កម្ពុជា

គ្រោះថ្នាក់ចរាចរណ៍ពេលចូលឆ្នាំខ្មែរ ស្លាប់៣៩ របួស២៤៨នាក់

ក្នុងរយៈពេល៣ថ្ងៃនៃបុណ្យចូលឆ្នាំខ្មែរកន្លងទៅនេះ អ្នកស្លាប់ដោយសារគ្រោះថ្នាក់ចរាចរណ៍សរុបចំនួន៣៩នាក់ ហើយអ្នករងរបួសចំនួន២៤៨នាក់។ គឺជាការសរុបទិន្នន័យទូទាំងប្រទេសដោយអគ្គស្នងការដ្ឋាននគរបាលជាតិ។ មូលហេតុចម្បងមួយចំនួនដែលបណ្តាលឲ្យគ្រោះថ្នាក់ទាំងនោះ គឺដោយសារ បើកបរហួសល្បឿនកំណត់ បើកបរក្រោមឥទ្ធិពលនៃគ្រឿងស្រវឹង និងដោយសារការមិនដាក់ខ្សែក្រវាត់ ឬមិនពាក់មួកសុវត្ថិភាព។ បន្ថែមពីនេះ អ្នកធ្វើការខាងសុវត្ថិភាពចរាចរណ៍ផ្លូវគោកបានសង្កេតឃើញថា គ្រោះថ្នាក់ច្រើនកើតមាននៅតាមផ្លូវជាតិ ពិសេសនៅកំពង់ចាមនិងភ្នំពេញ។

ចុះផ្សាយនៅថ្ងៃ៖ 17/04/2015 - 09:10

ដោយ៖ ហេង ឧត្តម

ផ្សាយពាណិជ្ជកម្ម

គិតចាប់ពីថ្ងៃទី១៤ដល់ថ្ងៃទី១៦មេសា មានមនុស្សចំនួន៣៩នាក់ បានស្លាប់ដោយគ្រោះថ្នាក់ចរាចរណ៍ ហើយអ្នករងរបួសចំនួន២៤៨នាក់។ នេះបើតាមគេហទំព័រអគ្គស្នងការដ្ឋាននគរបាលជាតិ។ តាមគេហទំព័រដដែលបញ្ជាក់ថា នៅថ្ងៃចុងក្រោយនៃបុណ្យឆ្នាំថ្មី គឺថ្ងៃទី១៦មេសា មានគ្រោះថ្នាក់ចរាចរណ៍នៅទូទាំងប្រទេសចំនួន៤៩លើកយប់២០លើក ដែលបណ្តាលឲ្យមនុស្សស្លាប់ចំនួន១៦នាក់។

របាយការណ៍ពីនាយកដ្ឋានសណ្តាប់ធ្នាប់នៃអគ្គស្នងការដ្ឋាននគរបាលជាតិ បានឲ្យដឹងដែរថា នៅថ្ងៃចូលឆ្នាំទី២ មានគ្រោះថ្នាក់ចរាចរណ៍ នៅទូទាំងប្រទេសចំនួន៣៩លើក យប់២០លើក ហើយបណ្តាលបាត់បង់ជីវិតមនុស្សចំនួន១៣នាក់។ ចំណែកអ្នករបួសនៅថ្ងៃទី១៥មេសានោះ មានរបួសធ្ងន់៤៧នាក់និងរបួសស្រាល៤២នាក់។

ជាមួយគ្នានេះ នៅថ្ងៃចូលឆ្នាំថ្មីទី១ មនុស្សចំនួន៨នាក់បានស្លាប់ ហើយរបួសធ្ងន់និងស្រាល ចំនួន៤៣នាក់ ដោយសារគ្រោះថ្នាក់ចរាចរណ៍។

មូលហេតុដែលបណ្តាលឲ្យមានគ្រោះថ្នាក់ទាំងនោះ គឺដោយសារបើកបរល្បឿនពេក ស្រវឹង ប្រជែងនឹងគ្រោះថ្នាក់ មិនគោរពសិទ្ធអាទិភាព និងមិនប្រកាន់ស្តាំជាដើម។ ចំពោះអ្នកជិះម៉ូតូ ក៏កើតមានដែរ ព្រោះមិនបានពាក់មួកសុវត្ថិភាព។ នេះបើតាមគេហទំព័រអគ្គស្នងការដ្ឋាននគរបាលជាតិ ដែលបានចុះផ្សាយនៅថ្ងៃទី១៧មេសា២០១៥។

ទោះយ៉ាងណាក្តី លោក អៀ ចរិយា ទីប្រឹក្សាឯករាជ្យផ្នែកសុវត្ថិភាពចរាចរណ៍ បានសង្កេតឃើញថា មូលហេតុធំៗចំនួន៣ ដែលបង្កឲ្យមានគ្រោះថ្នាក់ចរាចរណ៍ គឺដោយសារ បើកបរហួសល្បឿនកំណត់ បើកបរក្រោមឥទ្ធិពលនៃគ្រឿងស្រវឹង និងដោយសារការមិនដាក់ខ្សែក្រវាត់ ឬមិនពាក់មួកសុវត្ថិភាព។ នៅតាមបណ្តាផ្លូវជាតិ ពិសេសនៅកំពង់ចាមនិងភ្នំពេញដែលមានប្រជាជនច្រើននិងផ្លូវជាតិច្រើន គឺកើតមានគ្រោះថ្នាក់ចរាចរណ៍ ក៏ច្រើនជាងខេត្តដទៃដែរ។

លោក អៀ ចរិយា ឲ្យដឹងទៀតថា ៧០ភាគរយនៃអ្នកបើកបរម៉ូតូមានគ្រោះថ្នាក់ គឺរងរបួសនិងស្លាប់ដោយមិនបានពាក់មួកសុវត្ថិ ដែលបង្កឲ្យមានការប៉ះទង្គិចក្បាលធ្ងន់ធ្ងរ។ ទីប្រឹក្សាឯករាជ្យផ្នែកសុវត្ថិភាពចរាចរណ៍រូបនេះ បានកត់សម្គាល់ថា ការពង្រឹងសុវត្ថិភាពចរាចរណ៍ មានភាពរឹងមាំនិងមានប្រសិទ្ធភាពជាងមុន បើប្រៀបធៀបនឹងឆ្នាំកន្លងទៅ។ នេះក៏ដោយ សារការចេញច្បាប់ចរាចរណ៍ផ្លូវគោកថ្មី កាលពីខែធ្នូកន្លងទៅនេះដែរ។ ក្នុងនាមជាទីប្រឹក្សាឯករាជ្យផ្នែកសុវត្ថិភាពចរាចរណ៍ លោក អៀ ចរិយា សង្កេតឃើញមន្ត្រីពាក់ព័ន្ធរបស់ក្រសួងសាធារណការនិងដឹកជញ្ជូន ព្រមទាំងក្រសួងមហាផ្ទៃ បានចេញលិខិតណែនាំ និងចុះអប់រំពីច្បាប់ចរាចរណ៍ថ្មី និងផ្សព្វផ្សាយពីបញ្ហាគ្រោះថ្នាក់ចរាចរណ៍ ច្រើនជាងពេលកន្លងទៅ។

យ៉ាងណាក៏ដោយចុះ បញ្ហាគ្រោះថ្នាក់លើដងផ្លូវនៅឆ្នាំនេះ មានការថយចុះ បើធៀបនឹងឆ្នាំមុន។ នេះបើតាមលោក អៀ ចរិយា។ លោកបានបញ្ជាក់ថា ជាមធ្យមមនុស្សស្លាប់ពី៥ទៅ៦នាក់ក្នុងមួយថ្ងៃៗ នៅទូទាំងប្រទេសកម្ពុជា ដោយសារគ្រោះថ្នាក់ចរាចរណ៍៕