ថ្នាក់ដឹកនាំប៉ូឡូញទៅជួបលោកចូ បៃដិន និងអំពាវនាវឲ្យអាមេរិកត្រូវបន្តជួយអ៊ុយក្រែន
លោកប្រធានាធិបតី និងនាយករដ្ឋមន្ត្រីប៉ូឡូញ បានទៅជួបលោកចូ បៃដិន នៅទីក្រុងវ៉ាស៊ីនតោន កាលពីថ្ងៃអង្គារ ទី១២មីនា។ ជាជំនួបក្នុងឱកាសបុណ្យខួប២៥ឆ្នាំ នៃការចូលជាសមាជិកអូតង់របស់ប៉ូឡូញផង និងដើម្បីនិយាយអំពីបញ្ហាសន្តិសុខតំបន់ ដោយប៉ូឡូញបានលើកឡើងពីគ្រោះថ្នាក់កាន់តែខ្លាំង នៃចេតនាសង្គ្រាមឈ្លានពានរបស់រុស្ស៊ី។ ក្នុងឱកាសនេះដែរ លោកចូ បៃដិន បានប្រកាសពីកិច្ចសន្យាលក់អាវុធឲ្យប៉ូឡូញ និងផ្តល់កញ្ចប់ថវិកាមួយចំនួនតូច ដើម្បីជួយអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៩
នៅសេតវិមាន ក្នុងពេលជួបលោកប្រធានាធិបតីប៉ូឡូញ Andrzej Duda និងលោកនាយករដ្ឋមន្ត្រីប៉ូឡូញ Danald Tusk លោកចូ បៃដិន បានលើកឡើងថា “យើងត្រូវតែប្រឹងប្រែង មុននឹងអ្វីៗត្រូវយឺតពេល ព្រោះថាដូចប៉ូឡូញដឹងច្បាស់និងមិនភ្លេចទេ ថារុស្ស៊ីនឹងមិនឈប់នៅត្រឹមអ៊ុយក្រែនឡើយ”។ ចំណែកលោក ប្រធានាធិបតីប៉ូឡូញ វិញបានថ្លែងថា “យើងមិនអាចទុកឲ្យចក្រពត្ររុស្ស៊ី បង្កព្យុះភ្លៀង បំផ្លាញស្ថិរភាពសន្តិភាពរបស់អឺរ៉ុបនោះឡើយ"។
ក្នុងឱកាសជំនួបនេះ វ៉ាស៊ីនតោនបានយល់ព្រមអនុញ្ញាតកិច្ចសន្យាលក់អាវុធ ទៅឲ្យប៉ូឡូញ ដែលជាសម្ព័ន្ធមិត្តក្នុងអូតង់។ កិច្ចសន្យាដែលមានតម្លៃទឹកប្រាក់សរុប ចំនួន៣៥០០លានដុល្លារនេះ គឺផ្តោតទៅលើការលក់មីស៊ីលចំងាយឆ្ងាយពីដៅទៅលើអាកាស និងមីស៊ីលចំងាយមធ្យមបាញ់លើអាកាស។
ដោយឡែក សេតវិមានអាមេរិក ក៏បានប្រកាសផងដែរ នូវកញ្ចប់ថវិកាចំនួន ៣០០លានដុល្លារ ដើម្បីជួយអ៊ុយក្រែន។ ជាជំនួយដ៏តឹចតួចស្តួចស្តើងណាស់ បើប្រៀបធៀបទៅកញ្ចប់ថវិកាធំមួយទៀត ដែលលោកបៃដិនបានស្នើទៅកាន់សភាខុនហ្ក្រេស ហើយដែលនៅតែជាប់គាំងមិនទាន់មានការបោះឆ្នោតអនុម័ត។ លោក Jake Sullivan ទីប្រឹក្សាពិសេសរបស់លោកចូ បៃដិន បានឲ្យដឹងថាថវិកា៣០០លានដុល្លារនេះ គឺមានមីស៊ីលការពារផ្លូវអាកាស គ្រាប់កាំភ្លើង និងគ្រាប់កាំភ្លើងត្បាល់ ដើម្បីឆ្លើយតបទៅនឹងតម្រូវការជាបន្ទាន់របស់អ៊ុយក្រែន។
មន្ត្រីជាន់ខ្ពស់ម្នាក់នៃរដ្ឋាភិបាលអាមេរិក បានឲ្យដឹងថា កញ្ចប់ថវិកានេះមានចំនួនតិចតួចខ្លាំងណាស់។ ជាថវិកាជំនួយ ដែលកាត់យកមកពីថវិកាសន្សំសំចៃ របស់ក្រសួងការពារជាតិអាមេរិក សម្រាប់ជួយអ៊ុយក្រែនដោះទ័លមួយគ្រា ក្នុងរយៈពេលខ្លី។
គួរបញ្ជាក់ថា សំណុំរឿងអ៊ុយក្រែន គឺជាចំណុចធំបំផុតនៃការជជែកគ្នា រវាងលោកចូ បៃដិន និងថ្នាក់ដឹកនាំប៉ូឡូញ ដែលព្រួយបារម្ភខ្លាំងណាស់ អំពីជ័យជំនះរបស់រុស្ស៊ី។ កាលពីថ្ងៃចន្ទ លោកប្រធានាធិបតីប៉ូឡូញ បានប្រកាសអំពាវនាវ ឲ្យប្រទេសសមាជិកអូតង់ ត្រូវតែបន្ថែមការប្រឹងប្រែង បង្កើនថវិកាយោធា ដើម្បីផ្ញើសារច្បាស់ទៅរុស្ស៊ី ថាអូតង់មិនខ្លាចញញើត។
កាលពីថ្ងៃអង្គការដែរ នៅវ៉ាស៊ីនតោន លោកប្រធានាធិបតីប៉ូឡូញ បានចូលជួបលោក Mike Johnson ប្រធានសភាតំណាងអាមេរិកមកពីបក្សសាធារណៈរដ្ឋ ដែលនៅតែរឹងរូស មិនព្រមបោះឆ្នោតអនុម័តកញ្ចប់ថវិកាធំជួយអ៊ុយក្រែន។ លោកនាយករដ្ឋមន្ត្រីប៉ូឡូញ Donald Tusk បានលើកឡើងថា លោកសង្ឃឹមថា សំឡេងដង្ហើយអង្វររបស់ប៉ូឡូញ និងជួយជំរុញឲ្យលោក Mike Johnson ប្តូរគោលជំហរ ព្រោះត្រូវដឹងថា ជីវិតប្រជាជនអ៊ុយក្រែនរាប់លាននាក់ គឺផ្ញើលើការសម្រេចចិត្តរបស់លោក Mike Johnsonហើយ។
សូមរំលឹកដែរថា យោងតាមទីភ្នាក់ងារចារិកអាមេរិក CIA គឺមានសញ្ញាណគួរការព្រួយបារម្ភកាន់តែខ្លាំង អំពីស្ថានភាពសមរភូមិនៅអ៊ុយក្រែន។ លោក Bill Burns អគ្គនាយក CIA បានលើកឡើងកាលពីថ្ងៃចន្ទថា អ៊ុយក្រែនមិនមែនខ្វះទឹកចិត្តក្លាហាននិងការតស៊ូទេ តែអ្វីដែលអ៊ុយក្រែនខ្វះខ្លាំងនាពេលនេះ គឺអ៊ុយក្រែនខ្វះគ្រាប់ ខ្វះគ្រឿងសព្វាវុធចាំបាច់ ដើម្បីប្រយុទ្ធទល់នឹងរុស្ស៊ី។ លោកបានទាញសញ្ញាអាសន្នថា បើចង់ជួយអ៊ុយក្រែន គឺត្រូវតែរូតរះឡើង ព្រោះអ្វីៗជិតហួសពេលហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ