គ.ជ.ប.៖ លទ្ធផលផ្លូវការនៃការបោះឆ្នោតព្រឹទ្ធសភានឹងប្រកាសនៅចុងសប្តាហ៍នេះ
គណៈកម្មាធិការជាតិរៀបចំការបោះឆ្នោត គ.ជ.ប. បានប្រកាសថា លទ្ធផលផ្លូវការនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ នឹងត្រូវប្រកាស នៅចុងសប្ដាហ៍នេះ។គ.ជ.ប. ក៏បានបដិសេធនូវពាក្យបណ្តឹងរបស់គណបក្សសមរង្ស៉ីផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
សេចក្ដីប្រកាសរបស់ គ.ជ.ប. នៅថ្ងៃ៧កុម្ភៈនេះ បានលើកឡើងថា បន្ទាប់ពីដោះស្រាយបណ្ដឹងទាក់ទងនឹងការឃោសនាបោះឆ្នោត ការបោះឆ្នោត និងរាប់សន្លឹកឆ្នោត សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣មក គណៈកម្មាធិការជាតិរៀបចំការបោះឆ្នោត គ.ជ.ប. គ្រោងនឹងប្រកាសលទ្ធផលផ្លូវការ នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ នៅចុងសប្ដាហ៍នេះ។
លោក ទេព នីថា អគ្គលេខាធិការ គ.ជ.ប. បានលើកឡើងថា បណ្ដឹងទាក់ទងទៅនឹងការឃោសនាបោះឆ្នោត សរុបមាន ៧ បណ្ដឹង។ បណ្ដឹងទាំងនេះ ត្រូវបានដោះស្រាយរួចរាល់ ត្រឹម គ.ជ.ប. ថ្នាក់រាជធានី-ខេត្ត (គធ/ខប) ចំនួន ៤ បណ្ដឹង ដោយដើមបណ្ដឹង មិនបានប្ដឹងបន្តមក គ.ជ.ប. ទេ។ ប៉ុន្តែបណ្ដឹងចំនួន ៣ ទៀត ត្រូវបានដើមបណ្ដឹងបន្តប្ដឹងមក គ.ជ.ប. ហើយបណ្ដឹងទាំងនោះ ត្រូវបាន គ.ជ.ប. ដោះស្រាយរួចរាល់ នៅថ្ងៃទី៦ ខែកុម្ភៈ ឆ្នាំ២០១២។
លោក ទេព នីថា បានបន្តទៀតថា ចំណែកបណ្ដឹងទាក់ទងទៅនឹងការបោះឆ្នោត និងរាប់សន្លឹកឆ្នោត ចំនួន ២ បណ្ដឹង នៅខេត្តកំពង់ឆ្នាំង ក្នុងនោះមាន ១បណ្ដឹង ប្ដឹងសម្រាប់សន្លឹកឆ្នោតឡើងវិញ នៅការិយាល័យបោះឆ្នោតលេខ៧០០៣ ត្រូវបាន គ.ជ.ប. ធ្វើការដោះស្រាយចប់នៅថ្ងៃទី១ ខែកុម្ភៈ ឆ្នាំ២០១២ និង ១បណ្ដឹងទៀត ប្ដឹងមន្ត្រីគណៈកម្មាធិការរៀបចំការបោះឆ្នោតខេត្ត កំពង់ឆ្នាំង ត្រូវបាន គ.ជ.ប ដោះស្រាយចប់ត្រឹមថ្ងៃទី៦ ខែកុម្ភៈ ឆ្នាំ២០១២។
លោកអគ្គលេខាធិការ បានបន្ថែមថា បណ្ដឹងទាក់ទងទៅនឹងការឃោសនាបោះឆ្នោត គឺក្នុងករណីដើមបណ្ដឹង ពុំបានប្ដឹងបន្តទៅក្រុមប្រឹក្សាធម្មនុញ្ញ ក្នុងរយៈពេល ៧២ ម៉ោងយ៉ាងយូរ បន្ទាប់ពីបានទទួលសម្រង់សេចក្ដីសម្រេចរបស់ គ.ជ.ប. ទេ នោះ គ.ជ.ប. នឹងធ្វើការប្រកាសលទ្ធផលផ្លូវការ ស្តីពីការបែងចែកអាសនៈ និងប្រកាសផ្សាយបញ្ជីបេក្ខជនជាប់ឆ្នោតក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ នៅចុងសប្ដាហ៍នេះ។
លទ្ធផលបណ្តោះអាសន្ន នៃការបោះឆ្នោតព្រឹទ្ធសភា កាលពីថ្ងៃទី២៩មករា ត្រូវបាន គ.ជ.ប. ប្រកាសថា គណបក្សប្រជាជនកម្ពុជា ទទួលបាន ៨.៨៨០ សំឡេង និងគណបក្សសមរង្ស៊ី ទទួលបាន ២.៥០៣ សំឡេង។ តាមលទ្ធផលនេះ គណបក្សប្រជាជនកម្ពុជា ត្រូវទទួលបាន ៤៦ អាសនៈ។ រីឯគណបក្សសមរង្ស៊ី ទទួលបាន ១១ អាសនៈ ដូចអ្វីដែលគេបានគិតគូរទុកជាមុន តាមចំនួនសមាជិកក្រុមប្រឹក្សាឃុំសង្កាត់ និងតំណាងរាស្ត្រដែលជាអ្នកបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ