រដ្ឋអាជ្ញាតុលាការព្រហ្មទណ្ឌសុំបើកអង្កេតលើសង្គ្រាមហ្ស័កហ្ស៊ីនិងរុស្ស៊ី
រដ្ឋអាជ្ញានៃតុលាការព្រហ្មទណ្ឌអន្តរជាតិ បានស្នើសុំនៅថ្ងៃអង្គារម្សិលមិញ ការអនុញ្ញាតពីចៅក្រម ដើម្បីបើកអង្កេតលើសំណុំរឿងសង្គ្រាម រវាងហ្ស័កហ្ស៊ី និងរុស្ស៊ី ដែលជាអ្នកត្រួតត្រាតំបន់អូសេទីតខាងត្បូង កាលពីខែសីហា ឆ្នាំ២០០៨។ នេះបើតាមប្រភពព័ត៌មានតុលាការព្រហ្មទណ្ឌអន្តរជាតិ។ ប្រសិនបើតុលាការយល់ព្រម នេះជាការអង្កេតក្តីដំបូងដែលមិនមែនជាវិបត្តិនៅទ្វីបអាហ្វ្រិក។
ចុះផ្សាយនៅថ្ងៃ៖
លោកស្រី រដ្ឋអាជ្ញា ហ្វាទូ បេនស៊ូដា Fatou Bensouda បានដាក់ពាក្យ ជាផ្លូវការ សុំទៅចៅក្រម បើកអង្កេតស្តីពីសង្គ្រាមមួយឆាប រវាងហ្ស័កហ្ស៊ី និងរុស្ស៊ី ថាអាចមានបទឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិ។ បើតាមសេចក្តីថ្លែងការណ៍របស់តុលាការព្រហ្មទណ្ឌអន្តរជាតិ លោកស្រីរដ្ឋអាជ្ញា ចង់ធ្វើការអង្កេត រាល់សកម្មភាព នៅរវាងពីថ្ងៃទី ១ កក្កដា ដល់ថ្ងៃទី១០តុលា ២០០៨។
រុស្ស៊ី និងហ្ស័កហ្ស៊ី បានធ្វើសង្គ្រាមបង្ហូរឈាម អស់រយៈពេល៥ថ្ងៃ កាលពីខែសីហា ឆ្នាំ២០០៨។ ជ័យជំនះបានធ្លាក់លើដៃរុស្ស៊ី ដោយបានច្បាមកាន់កាប់តំបន់អូសេទីតខាងត្បូង បន្ទាប់មកម៉ូស្គូ ក៏បានប្រកាសទទួលស្គាល់ឯករាជភាពដែនដីនេះ។
ជាសង្គ្រាមតែមួយឆាបមែន ប៉ុន្តែបើតាមលោកស្រីរដ្ឋអាជ្ញា ការខូចខាតមានច្រើន មានទាំងការលួចប្លន់ អគ្គីភ័យ ការបំផ្លិចបំផ្លាញបណ្តេញប្រជាពលរដ្ឋដើមកំណើតហ្ស័កហ្ស៊ីឱ្យចេញពីទឹកដីអូសេទីតខាងត្បូង។ ពលរដ្ឋហ្ស័កហ្ស៊ីប្រមាណពី ១៣៤០០ ទៅ១៨៥០០នាក់ ត្រូវភៀសខ្លួនដោយបង្ខំ ហើយផ្ទះសម្បែងជាង៥ពាន់ខ្នងត្រូវកម្ទេច។ ប្រភពដដែលនេះ បានអះអាងថា ប្រជាជនហ្ស័កហ្ស៊ីនៅតំបន់នេះត្រូវបានកម្ចាត់អស់ប្រមាណជាង៧៥%។
ជនស៊ីវិលប្រមាណពី ៥១ ទៅ១១៣នាក់ បានបាត់បង់ជីវិត នៅក្នុងយុទ្ធនាការកម្ចាត់ពួកហ្ស័កហ្ស៊ី របស់អាជ្ញាធរផ្តាច់ការអូសេទីតខាងត្បូង និងទំនងដោយមានកងកម្លាំងយោធារុស្ស៊ីជាអ្នកជួយជ្រោមជ្រែងពីក្រោយផង។
លោកស្រីរដ្ឋអាជ្ញា ក៏ចង់បើកអង្កេតជុំវិញ ការវាយប្រហារប្រឆាំងនឹងទាហានរកទាហានរក្សាសន្តិសុខ ពីសំណាក់ទាហានអូសេទីតខាងត្បូង និងទាហានហ្ស័កហ្ស៊ីផងដែរ។ ហ្ស័កហ្ស៊ី ដែលបានចោទប្រកាន់ម៉ូស្គូថាបានដឹកនាំសង្គ្រាមបោសសម្អាតជាតិពិន្ធុ ជារដ្ឋសមាជិករបស់តុលាការព្រហ្មទណ្ឌអន្តរជាតិដែរ ទើបស្ថាប័ននេះអាចមានសមត្ថកិច្ចបើកអង្កេតលើឧក្រិដ្ឋកម្មក្នុងទឹកដីនេះបាន។
តុលាការព្រហ្មទណ្ឌនេះ ជាតុលាការអន្តរជាតិអចិន្ត្រៃយ៍ កាត់ក្តីតែលើសំណុំរឿងឧក្រិដ្ឋធ្ងន់ធ្ងរ ដែលតុលាការជាតិ មិនអាច ឬមិនចង់ ប្តឹងផ្តល់ប្រឆាំងនឹងមេដឹកនាំរបស់ខ្លួន។ តុលាការនេះ មានបើកអង្កេតសំណុំរឿងឧក្រិដ្ឋកម្មសង្គ្រាមច្រើន តែភាគច្រើនជាវិបត្តិនៅអាហ្វ្រិក។ ប្រសិនបើសំណើរបស់រដ្ឋអាជ្ញាបានសម្រេច ការអង្កេតលើសង្គ្រាមរុស្ស៊ី-ហ្ស័កហ្ស៊ី នឹងក្លាយជាសំណុំរឿងដំបូងក្រៅទ្វីបអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ