មួយសប្ដាហ៍មុនបោះឆ្នោត ការិយាល័យបោះឆ្នោតខ្លះនៅកម្ពុជា រងការជន់លិចដោយជំនន់ទឹកភ្លៀង
ជាងមួយសប្ដាហ៍មុនកម្ពុជារៀបចំការបោះឆ្នោតជាតិនៅថ្ងៃទី២៩កក្កដា ការិយាល័យបោះឆ្នោតមួយចំនួនត្រូវរងការជន់លិច។ អ្នកនាំពាក្យគណៈកម្មាធិការជាតិរៀបចំការបោះឆ្នោត បានគូសបញ្ជាក់ប្រាប់វិទ្យុបារាំងអន្ដរជាតិនាថ្ងៃព្រហស្បតិ៍នេះថា គជប ក៏ដូចជាអាជ្ញាធរមូលដ្ឋានដែរ កំពុងតែរង់ចាំមើលស្ថានការណ៍ទឹកជំនន់ ដោយសង្ឃឹមថា អាចស្រកទៅវិញមុនការបោះឆ្នោតចូលមកដល់។ ប៉ុន្តែប្រសិនបើទឹកជំនន់ស្រកមិនទាន់ទេ គជប និងអាជ្ញាធរពាក់ព័ន្ធ នឹងមានវិធានការដោះស្រាយតាមសភាពការណ៍ជាក់ស្ដែងជាបន្តទៀត។
ចុះផ្សាយនៅថ្ងៃ៖
ស្តាប់ - ០២:១៥
ព័ត៌មានបឋមពីគណៈកម្មាធិការជាតិរៀបចំការបោះឆ្នោតឲ្យដឹងថា ការិយាល័យបោះឆ្នោតមួយចំនួននៅក្នុងខេត្តយ៉ាងហោចណាស់៤ កំពុងរងការជន់លិច ដោយសារតែជំនន់ទឹកភ្លៀង។ ក្នុងនោះរួមមាន ខេត្តកោះកុង២ការិយាល័យ កំពង់ឆ្នាំង២ការិយាល័យ កំពង់ចាមជន់លិចជាង១០ការិយាល័យ និងនៅខេត្តកំពង់ស្ពឺមានចំនួន១២ការិយាល័យ។
ការជន់លិចការិយាល័យបោះឆ្នោតមួយចំនួននៅតាមបណ្ដាខេត្តនេះ កើតឡើងខណៈពេលដែលប្រទេសកម្ពុជាកំពុងរងឥទ្ធិពលព្យុះទី៩ ឈ្មោះ សុនទីញ ដែលបណ្ដាលឲ្យមានភ្លៀងធ្លាក់ជាប់ៗគ្នាច្រើនថ្ងៃនៅតាមបណ្ដាខេត្តមួយចំនួន។ គិតត្រឹមថ្ងៃទី១៩កក្កដានេះ ខេត្តចំនួន៧រងការជន់លិចនិងប្រឈមនឹងការជន់លិចដោយជំនន់ទឹកភ្លៀង ជាអាថិ៍៖ ខេត្តកំពង់ស្ពឺ ព្រះសីហនុ កំពត កែប កោះកុង ប៉ៃលិន និងបាត់ដំបង។ ក្រសួងធនធានទឹកនិងឧតុនិយមព្យាករណ៍ថា ភ្លៀងនឹងនៅតែបន្តធ្លាក់រហូតដល់ថ្ងៃទី២៤កក្កដា ជាពិសេសនៅតាមបណ្ដាខេត្តជាប់មាត់សមុទ្រ។
លោក ឌឹម សុវណ្ណារុំ អ្នកនាំពាក្យ គជប បញ្ជាក់ថា គជប កំពុងតែបន្តតាមដានយ៉ាងយកចិត្តទុកដាក់ចំពោះស្ថានភាពអាកាសធាតុ និងទឹកជំនន់ដែលបានជន់លិចការិយាល័យបោះឆ្នោតមួយចំនួននៅកម្ពុជា។ ខណៈពេលដែលការបោះឆ្នោតនឹងឈានចូលមកដល់នៅចុងសប្ដាហ៍ក្រោយ អ្នកនាំពាក្យ គជប រូបនេះ សង្ឃឹមថា ជំនន់ទឹកភ្លៀងដែលលិចការិយាល័យបោះឆ្នោតមួយចំនួននោះ នឹងស្រកទៅវិញទាន់ពេលវេលា។ ប៉ុន្តែ នៅក្នុងករណីដែលទឹកជំនន់ស្រកមិនទាន់ទេ អាជ្ញាធរខេត្តនឹងស្នើមកកាន់ គជប ឲ្យផ្លាស់ប្ដូរការិយាល័យដែលជន់លិចនោះទៅកាន់ទីទួលមានសុវត្ថិភាព។ លោក ឌឹម សុវណ្ណារុំ ថា គជប នឹងពិនិត្យលើសំណើរបស់អាជ្ញាធរខេត្ត ហើយសម្រេចទៅតាមករណីជាក់ស្ដែង ដើម្បីធ្វើយ៉ាងណាអនុញ្ញាតឲ្យការបោះឆ្នោតអាចដំណើរការទៅបានដោយគ្មានការរាំងស្ទះ។
សូមបញ្ជាក់ថា ការិយាល័យបោះឆ្នោតចំនួន២២,៩៦៧ នៅទូទាំងប្រទេស នឹងបើកទ្វារដំណើរការនៅម៉ោង៧ព្រឹកព្រលឹមថ្ងៃ២៩កក្កដា។ ជាថ្ងៃដែលប្រជាពលរដ្ឋខ្មែរជិត៨លាន៤សែននាក់ ត្រូវទៅបោះឆ្នោតជ្រើសតាំងតំណាងរាស្ត្រអាណត្តិទី៦។ ការបោះឆ្នោតនេះ មានគណបក្សចំនួន២០ចូលរួមប្រកួតប្រជែង ដើម្បីដណ្ដើមយកអាសនៈ១២៥ក្នុងរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ