ចិនជំរុញឲ្យអ៊ីរ៉ង់សហការជាមួយទីភ្នាក់ងារថាមពលបរមាណូអន្តរជាតិ
នៅថ្ងៃសុក្រនេះ ទីភ្នាក់ងារថាមពលបរមាណូអន្តរជាតិ (AIEA) បានបើកកិច្ចចរចាសាជាថ្មីម្តងទៀតជាមួយអ៊ីរ៉ង់ ដើម្បីជជែកអំពីការបើកឲ្យមន្រ្តីអធិការកិច្ចរបស់ AIEA ចូលទៅពិនិត្យទីតាំងមួយចំនួន នៅអ៊ីរ៉ង់ ដែលគេសង្ស័យថា មានកម្មវិធីនុយក្លេអ៊ែរយោធា។ នៅប្រទេសចិនឯណោះវិញ លោកហ៊ូ ជិនតាវ បានអំពាវនាវឲ្យអ៊ីរ៉ង់សហការជាមួយនឹងទីភ្នាក់ងារ AIEA។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
កិច្ចចរចាត្រូវបានបើកធ្វើ នៅក្នុងទីក្រុងវីយ៉ែន ប្រទេសអូទ្រីស។ អ្វីដែល AIEA ទាមទារចង់បាន នៅក្នុងការចរចានេះ គឺ ចង់ឲ្យអ៊ីរ៉ង់បើកសិទ្ធិឲ្យមន្រ្តីអធិការកិច្ចនុយក្លេអ៊ែរ ចូលទៅត្រួតពិនិត្យទីកន្លែងសំខាន់ៗមួយចំនួន ដែលគេសង្ស័យថា មានកម្មវិធីនុយក្លេអ៊ែរយោធា។ ទីតាំងដែល AIEA ចាប់អារម្មណ៍ជាងគេ គឺមូលដ្ឋានយោធា Parchin ដែលគេសង្ស័យថាជាទីតាំង ដែលអ៊ីរ៉ង់ធ្វើការសាកល្បងគ្រឿងផ្ទុះមួយចំនួន ដែលគេប្រើសម្រាប់ផលិតអាវុធនុយក្លេអ៊ែរ។
ទីភ្នាក់ងារ AIEA បានអះអាងថា អាជ្ញាធរអ៊ីរ៉ង់បានរារាំងមិនឲ្យមន្រ្តីអធិការកិច្ចរបស់ AIEA ចូលទៅក្នុងមូលដ្ឋានយោធា Parchin នៅក្នុងដំណើរទស្សនកិច្ចពីរលើក កាលពីខែមករា និងកុម្ភៈ។ កាលពីខែឧសភាកន្លងទៅនេះ AIEA បានចេញផ្សាយរបាយការណ៍មួយ ដោយលើកឡើងថា រូបភាពថតតាមផ្កាយរណបបង្ហាញឲ្យឃើញអំពីសកម្មភាពខុសប្រក្រតី នៅ Parchin ជាពិសេស គឺការរុះរើអគារចំនួនពីរ និងសកម្មភាពផ្សេងទៀត ដែលមើលទៅទំនងជាការលាងសម្អាត ដើម្បីបំបាត់ដាននុយក្លេអ៊ែរនៅទីនោះ។
គួររំឭកឡើងវិញថា អ៊ីស្រាអែល និងប្រទេសលោកខាងលិចសង្ស័យថា អ៊ីរ៉ង់កំពុងអភិវឌ្ឍកម្មវិធីនុយក្លេអ៊ែរ ក្នុងគោលដៅយោធា។ ចំណែកអ៊ីរ៉ង់វិញអះអាងថា កម្មវិធីនុយក្លេអ៊ែររបស់អ៊ីរ៉ង់ គឺធ្វើឡើង ក្នុងគោលដៅស៊ីវិលប៉ុណ្ណោះ មិនមែនដើម្បីផលិតអាវុធនុយក្លេអ៊ែរនោះទេ។
មន្រ្តីទីភ្នាក់ងារ AIEA បានលើកឡើងថា ប្រសិនបើមន្រ្តីអធិការកិច្ច AIEA មិនអាចចូលទៅពិនិត្យមូលដ្ឋានទ័ព Parchin និងជួបជាមួយមនុស្សសំខាន់ៗមួយចំនួនរបស់អ៊ីរ៉ង់ ដែលពាក់ព័ន្ធនឹងកម្មវិធីនុយក្លេអ៊ែរទេនោះ ខ្លួនមិនអាចអះអាងឲ្យប្រាកដបានទេថា កម្មវិធីនុយក្លេអ៊ែររបស់អ៊ីរ៉ង់ពិតជាធ្វើឡើងក្នុងគោលដៅស៊ីវិលពិតមែន។
នៅថ្ងៃសុក្រនេះ ក្នុងពេលជួបជជែកជាមួយប្រធានាធិបតីអ៊ីរ៉ង់ នៅប៉េកាំង លោកហ៊ូ ជិនតាវ បានជំរុញឲ្យអ៊ីរ៉ង់សហការជាមួយទីភ្នាក់ងារ AIEA ។ នេះបើយោងតាមទីភ្នាក់ងារព័ត៌មានចិនស៊ីនហួ។ លោកហ៊ូ ជិនតាវ ក៏បានអំពាវនាវផងដែរឲ្យអ៊ីរ៉ង់បង្ហាញនូវភាពទន់ភ្លន់ក្នុងពេលចរចាជាមួយប្រទេសមហាអំណាច ៥ បូក ១ (អាមេរិក អង់គ្លេស បារាំង ចិន និងរុស្ស៊ី ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខ បូកជាមួយនឹងអាល្លឺម៉ង់) នៅថ្ងៃទី១៨ និង១៩ មិថុនាខាងមុខ នៅក្នុងទីក្រុងម៉ូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ