រុស្ស៊ីយល់ព្រមបើកច្រកផ្លូវមនុស្សធម៌ តែអ៊ុយក្រែនបដិសេធមិនបញ្ជូនប្រជាជនរបស់ខ្លួនទៅរុស្ស៊ី
កងទ័ពរុស្ស៊ីបានប្រកាសនៅថ្ងៃចន្ទ ទី៧ មីនា ពីការអនុវត្តបទឈប់បាញ់ដើម្បីបើកច្រកផ្លូវមនុស្សធម៌ និងការជម្លៀសប្រជាជនស៊ីវិលចេញពីទីក្រុងដែលកំពុងរងការវាយប្រហាររបស់រុស្ស៊ី។ ប៉ុន្តែ ឧបនាយករដ្ឋមន្រ្តីអ៊ុយក្រែន លោកស្រី Iryna Verechtchouk បានបដិសេធមិនទទួលយកច្រកផ្លូវមនុស្សធម៌របស់រុស្ស៊ី ដែលមានគោលដៅបង្វែរជម្លៀសប្រជាជនអ៊ុយក្រែន ចូលទៅក្នុងទឹកដីរុស្ស៊ី និងបេឡារុស ដែលជាសម្ព័ន្ធមិត្តរបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០២:៣០
ក្រសួងការពារជាតិរុស្ស៊ីបានប្រកាសនៅថ្ងៃចន្ទនេះថា កងទ័ពរុស្ស៊ីនឹងអនុវត្តបទឈប់បាញ់ និងបើកច្រកផ្លូវមនុស្សធម៌សម្រាប់ជម្លៀសប្រជាជនស៊ីវិលដែលកំពុងនៅជាប់គាំង នៅតាមទីក្រុងដែលជាផ្ទាំងស៊ីបវាយប្រហាររបស់កងទ័ពរុស្ស៊ី។
តាមកងទ័ពរុស្ស៊ី ម៉ូស្គូបានយល់ព្រមឲ្យបើកច្រកផ្លូវមនុស្សធម៌ ដោយមកពីមានការទទូចសុំផ្ទាល់ពីប្រធានាធិបតីបារាំង លោកម៉ាក្រុង នៅក្នុងអំឡុងកិច្ចសន្ទនាតាមទូរស័ព្ទជាមួយប្រធានាធិបតីរុស្ស៊ី លោកពូទីន កាលពីយប់ថ្ងៃអាទិត្យ។
ទីក្រុងកៀវ ខាកៀវ ទីក្រុងស៊ូមី (Soumy) ដែលកំពុងឡោមព័ទ្ធដោយកងទ័ពរុស្ស៊ី និងទីក្រុងកំពង់ផែ ម៉ារីយ៉ូប៉ូល ដែលត្រូវបំផ្លាញខ្ទេចខ្ទាំ ដោយសារគ្រាប់មីស៊ីល គ្រាប់ផ្លោងរបស់កងទ័ពរុស្ស៊ី ស្ថិតក្នុងផែនការជម្លៀសបន្ទាន់ ដែលស្នើឡើងដោយភាគីរុស្ស៊ី។ កាលពីថ្ងៃអាទិត្យ ដំណើរការជម្លៀសប្រជាជនស៊ីវិលចេញពីទីក្រុងម៉ារីយ៉ូប៉ូលត្រូវអាក់ខានទៅវិញ បន្ទាប់ពីកងទ័ពរុស្ស៊ីរំលោភបទឈប់បាញ់ ជាច្រើនដង។ តើកងទ័ពរុស្ស៊ីនឹងរំលោភបទឈប់បាញ់ ដូចលើកមុនៗ? នៅពេលគេមិនទាន់ឃើញច្បាស់ជំហររបសរុស្ស៊ី ភាគីអ៊ុយក្រែន តាមរយៈ ឧបនាយករដ្ឋមន្រ្តី អ៊ុយក្រែនបានបដិសេធ នៅថ្ងៃចន្ទនេះ មិនទទួលយកច្រកផ្លូវមនុស្សធម៌ របស់រុស្ស៊ី ដែលមានដាក់លក្ខខណ្ឌ បញ្ជូនចេញ ប្រជាជនស៊ីវិលអ៊ុយក្រែន ទៅកាន់ទឹកដីរុស្ស៊ី។
តាមផែនទីស្តីពី ច្រកផ្លូវមនុស្សធម៌ ដែលទីភ្នាក់ងារព័ត៌មានរុស្ស៊ី RIA ចុះផ្សាយនៅថ្ងៃចន្ទ ប្រជាជនស៊ីវិលដែលចង់ចាកពីទីក្រុងកៀវ នឹងត្រូវធ្វើដំណើរទៅកាន់ប្រទេសបេឡារុស សម្ព័ន្ធមិត្តរបស់រុស្ស៊ី មុននឹងត្រូវយន្តហោះរុស្ស៊ី មកដឹកយកទៅប្រទេសរុស្ស៊ី។ ប្រជាជននៅខារកៀវ ទីក្រុងធំទី២របស់អ៊ុយក្រែន ត្រូវបញ្ជូនទៅកាន់ទឹកដីរុស្ស៊ី។ ចំណែកច្រកផ្លូវមនុស្សធម៌ពីទីក្រុងកំពង់ផែ ម៉ារីយ៉ូប៉ូល នឹងតភ្ជាប់ទៅខាងទឹកដីរុស្ស៊ីផង និងទៅកាន់ទីក្រុងផ្សេងទៀតរបស់អ៊ុយក្រែន ដែលមិនទាន់រងការវាយប្រហារធ្ងន់ធ្ងរពីសំណាក់កងទ័ពរុស្ស៊ី។
១២ថ្ងៃមកហើយ ដែលកងទ័ពរុស្ស៊ីធ្វើសង្រ្គាមឈ្លានពានទឹកដីអ៊ុយក្រែន។ រដ្ឋាភិបាលអ៊ុយក្រែនបានចោទប្រកាន់រុស្ស៊ីថាកំពុងប្រព្រឹត្តឧក្រិដ្ឋកម្មសង្រ្គាមយ៉ាងធ្ងន់ធ្ងរ ដោយបានបាញ់មីស៊ីល គ្រាប់ផ្លោងសំដៅ សាលារៀន មន្ទីរពេទ្យ និងលំនៅឋានប្រជាជនស៊ីវិល។ តាមអង្គការសហប្រជាជាតិ នៅក្នុងរយៈពេល ជាង ១០ថ្ងៃ សង្រ្គាមអ៊ុយក្រែនបានបង្ខំឲ្យប្រជាជនជាង ១លាន ៥សែននាក់ រត់ភៀសខ្លួនចេញពីអ៊ុយក្រែន សំដៅ ប្រទេសអឺរ៉ុប នៅភាគខាងលិចអ៊ុយក្រែន។ សហភាពអឺរ៉ុបវាយតម្លៃថា នឹងមានប្រជាជនភៀសខ្លួនពីអ៊ុយក្រែន ប្រមាណ ៥លាននាក់ ដោយសារ សង្រ្គាមឈ្លានពានរបស់រុស្ស៊ី នៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ