ព្រះមហាក្សត្រ ត្រាស់បង្គាប់ចាត់តាំងលោកហ៊ុន សែន ជានាយករដ្ឋមន្ត្រីអណត្តិទី៦
ព្រះមហាក្សត្រនៃព្រះរាជាណាចក្រកម្ពុជា ព្រះករុណាព្រះបាទសម្តេចព្រះបរមនាថ នរោត្តម សីហមុនី ក្នុងព្រះរាជក្រឹត្យចុះថ្ងៃទី ១៧សីហានេះ បានប្រកាសចាត់តាំងលោក ហ៊ុន សែន ជានាយករដ្ឋមន្ត្រីកម្ពុជា អណត្តិទី ៦។ ព្រះរាជក្រឹត្យប្រកាសតែងតាំងនេះ បានធ្វើឡើងតែ ២ថ្ងៃ បន្ទាប់ពីគណៈកម្មាធិការជាតិរៀបចំការបោះឆ្នោត ទើបបានប្រកាសលទ្ធផលបោះឆ្នោតផ្លូវការ ដែលគណបក្សប្រជាជនកម្ពុជា ឈ្នះសម្លេងដាច់ ទទួលបាន ១២៥អាសនៈក្នុងរដ្ឋសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ដូចការគ្រោងទុក លោកហ៊ុន សែន ត្រូវបន្តធ្វើជានាយករដ្ឋមន្ត្រី ដឹកនាំរាជរដ្ឋាភិបាល អណត្តិទី ៦ជាបន្តទៀត។ ជានាយករដ្ឋមន្ត្រី ដែលលោកហ៊ុន សែន មានភារកិច្ចរៀបចំសមាសភាពរាជរដ្ឋាភិបាលកម្ពុជា ដើម្បីសុំសេចក្តីអនុម័តទុកចិត្តពីរដ្ឋសភា។
ក្រោយទទួលបានព្រះរាជក្រឹត្យរបស់អង្គព្រះមហាក្សត្រ លោកហ៊ុន សែន បានថ្វាយសារលិខិតតបភ្លាមៗ ថ្លែងអំណរព្រះគុណ ដល់អង្គព្រះមហាក្សត្រវិញ និងប្តេជ្ញាខិតខំប្រឹងប្រែងអស់ពីកម្លាំងកាយចិត្ត និងស្មារតី ដើម្បីបំពេញភារកិច្ច បម្រើប្រទេសជាតិ មាតុភូមិ និងប្រជារាស្ត្រទូទាំងប្រទេស។ ក្នុងនោះ លោកហ៊ុន សែន បានបញ្ជាក់ថា នឹងរៀបចំសមាសភាពរាជរដ្ឋាភិបាល បញ្ជូនទៅព្រឹទ្ធសមាជិកនៃរដ្ឋសភា នីតិកាលទី ៦ ដើម្បីសុំការផ្តល់សេចក្តីទុកចិត្ត ពីសមាជិក សមាជិកានៃរដ្ឋសភា ដែលនឹងប្រជុំ នៅថ្ងៃទី ៦ខែកញ្ញា ឆ្នាំ ២០១៨។
សូមបញ្ជាក់ជូនថា បើតាមនីតិវិធី រដ្ឋសភា នីតិកាលទី ៦ នឹងត្រូវកោះប្រជុំជាលើកដំបូង ក្រោមព្រះរាជាធិបតីភាពនៃអង្គព្រះមហាក្សត្រ នៅព្រឹកថ្ងៃទី ៥ខែកញ្ញា ខណៈដែលសមាជិកទាំងអស់ នឹងត្រូវចូលស្បថសច្ចាប្រណិធាន នៅពេលល្ងាចថ្ងៃទី ៥កញ្ញាដែរនោះ។ ចំណែកក្បាលម៉ាស៊ីនដឹកនាំសភាជាតិ និងរាជរដ្ឋាភិបាល អណត្តិទី ៦ នឹងត្រូវប្រកាសបង្កើតឡើង នៅថ្ងៃទី ៦ខែកញ្ញា ខណៈគណៈរដ្ឋមន្ត្រីអណត្តិថ្មី នឹងបើកប្រជុំជាលើកដំបូង នៅថ្ងៃទី ៧ខែកញ្ញា ឆ្នាំ ២០១៨។
ជាការកត់សម្គាល់ ក្នុងអណត្តិថ្មី តំណែងអនុរដ្ឋលេខាធិការ នឹងត្រូវឈប់រាប់បញ្ចូល ទៅក្នុងសមាសភាពរាជរដ្ឋាភិបាលទៀតហើយ។ មិនតែប៉ុណ្ណោះ គណ:រដ្ឋមន្ត្រី ដែល
ត្រូវឆ្លងកាត់មុខសភាដើម្បីទទួលការទុកចិត្ត មានតែរដ្ឋមន្ត្រីសុទ្ធសាធហើយ គ្មានរដ្ឋលេខាធិការទេ។ នេះបើតាមច្បាប់ស្តីពីការរៀបចំ និងការប្រព្រឹត្តិទៅនៃគណៈរដ្ឋមន្ត្រីថ្មី។ អ្នកវិភាគ ស្រាវជ្រាវផ្នែកសង្គម និងនយោបាយមួយចំនួន យល់ថា សមាសភាពនៃគណៈរដ្ឋមន្ត្រីថ្មី គួរតែមានការផ្លាស់ប្តូរខ្លះ ដើម្បីបង្កើនប្រសិទ្ធិភាពការងាររបស់រដ្ឋាភិបាលអណត្តិថ្មី ឲ្យកាន់តែប្រសើរជាងមុន។
ប៉ុន្តែលោកសុខ ឥសាន្ត អ្នកនាំពាក្យគណបក្សប្រជាជនកម្ពុជា អះអាងថាសមាសភាពក្នុងគណៈរដ្ឋមន្ត្រីថ្មី ត្រូវបានលោកហ៊ុន សែន ជ្រើសរើសយ៉ាងផ្ចិតផ្ចង់ ដោយសារលោកមានបទពិសោធន៍យូរឆ្នាំ ក្នុងការដឹកនាំប្រទេសជាតិ ដូច្នេះការជ្រើសរើសនោះ ប្រាកដជាមិនខុសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ