ក្តីសង្ឃឹមមានតិចតួច ក្នុងការជួយជនភៀសខ្លួនដែលរងគ្រោះក្រឡាប់ទូក ជិតឆ្នេរអេហ្ស៊ីប
ក្នុងការស្វែងរកជនភៀសខ្លួនដែលរងគ្រោះក្នុងការក្រឡាប់កប៉ាល់នេសាទ នៅសមុទ្រមេឌីទែរ៉ាណេ ជិតឆ្នេរអេហ្ស៊ីប ក្តីសង្ឃឹមជួយពួកគេពេលនេះ គឺមានតិចតួចណាស់។ ទូកនេសាទដែលក្រឡាប់លិចនេះ ដឹកមនុស្សរហូត៤៥០នាក់ បានលិច នៅសមុទ្រមេឌីទែររ៉ាណេ កាលពីថ្ងៃពុធ ធ្វើអោយមានមនុស្សស្លាប់យ៉ាងហោច៤២នាក់។ តួលេខមនុស្សស្លាប់អាចកើនឡើងច្រើនជាងនេះ។ មនុស្ស១៦៣នាក់ ត្រូវបានសង្គ្រោះនៅឆ្នេរខាងជើងអេហ្ស៊ីប នៅRosette ក្រុងឆ្នេរភាគខាងជើងអេហ្ស៊ីប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
កាលពីថ្ងៃពុធ កប៉ាល់នេសាទមួយគ្រឿង បានដឹកជនភៀសខ្លួនរហូត៤៥០នាក់ បានក្រឡាប់លិច នៅជិតឆ្នេរប្រទេសអេហ្ស៊ីប។ ជនភៀសខ្លួនភាគច្រើន ស្ថិតក្នុងបាតកប៉ាល់ នៅកន្លែងដែលគេទុកត្រី។
មនុស្សប្រមាណ១៦៣នាក់ ត្រូវបានជួយសង្គ្រោះអោយរួចជីវិត។ ជនភៀសខ្លួនដែលរួចផុតពីការស្លាប់ បានអះអាងថា កប៉ាល់នោះដឹកមនុស្សច្រើនពេក ទើបបានជាក្រឡាប់លិច ទៅ ក្នុងទឹក។ យោងតាមកងទ័ពអេហ្ស៊ីប ក្នុងចំណោមជនភៀសខ្លួនដែលគេសង្គ្រោះអោយរួចជីវិត ភាគច្រើន ជាពលរដ្ឋអេហ្ស៊ីប តែក៏មានពលរដ្ឋស៊ូដង់ សូម៉ាលី និងស៊ីរីដែរ។
អេហ្ស៊ីបបានក្លាយជាទីកន្លែងដែលជនភៀសខ្លួន ដៅយក ដើម្បីធ្វើដំណើរចេញទៅទ្វីបអឺរ៉ុប។ ជនភៀសខ្លួនបានបង់លុយកាក់សន្ធឹកសន្ធាប់ដល់ឈ្មួញខុសច្បាប់ ដើម្បីអាចឆ្លងសមុទ្រមេឌីទែររ៉ាណេបាន។ តាំងពីកំឡុងដើមឆ្នាំមក ក្រុមល្បាតឆ្នេរអេហ្ស៊ីបបានស្ទាក់ចាប់ទូកដឹកមនុស្ស និងបានជួយសង្គ្រោះមនុស្សរាប់រយនាក់។
យោងតាម ទីភ្នាក់ងារត្រួតពិនិត្យព្រំដែនអឺរ៉ុប ហ្វ្រុងតិច ឆ្នាំ២០១៦នេះ កប៉ាល់ឈ្មួញដឹកជនភៀសខ្លួនបានចេញពីអេហ្ស៊ីប ឆ្លងសមុទ្របានប្រហែលជា១០០០ជើងហើយ។ ទីភ្នាក់ងារហ្វ្រុងតិចគូសបញ្ជាក់ទៀតថា តាំងពីគេបិទផ្លូវតំបន់បាល់កង់មិនអោយជនភៀសខ្លួនឆ្លងកាត់មក ជនភៀសខ្លួនបាននាំគ្នាចាប់ផ្តើម ធ្វើដំណើរចេញពីឆ្នេរអាហ្វ្រិកខាងជើង ពិសេសចេញពីលីប៊ី ឆ្ពោះទៅអ៊ីតាលីវិញ។
តាំងពីឆ្នាំ២០១៤មក ជនភៀសខ្លួនជាង១ម៉ឺននាក់ បានស្លាប់នៅសមូទ្រមេឌីទែររ៉ាណេ គិតតាំងពីដើមឆ្នាំ២០១៦មក គឺមានជាង៣២០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ