Heritage Foundation៖ តុលាការមិនឯករាជ្យជាផ្នែកមួយធ្វើឲ្យពិន្ទុសេរីភាពសេដ្ឋកិច្ចកម្ពុជាធ្លាក់ចុះ
នៅថ្ងៃទី ១០កុម្ភៈ មូលនិធិ ដែលមានមូលដ្ឋាននៅសហរដ្ឋអាមេរិកឈ្មោះ the Heritage Foundation បានចេញផ្សាយរបាយការណ៍ស្តីពីសន្ទស្សន៍សេរីភាពសេដ្ឋកិច្ចពិភពលោកក្នុងឆ្នាំ២០១៨ ដោយបានបង្ហាញថា ចំណាត់ថ្នាក់សេរីភាពសេដ្ឋកិច្ចកម្ពុជា ធ្លាក់ចុះពីលេខ ៩៤ ទៅដល់លេខ ១០១។ ហើយបើគិតពីពិន្ទុសេរីភាពសេដ្ឋកិច្ចក្នុងតំបន់វិញ គឺកម្ពុជាស្ថិតនៅក្នុងចំណាត់លេខ ២២ ក្នុងចំណោម ៤៣ប្រទេស នៅតំបន់អាស៊ីប៉ាស៊ីហ្វិក។ តាមរបាយការណ៍ដដែល ពិន្ទុសេរីភាពសេដ្ឋកិច្ចកម្ពុជានៅឆ្នាំ ២០១៨ ធ្លាក់ចុះ០.៨ពិន្ទុ បើប្រៀបធៀបនឹងឆ្នាំ ២០១៧ ដោយសារតែភាពទន់ខ្សោយនៃសិទ្ធិអចលទ្រព្យ សេរីភាពការងារ សុខភាពសារពើពន្ធ ហើយក្នុងនោះក៏បូករួមនឹងប្រព័ន្ធតុលាការមិនឯករាជ្យផងដែរ។
ចុះផ្សាយនៅថ្ងៃ៖
ស្តាប់ - ០១:៥៨
សិទ្ធិដីធ្លី វិវាទដីធ្លី នៅតែជាបញ្ហាស្មុកស្មាញ ដល់កម្មសិទ្ធិបញ្ញា ហើយដោយសារតែអំពើពុករលួយនៃការកាត់ក្តីរបស់តុលាការ ដែលមិនឯករាជ្យផងនោះ វាបានធ្វើឲ្យពិន្ទុនៃស្ថានភាពសេរីភាពសេដ្ឋកិច្ចនៅកម្ពុជា ត្រូវបានធ្លាក់ចុះ។ ពិន្ទុចំណាត់ថ្នាក់សេរីភាពសេដ្ឋកិច្ចរបស់កម្ពុជា នាំមុខតែប្រទេស២ប៉ុណ្ណោះ ក្នុងតំបន់អាស៊ាន គឺប្រទេសឡាវ ដែលឈរនៅលេខរៀង ទី ១៣៨ និងប្រទេសវៀតណាម ដែលស្ថិតនៅលេខ ១៤៤។ ប៉ុន្តែប្រទេសកម្ពុជា នៅឆ្ងាយដាច់ពីប្រទេសជិតខាងថៃ ដែលស្ថិតនៅចំណាត់ថ្នាក់ទី ៥៣ និងម៉ាឡេស៊ី ដែលឈរនៅលេខរៀងទី ២២។ នេះបើតាម the Heritage Foundation។
របាយការណ៍របស់ the Heritage Foundation បានបន្តថា «អំពើពុករលួយ កើនឡើងមានជាទូទៅ នៅតែជាឧបសគ្គខ្លាំងបំផុតចំពោះការអភិវឌ្ឍសេដ្ឋកិច្ច និងស្ថិរភាពសង្គម»។ ការពិតទៅ ពិន្ទុលើប្រសិទ្ធភាពប្រព័ន្ធតុលាការ និងសុចរិតភាពរបស់រដ្ឋាភិបាល បានកើនឡើងកាលពីឆ្នាំមុន ប៉ុន្តែវានៅតែស្ថិតនៅក្រោមកម្រិតមធ្យមក្នុងពិភពលោក និងតំបន់។
ត្រង់ចំនុចនេះ លោកព្រាប កុល នាយកប្រតិបត្តិអង្គការតម្លាភាពកម្ពុជា ដែលជាអង្គការប្រឆាំងអំពើពុករលួយ បានឯកភាព និងមើលឃើញភាពពុករលួយធ្ងន់ធ្ងរ ពិតជាបានជះឥទ្ធិពលអវិជ្ជមាន ដល់វិស័យសេដ្ឋកិច្ច ហើយធ្វើឲ្យស្ថានភាពកាន់តែមិនប្រសើរ។ តាមលោកព្រាប កុល នៅពេលដែលប្រព័ន្ធយុត្តិធម៌ ក្នុងប្រទេសមួយ មិនឯករាជ្យ វាបានធ្វើឲ្យទីលានប្រកួតប្រជែងអាជីវកម្ម មិនស្មើភាព ព្រោះថានៅពេលមានវិវាទពាណិជ្ជកម្ម អ្នកដែលមានឥទ្ធិពល មានអ្នកនយោបាយជាន់ខ្ពស់ជាខ្នងបង្អែក គេនឹងឈ្នះក្តី ខណៈអ្នកជំនួញធម្មតាមិនមានអ្នកអាងកាង នឹងត្រូវចាញ់ប្រៀបគេ ទោះបីជាខ្លួនបានធ្វើស្របតាមច្បាប់ក៏ដោយ។
គួររម្លឹកជូនថា កាលពីសប្តាហ៍មុន អង្គការ World Justice Project ដែលមានមូលដ្ឋាននៅសហរដ្ឋអាមេរិកដែរ ក៏បានចេញផ្សាយរបាយការណ៍ប្រចាំឆ្នាំស្តីពីសន្ទស្សន៍នីតិរដ្ឋ ដោយបានវាយតម្លៃថា នីតិរដ្ឋនៅកម្ពុជា ក្នុងឆ្នាំ ២០១៧-២០១៨ មានចំណាត់ថ្នាក់ទី១១២ លើ១១៣ប្រទេស។ ហើយក្នុងនោះ បញ្ហាយុត្តិធម៌សង្គម គឺអន់ជាងគេក្នុងចំណោម១១៣ប្រទេស ដោយស្ថិតនៅលើប្រទេសវេណេស៊ុយអេឡាតែមួយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ