អាមេរិកជួយពង្រឹងទាហានរបស់ប្រទេសដែលស្ថិតនៅជិតខាងចិន
អាមេរិកជំរុញចំណងមិត្តភាពយោធាជាមួយប្រទេសម៉ុងហ្គោលី ដែលស្ថិតនៅជាប់ជិតខាងជាមួយចិន។ កាលពីថ្ងៃព្រហស្បតិ៍ រដ្ឋមន្រ្តីការពារជាតិអាមេរិក លោកChuck Hagel បានចុះហត្ថលេខារួមជាមួយសមភាគីម៉ុងហ្គោលីលើសេចក្តីថ្លែងការណ៍ស្តីពីចក្ខុវិស័យរួមគ្នាមួយ ដើម្បីពង្រឹងចំណងយោធារវាងប្រទេសទាំងពីរ។
ចុះផ្សាយនៅថ្ងៃ៖
ជាមួយសមភាគីអាមេរិក រដ្ឋមន្រ្តីការពារជាតិម៉ុងហ្គោលី បានចុះហត្ថលេខាលើសេចក្តីថ្លែងការណ៍ដែលមានគោលដៅ ពង្រីកសហប្រតិបត្តិការយោធារួមគ្នា ជាពិសេសផ្នែកបណ្តុះបណ្តាល និងជំនួយយោធា។
នៅក្នុងសន្និសីទកាសែត កាលពីថ្ងៃព្រហស្បតិ៍ លោករដ្ឋមន្រ្តីការពារជាតិ អាមេរិក បានបញ្ជាក់ថា ចំណងមិត្តភាពយោធាអាមេរិក ម៉ុងហ្គោលីមានសារៈសំខាន់ សម្រាប់ការឈរ បោះទីតាំងរបស់អាមេរិក នៅអាស៊ី ប៉ាស៊ីហ្វិក។ អាមេរិកឈរជើង ប្រឈមនឹងការពង្រីកឥទ្ធិពលរបស់ចិន នៅអាស៊ី ប៉ាស៊ីហ្វិក គឺជាយុទ្ធសាស្រ្តយោធាអាទិភាពរបស់លោកប្រធានាធិបតីអាមេរិក បារ៉ាក់ អូបាម៉ា។
បើទោះបីជាសេចក្តីថ្លែងការណ៍លើកនេះ ធ្វើឡើងតែនៅលើក្រដាស ប៉ុន្តែ វាអាចធ្វើឲ្យទីក្រុងប៉េកាំងក្តៅចុងច្រមុះ។ ក្នុងក្រសែភ្នែកចិន ទីក្រុងវ៉ាស៊ីនតោនកំពុងរំលោភចូលក្នុងដែនឥទ្ធិពលរបស់ចិន តាមរយៈការព្យាយាមពង្រីកចំណងសម្ព័ន្ធភាពយោធារបស់ខ្លួន ជាមួយបណ្តាប្រទេសនៅអាស៊ី តូចៗ ដែលស្ថិតនៅជិតខាងប្រទេសចិន។
សូមរំលឹកថា ចាប់តាំងពីចាកចេញពីរបបកុម្មុយនិស្តនៅឆ្នាំ ១៩៩០ ម៉ុងហ្គោលីបានចូលរួមក្នុងសកម្មភាពរក្សាសន្តិភាពរបស់អង្គការសហប្រជាជាតិ។ ប្រទេសនេះ ដែលមានទីតាំងភូមិសាស្រ្ត រុំព័ទ្ធដោយចិន និងរុស្ស៊ី ចាប់ផ្តើមចងចំណងយោធាជាមួយអាមេរិក។ កងទ័ពម៉ុងហ្គោលី បានចូលរួមក្នុងកងទ័ពពិសេសដែលដឹកនាំដោយអាមេរិក នៅក្នុងសង្រ្គាមអ៊ីរ៉ាក់ និងអាហ្វហ្កានីស្ថាន។ ក្នុងមួយឆ្នាំៗ សហរដ្ឋអាមេរិក ផ្តល់ថវិកាប្រមាណ២លានដុល្លារសម្រាប់យានយន្ត និងទូរគមនាគមន៍យោធាម៉ុងហ្គោលី។ អាមេរិកនៅចំណាយ១លានដុល្លារបន្ថែមទៀត ដើម្បីបណ្តុះបណ្តាលទាហានម៉ុងហ្គោលី ១ម៉ឺននាក់។
នៅក្នុងសន្និសីទកាសែតរួមជាមួយសមភាគីអាមេរិក រដ្ឋមន្រ្តីការពារជាតិម៉ុងហ្គោលីបានបញ្ជាក់ថា សេចក្តីថ្លែងការណ៍និយាយត្រឹមចំណងយោធា ផ្នែកបណ្តុះបណ្តាល ប៉ុន្តែ នឹងគ្មានការបោះទីតាំងយោធារបស់អាមេរិក ក្នុងទឹកដីម៉ុងហ្គោលី ដូចដែលអាមេរិកបានធ្វើ នៅជប៉ុន និងនៅកូរ៉េខាងត្បូងឡើយ។ នៅក្នុងជម្លោះទឹកដីនៅសមុទ្រចិនខាងកើត និងខាងត្បូង អាមេរិកបានព្រមានទីក្រុងប៉េកាំង ដោយប្រយោល គ្មានប្រទេសណាមួយដែលប្រើកម្លាំងបាយដើម្បីកំណត់ដែនទឹកដីរបស់ខ្លួននោះទេ។ រដ្ឋមន្រ្តីការពារជាតិអាមេរិកបានស្បថផងដែរថា អាមេរិកនឹងបន្តជួយផ្នែកយោធាដល់សម្ព័ន្ធមិត្តរបស់ខ្លួន គឺហ្វីលីពីន និងជប៉ុន ដែលកំពុងឈ្លោះជាមួយទីក្រុងប៉េកាំង នៅសមុទ្រចិនខាងត្បូង និងខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ