ក្រុមហ៊ុនតូតាល់បារាំង ជាប់ចោទថា ផ្គត់ផ្គង់ប្រេងឱ្យយន្តហោះរុស្ស៊ី ទៅច្បាំងនៅអ៊ុយក្រែន
វត្តមានរបស់ក្រុមហ៊ុនថាមពលបារាំង តូតាល់ TotalEnergies នៅក្នុងប្រទេសរុស្ស៊ី កំពុងត្រូវបានគេចង្អុលមុខ ជាថ្មី។ អង្គការក្រៅរដ្ឋាភិបាល Global Witness បានចោទប្រកាន់ ក្រុមហ៊ុនតូតាល់បារាំង ថាបន្តផលិតប្រេងឱ្យយោធារុស្ស៊ី ដើម្បីយកទៅផ្គត់ផ្គង់យន្តហោះចម្បាំង ដែលវាយប្រហារលើអ៊ុយក្រែន។ តូតាល់បានបដិសេធ និងច្រានចោទទាំងស្រុងព័ត៌មានដែលកាសែត ឡឺម៉ុង បានទម្លាយ ឱ្យដឹងនៅពុធទី ២៤សីហាម្សិលមិញ។
ចុះផ្សាយនៅថ្ងៃ៖
ស្តាប់ - ០២:១៥
បើតាមអង្គការក្រៅរដ្ឋាភិបាល Global Witness ក្រុមហ៊ុនបូមប្រេង Terneftegaz ដែលជារបស់ក្រុមហ៊ុនតូតាល់អេណែរហ្ស៊ីបារាំង (៤៩%) និងក្រុមហ៊ុនរុស្ស៊ី ណូវ៉ាតិក (៥១%) កំពុងធ្វើផលិតកម្មបូមឧស្ម័នហ្កាស នៅអណ្តូង Termokarstovoïeប្រទេសរុស្ស៊ី។ ហើយគឺផលិតកម្មឧស្ម័នរាវរបស់ក្រុមហ៊ុនឧស្ម័នតូតាល់ នៅរុស្ស៊ីនេះហើយ ដែលរងការបរិហារ។
ឧស្ម័នរាវបូមបាន ត្រូវបញ្ជូនទៅមណ្ឌលចម្រាញ់ប្រេងនៅស៊ីបេរី ដើម្បីបំប្លែងឱ្យក្លាយជាប្រេង កេរ៉ូហ្សែន kérosène មុននឹងដឹកទៅផ្គត់ផ្គង់មូលដ្ឋានទ័ពអាកាសពីរ នៅក្បែរប្រទេសអ៊ុយក្រែន ដែលមានកងយន្តហោះចម្បាំង។ កងយន្តហោះចម្បាំងរុស្ស៊ីនេះ បានចេញទៅធ្វើប្រតិបត្តិការវាយប្រហារជនស៊ីវិលអ៊ុយក្រែននៅក្រុងម៉ារីយ៉ូប៉ូល រហូតដល់ខែកក្កដាយ៉ាងហោច។ នេះបើតាមអង្គការAmnesty International។
សេចក្តីសន្និដ្ឋាននេះ ជាលទ្ធផលវិភាគដែលផ្អែកលើទិន្និន័យរបស់ Refinitiv (អ្នកផ្គត់ផ្គង់ទិន្នន័យនិងរចនាសម្ព័ន្ធលើទីផ្សារហិរញ្ញវត្ថុពិភពលោក) ទើបអាចត្រលប់ទៅស្រាវរកដាននៃបណ្តាញផ្គង់ផ្គង់ប្រេង ដោយមានរូបភាពផ្កាយរណបជាជំនួយបន្ថែម។ បើតាមសេចក្តីសន្និដ្ឋាននេះ មូលដ្ឋានទ័ពរុស្ស៊ី Omsk បានទទួលប្រេងប្រមាណ៨%នៃការនាំចេញវត្ថុធាតុដើមរបស់ក្រុមហ៊ុន គិតចាប់ពីថ្ងៃទី ១៣កុម្ភៈដល់ខែកក្កដា២០២២។ តាំងពីឆ្នាំ២០១៧មកមូលដ្ឋានទ័ពរុស្ស៊ីទាំងពីរនេះពុំដែលទទួលប្រេងចម្រាញ់ហើយបែបនេះសោះ។ នេះបើតាមGlobal Witnessដដែល។
ប៉ុន្តែ តូតាល់អេណែរហ្ស៊ីមិនបានផលិតកេរ៉ូហ្សែនសម្រាប់យោធារុស្ស៊ីទេ ! នៅក្នុងសេចក្តីថ្លែងការណ៍ ក្រុមហ៊ុន បានបដិសេធយ៉ាងដាច់អហង្ការ នូវរាល់ព័ត៌មានដែលចុះផ្សាយដោយកាសែតLe Monde ដោយពន្យល់ថា ក្រុមហ៊ុនបារាំង គ្មានតួនាទីប្រតិបត្តិក្នុងការធ្វើផលិតកម្មនៅអណ្តូងឧស្ម័នTermokarstovoïeទេ។
ខុសពីក្រុមហ៊ុនប្រេងធំៗផ្សេងទៀត ដូចយ៉ាង Shell BP ឬ Exxon តូតាល់បានជ្រើសរើសមិនដើរចេញពីរុស្ស៊ីទេ ហើយបន្តនាំចូលឧស្ម័នមកអឺរ៉ុប និងបានទទួលប្រាក់ចំណេញយ៉ាងច្រើន ដល់ទៅ ១០,២ពាន់លានអឺរ៉ូ នៅត្រីមាសទីមួយឆ្នាំ២០២២។ ពេលសង្គ្រាមអ៊ុយក្រែនចាប់ផ្តើមភ្លាម តូតាល់ បានត្រឹមអះអាងថា នឹងផ្អាកសកម្មភាពនៅលើទឹកដីរុស្ស៊ី បន្តិចម្តងៗ តែមិនបានបញ្ជាក់ថ្ងៃខែឱ្យប្រាកដទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ