សមិទ្ធិករចិននាំយកកុនឯកសារ រឿង Youth មកប្រកួតក្នុងមហោស្រពកាន
បន្ទាប់ពីសមិទ្ធិករជប៉ុន លោកកូរ៉េ អេដា ម្ចាស់រឿង Monster ដល់វេនសមិទ្ធិករចិន លោកវ៉ាង ប៊ីង ដែលមានខ្សែភាពយន្តរបស់ខ្លួនចូលរួមប្រកួតប្រជែងចង់បានរង្វាន់តាល់ប័ត្រមាសរបស់មហោស្រពភាពយន្តកាន។ Youth យុវវ័យ និទិឃរដូវ របស់សមិទ្ធិករចិន ជាខ្សែភាពយន្តឯកសារតែមួយគត់នៅក្នុងចំណោមខ្សែភាពយន្តចំនួន២១ដែលត្រូវប្រកួតប្រជែងដណ្តើមរង្វាន់ធំរបស់មហោស្រព។
ចុះផ្សាយនៅថ្ងៃ៖
ស្តាប់ - ០២:៣៩
ខ្សែភាពយន្តឯកសារ៣ម៉ោងកន្លះរបស់សមិទ្ធិករចិននិយាយពីយុវជនចិន អាយុពី១៦ទៅ ២៦ឆ្នាំធ្វើការនៅកន្លែងដេរខោអាវរយ។ សមិទ្ធិករ លោកវ៉ាង ប៊ីងដែលល្បីឈ្មោះខាងផលិតភាពយន្តឯកសារចិន ប្រើកាម៉េរ៉ាតាមថតយុវជនប្រុសស្រីដែលជួលបន្ទប់ស្នាក់នៅរួមគ្នា ធ្វើការជាមួយគ្នា និងពេលខ្លះមួយចំនួនបានឈានទៅដល់ ទំនាក់ទំនងជ្រៅជាងទំនាក់ទំនងមិត្តរួមការងារ រួមបន្ទប់។ ពួកគេទាំងនោះធ្វើដំណើរមកពីគ្រប់ខេត្ត មកធ្វើការនៅទីក្រុងZhili តាមដងទន្លេយ៉ង់សេ មិនឆ្ងាយប៉ុន្មានពីទីក្រុងសេដ្ឋកិច្ចសៀងហៃ។ ក្នុងកុនឯកសារ៣ម៉ោងកន្លះ លោកវ៉ាងប៊ីងបង្ហាញយុវជនដែលធ្វើការមិនឈប់ គិតតែចង់បានការងារបន្ថែមម៉ោង ដើម្បីសង្ឃឹមថា នឹងបានប្រាក់ផ្ញើទៅចិញ្ចឹមកូននៅឯខេត្ត ដើម្បីទិញផ្ទះ ឬមានទុនដើម្បីបង្កើតកន្លែងដេរខោអាវរយនឹងគេដែរ។
យុវជន ជាលទ្ធផលនៃការងារដ៏អត់ធ្មត់ ព្រោះថា លោកវ៉ាងប៊ីង បានចំណាយពេល៥ឆ្នាំ ពីឆ្នាំ ២០១៤ ដល់ឆ្នាំ ២០១៩ ដើម្បីរស់នៅទីក្រុង Zhili ដើម្បីអាចស៊ាំ ទម្លាប់ខ្លួនក្នុងបរិស្ថានរបស់កម្មករ យុវជនរដេរ។ សមិទ្ធិករចិន លោក វ៉ាង ប៊ីងចាប់អារម្មណ៍និយាយពីយុវជនកាត់ដេរ បន្ទាប់ពីលោកសង្កេតឃើញថា នៅពេល ទៅដល់ទីក្រុង Zhili លោករាប់ឃើញមានកន្លែងដេរឯកជន ដល់ទៅ ២ម៉ឺនកន្លែង។ ខុសពីរោងចក្រដែលដំណើរការទ្រង់ទ្រាយធំ ផ្ទះដេរតូចៗ ជាប់ៗគ្នាដែលទទួលដេរខោអាវរយសម្រាប់តែតម្រូវការក្នុងស្រុកចិន។
ក្នុងរយៈពេល៥ឆ្នាំ តាមថតកម្មករយុវជន លោកវ៉ាង ប៊ីមានវីដេអូសរុប២៦០០ម៉ោង។ គេអាចថា ខ្សែកុនឯកសារ៣ម៉ោងកន្លះ ជាការសង្ខេបខ្លីពីវីដេអូថតសរុប ២៦០០ម៉ោង។
តាមលោកវ៉ាង ប៊ីង កុនឯកសាររបស់លោកមានរយៈដល់ទៅ ៣ម៉ោងកន្លះ មិនមែនមកពីលោកចង់ធ្វើឲ្យវែងនោះទេ ប៉ុន្តែ មកពីលោកចង់ឲ្យទស្សនិកជនស្គាល់ទីក្រុងZhili ប្រជាជន និងជីវភាពរស់នៅរបស់ពួកគេ ដែលមិនសូវត្រូវគេស្គាល់ច្រើន មិនថា នៅស្រុកចិន ឬនៅបរទេស។ ជាក់ស្តែងសម្រាប់លោកផ្ទាល់ផ្ទាល់ ដែលជាអ្នកមានកំណើតរស់នៅភាគខាងជើងប្រទេសចិន ដូចជាប៉េកាំង ទីក្រុងZhili សៀងហៃ នៅតំបន់ភាគខាងត្បូងនៅតែអាថ៌កំបាំង សម្រាប់អ្នកពីចម្ងាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ