ស៊ីរី៖ អ.ស.ប.ចូលទៅស៊ើបអង្កេតភូមិដែលសង្ស័យថាមានការសម្លាប់រង្គាល
ក្រុមអ្នកសង្កេតការណ៍អ.ស.ប.ប្រចាំនៅស៊ីរីបានធ្វើដំណើរទៅដល់ភូមិ Treimsa កាលពីថ្ងៃសៅរ៍ ម្សិលមិញ ដើម្បីធ្វើការស៊ើបអង្កេតជុំវិញព័ត៌មាន ស្តីពីការសម្លាប់រង្គាលជនស៊ីវិល កាលពីថ្ងៃព្រហស្បតិ៍។ ក្រោយពីបានពិនិត្យដល់កន្លែងកើតហេតុ នៅល្ងាចថ្ងៃដដែល មន្រ្តីអ.ស.ប.បានចេញសេចក្តីថ្លែងការណ៍មួយបញ្ជាក់ថា ការវាយប្រហារទៅលើភូមិ Treimsa ភាគច្រើនធ្វើឡើងសំដៅទៅលើទីតាំងរបស់ក្រុមឧទ្ទាម និងសកម្មជនប្រឆាំង។ រដ្ឋាភិបាលស៊ីរីទទួលស្គាល់ការវាយប្រហារទៅលើភូមិ Treimsa ក៏ប៉ុន្តែ បដិសេធថា គ្មានរថក្រោះ ឬយន្តហោះណាមួយត្រូវបានប្រើ ក្នុងប្រតិបត្តិការយោធានេះទេ។
ចុះផ្សាយនៅថ្ងៃ៖
ស្តាប់ - ០២:០៩
នៅក្នុងការស៊ើបអង្កេត នៅភូមិ Treimsa កាលពីថ្ងៃសៅរ៍ ក្រុមមន្រ្តីសង្កេតការណ៍អ.ស.ប. បានរកឃើញមានស្នាមឈាម ផ្ទះ និងសាលារៀនត្រូវឆេះ ដែលមើលទៅទំនងជាមានការដុតចេញពីខាងក្នុង ហើយទីតាំងមួយចំនួនទៀត ដែលរងការខូចខាតដោយគ្រាប់កាំភ្លើងធំ។ នេះបើយោងតាមសេចក្តីថ្លែងការណ៍ ធ្វើឡើងដោយអ្នកនាំពាក្យបេសកកម្មសង្កេតការណ៍អ.ស.ប.ប្រចាំប្រទេសស៊ីរី។
ក្រុមអ្នកសង្កេតការណ៍បានធ្វើការសន្និដ្ឋានជំហានដំបូងថា ការវាយប្រហារនៅ Treimsa នេះ ត្រូវបានធ្វើឡើង ទៅលើគោលដៅជាក់លាក់ ដែលមើលទៅ ភាគច្រើនជាទីតាំង ឬផ្ទះរបស់ក្រុមទាហានដែលផ្តាច់ខ្លួនទៅចូលជាមួយក្រុមឧទ្ទាម និងសកម្មជនប្រឆាំង។ ក៏ប៉ុន្តែ នៅក្នុងសេចក្តីសន្និដ្ឋាននេះ ក្រុមអ្នកសង្កេតការណ៍មិនបានបញ្ជាក់ថា តើការវាយប្រហារនេះត្រូវធ្វើឡើងដោយក្រុមណាមួយនោះទេ។ ចំពោះអ្នកស្លាប់វិញ ក៏គេនៅមិនទាន់អាចបញ្ជាក់ឲ្យបានច្បាស់លាស់ដែរថា តើមានចំនួនសរុបប៉ុន្មាននាក់ ក្នុងនោះ ក្រុមឧទ្ទាមប្រដាប់អាវុធប៉ុន្មាននាក់ ហើយជនស៊ីវិលប៉ុន្មាននាក់?
គួរបញ្ជាក់ថា រហូតមកទល់ពេលនេះ ចំនួនអ្នកស្លាប់នៅ Treimsa ត្រូវបានគេប៉ាន់ប្រមាណថា មានយ៉ាងតិច ១៥០នាក់។
ក្រុមអ្នកសង្កេតការណ៍គ្រោងនឹងធ្វើដំណើរត្រឡប់ទៅភូមិ Treimsa ជាថ្មីទៀត នៅថ្ងៃអាទិត្យនេះ ដើម្បីធ្វើការស៊ើបអង្កេតជាបន្តទៀត។
ក្នុងពេលជាមួយគ្នានេះ មានសេចក្តីរាយការណ៍ជាបន្តបន្ទាប់ថា រដ្ឋាភិបាលរបស់លោកអាសាដកំពុងបន្តបើកធ្វើប្រតិបត្តិការយោធា នៅទីតាំងមួយចំនួនផ្សេងទៀតរបស់ក្រុមប្រឆាំង។ អ្នកយកការណ៍ឲ្យទីភ្នាក់ងារសារព័ត៌មានបារាំង AFP បានរាយការណ៍ថា កាលពីថ្ងៃសៅរ៍ គេឮស្នូរកាំភ្លើងធំបាញ់ផ្លោងសន្ធាប់ជាប់ៗគ្នា ប្រមាណជិត ៦ម៉ោង នៅជិតទីក្រុង Aleppo ដែលជាក្រុងសេដ្ឋកិច្ចដ៏ធំមួយ នៅក្បែរព្រំដែនតួកគី។
លោកបាន គីមូន អគ្គលេខាធិការអ.ស.ប. បានជួបសន្ទនាជាមួយរដ្ឋមន្រ្តីការបរទេសចិន ដោយបានអំពាវឲ្យចិនប្រើឥទ្ធិពលរបស់ខ្លួន ដើម្បីជំរុញឲ្យលោកអាសាដគោរពផែនការសន្តិភាព ៦ចំណុច របស់លោកកូហ្វ៊ី អាណាន់។ កិច្ចសន្ទនាតាមទូរស័ព្ទនេះ ធ្វើឡើង នៅមុនពេលលោកបាន គីមូន ត្រូវទៅបំពេញទស្សនកិច្ច នៅចិន នៅថ្ងៃចន្ទស្អែក។ ចំណែករដ្ឋាភិបាលរុស្ស៊ីវិញ បានប្រកាសឲ្យដឹង នៅថ្ងៃនេះថា លោកពូទីននឹងជួបជជែកជាមួយលោកកូហ្វ៊ី អាណាន់ នៅថ្ងៃអង្គារ នៅរដ្ឋធានីម៉ូស្គូ។
គួររំឭកឡើងវិញថា រហូតមកទល់ពេលនេះ ចិន និងរុស្ស៊ី ដែលជាសមាជិកអចិន្រ្តៃយ៍នៃក្រុមប្រឹក្សាសន្តិសុខអ.ស.ប. នៅតែបន្តជំទាស់រាល់សេចក្តីសម្រេច ដែលចែងគំរាមដាក់ទណ្ឌកម្មលើស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ