គ.ជ.ប.ប្រកាសទទួលស្គាល់បញ្ជីឈ្មោះបេក្ខជនគណបក្សប្រជាជនកម្ពុជា
គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប. បានប្រកាសទទួលស្គាល់ជាផ្លូវការនូវគណបក្សប្រជាជនកម្ពុជា សម្រាប់ការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោតតំណាងរាស្ត្រ នីតិកាលទី៥ ដែលនឹងធ្វើឡើង នៅថ្ងៃទី២៨កក្កដាខាងមុខ។ គិតត្រឹមថ្ងៃទី២ឧសភា គ.ជ.ប. ប្រកាសថា មានគណបក្ស ចំនួន ៥ បានចុះឈ្មោះ និងដាក់បេក្ខជន ដើម្បីចូលរួមការបោះឆ្នោត។
ចុះផ្សាយនៅថ្ងៃ៖
ស្តាប់ - ០៣:២៤
ក្រៅពីប្រកាសទទួលស្គាល់ជាផ្លូវការនូវការចុះឈ្មោះ និងចុះបញ្ជីបេក្ខជនឈរឈ្មោះបោះឆ្នោត របស់គណបក្សប្រជាជនកម្ពុជា នៅក្នុងសេចក្តីសម្រេចរបស់ខ្លួន កាលពីថ្ងៃទី៣ ខែឧសភា ឆ្នាំ២០១៣ គ.ជ.ប. ក៏បានតម្រូវឲ្យគណបក្សសញ្ជាតិកម្ពុជា ធ្វើការកែតម្រូវរយៈពេល ៥ថ្ងៃ លើចំណុចខ្វះខាត។
សេចក្តីប្រកាសដដែល ក៏បានលើកឡើងថា សម្រាប់គណបក្សហ្វ៊ុនស៊ិនប៉ិច គណបក្សសាធារណរដ្ឋប្រជាធិបតេយ្យ និងគណបក្សសម្ព័ន្ធដើម្បីប្រជាធិបតេយ្យ គឺ គ.ជ.ប កំពុងតែធ្វើការពិនិត្យ។
បញ្ជីឈ្មោះបេក្ខជនតំណាងរាស្ត្រ របស់គណបក្សប្រជាជនកម្ពុជា ដែលបានដាក់នៅ គ.ជ.ប. មិនត្រូវបានតំណាងគណបក្សប្រជាជនកម្ពុជា ក៏ដូចជា មន្ត្រីគ.ជ.ប. ផ្តល់ឲ្យអ្នកកាសែតឡើយ នៅថ្ងៃសុក្រនេះ។
យ៉ាងណាក៏ដោយលោក អ៊ក គីមហាន ប្រធាននាយកដ្ឋានបូកសរុប របស់គណបក្សប្រជាជនកម្ពុជា បានប្រាប់អ្នកកាសែត ក្នុងពេលកន្លងមកថា បេក្ខជនរបស់គណបក្សប្រជាជនកម្ពុជា បានដាក់នៅទូទាំង ២៤ រាជធានីខេត្ត ដោយមានបេក្ខជនសរុប ២៦៨ នាក់។ ក្នុងនោះ មានបេក្ខជនពេញសិទ្ធិ ១២៣ នាក់ និងបម្រុង ១៤៥ នាក់។ បេក្ខជននោះ ក៏មានស្ត្រី ៤៨ នាក់ ។
តំណាងគណបក្សប្រជាជនកម្ពុជាបន្តថា ការរៀបចំបញ្ជីបេក្ខជននេះមានតំណាងរាស្ត្រចាស់ៗ មួយចំនួនធំ និងមានដាក់អ្នកថ្មី ដែលជាយុវជន និងជាកូនអ្នកដឹកនាំមួយចំនួនដែរ។ យុវជនឈរឈ្មោះបោះឆ្នោតទាំងនោះ រួមមានទាំងកូនប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី ដែលឈរឈ្មោះ នៅក្នុងខេត្តកំពង់ស្ពឺ។
តាមគ.ជ.ប គិតត្រឹមថ្ងៃទី២ ខែឧសភា ឆ្នាំ២០១៣ មានគណបក្សនយោបាយចំនួន ៥ បានដាក់ពាក្យចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ។ គណបក្សទាំង ៥ នោះ រួមមាន៖ ទី១-គណបក្សប្រជាជនកម្ពុជា ទី២-គណបក្សសញ្ជាតិកម្ពុជា ទី៣-គណបក្សហ្វ៊ុនស៊ិនប៉ិច ទី៤-គណបក្សសាធារណរដ្ឋប្រជាធិបតេយ្យ និងទី៥-គណបក្សសម្ព័ន្ធដើម្បីប្រជាធិបតេយ្យ។
ដំណើរការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោតតំណាងរាស្ត្រ នីតិកាលទី៥ ត្រូវធ្វើឡើង ចាប់ពីថ្ងៃទី២៩ ខែមេសា រហូតដល់ថ្ងៃទី១៣ ខែឧសភា ឆ្នាំ២០១៣។ក្នុងកិច្ចប្រជុំនៅគ.ជ.ប. កាលពីព្រឹកថ្ងៃទី៣ឧសភា លោក ទេព នីថា អគ្គលេខាធិការ គ.ជ.ប. ក៏បានឆ្លើយតបនឹងសំណួររបស់អ្នកកាសែត ជុំវិញអនុសាសន៍សំខាន់ពីរចំណុចរបស់ក្រុមអង្គការសង្គមស៊ីវិល ដែលបញ្ជូនទៅកាន់គ.ជ.ប. កាលពីថ្ងៃ២ឧសភា ឆ្នាំ២០១៣។
នោះគឺការស្នើឲ្យគ.ជ.ប. បិទផ្សាយបញ្ជីឈ្មោះអ្នកបោះឆ្នោត នៅគ្រប់ភូមិទូទាំងប្រទេស និងមួយចំនុចទៀត សង្គមស៊ីវិលស្នើឲ្យមានបញ្ចូលសមាសភាពតំណាងគណបក្សនយោបាយ ចូលរួមក្នុងគណៈកម្មការរៀបចំការបោះឆ្នោតនៅតាមការិយាល័យបោះឆ្នោតនិងតាមគណៈកម្មការរៀបចំការបោះឆ្នោត នៅឃុំសង្កាត់ទូទាំងប្រទេស។
ក៏ប៉ុន្តែលោក ទេព នីថា បានបញ្ជាក់ថា អនុសាសន៍របស់សង្គមស៊ីវិលនោះ គឺមិនមែនជារឿងថ្មីទេ។ គ.ជ.ប. ក៏មិនអាចទៅបិទឈ្មោះអ្នកបោះឆ្នោត រហូតដល់តាមភូមិបានឡើយ។ គ.ជ.ប. អនុវត្តតាមច្បាប់ ហើយក៏មិនអាចទៅចែកកូត្តាដល់គណបក្សនយោបាយ ឲ្យមានការបញ្ចូលតំណាងគណបក្ស ទៅក្នុងគណៈកម្មការឃុំសង្កាត់រៀបចំការបោះឆ្នោត ដូចការទាមទាររបស់សង្គមស៊ីវិលនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ