប់ថវិកាជំនួយសម្រាប់អ៊ុយក្រែនដដែល។ តែចិនបានធានាអះអាងថា ប៉េកាំងមិនឆ្លៀតយកចំណេញ ដោយលក់អាវុធប្រល័យជីវិតទៅឱ្យរុស្ស៊ីទេ។ នេះជាប្រសាសន៍របស់លោកប្រមុខការទូតចិនទៅកាន់សមភាគីអ៊ុយក្រែនកាលពីថ្ងៃសៅរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ