យន្តហោះអ៊ីស្រាអែលបាញ់ប្រហារទីតាំងយោធាស៊ីរី ក្រោយមរណភាពក្មេងជំទង់អ៊ីស្រាអែល
នៅយប់ថ្ងៃអាទិត្យម្សិលមិញ យន្តហោះអ៊ីស្រាអែលបានបាញ់រះទីតាំងស៊ីរីជាច្រើនកន្លែង ដើម្បីសងសឹកនឹងការបាញ់ប្រហាររបស់កងទ័ពស៊ីរី ដែលបានសម្លាប់ក្មេងជំទង់អ៊ីស្រាអែលម្នាក់ កាលពីថ្ងៃអាទិត្យ នៅខ្ពង់រាបហ្កូឡង់។ អ៊ីស្រាអែលប្រាប់ថា ការបាញ់សងសឹកទៅស៊ីរីវិញនេះ មិនបានបង្កអោយមានជនរងគ្រោះទេ។ ការប៉ះទង្គិចតាមព្រំដែនរវាងអ៊ីស្រាអែលនិងស៊ីរីចាប់តានតឹងខ្លាំង តាំងពីស៊ីរីធ្លាក់ក្នុងវិបត្តិសង្គ្រាមឆ្នាំ២០១១មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
នៅយប់ថ្ងៃអាទិត្យម្សិលមិញ ឈានចូលព្រឹកថ្ងៃចន្ទនេះ កងទ័ពអ៊ីស្រាអែលបានប្រើយន្តហោះបាញ់ចំទីតាំងស៊ីរីចំនួន៩កន្លែង ក្នុងនោះមានទីបញ្ជាការដ្ឋានយោធាកងទ័ពស៊ីរីជាច្រើនកន្លែង។ អ៊ីស្រាអែលប្រាប់ថា គ្មានជនរងគ្រោះក្នុងការបាញ់ប្រហារនេះទេ។
អ៊ីស្រាអែលចង់សងសឹកនឹងការបាញ់ប្រហារពីសំណាក់ស៊ីរី កាលពីព្រឹកថ្ងៃអាទិត្យម្សិលមិញ ដែលបានធ្វើអោយក្មេងជំទង់ម្នាក់អាយុ១៣ឆ្នាំ បាត់បង់ជីវិត។ ព្រឹកម្សិលមិញ ក្មេងជំទង់រូបនេះ ស្ថិតក្នុងរថយន្តមួយគ្រឿង ជាមួយឳពុកគេ ព្រមទាំងបុរសម្នាក់ទៀត នៅតំបន់ខ្ពង់រាបហ្កូឡង់។ រថយន្តនោះបានផ្ទុះឡើង ធ្វើអោយកុមារអ៊ីស្រាអែលរូបនោះស្លាប់ ហើយបុរសទាំង២ រូបរងរបួស។ គួរបញ្ជាក់ថា ឳពុករបស់ក្មេងប្រុសរូបនោះ រួមនិងបុរសរួមរថយន្តនោះ បំរើការអោយក្រសួងការពារជាតិអ៊ីស្រាអែល។ អ៊ីស្រាអែលចោទស៊ីរីថា ប៉ុនប៉ងបាញ់ប្រហាររថយន្តជនស៊ីវិល។ នាយករដ្ឋមន្ត្រីអ៊ីស្រាអែល បេនយ៉ាមីន នេតាយ៉ាហ៊ូ បានថ្កោលទោសការបាញ់ប្រហាររបស់កងទ័ពស៊ីរី។
គួររំលឹកថា តំបន់ខ្ពង់រាបហ្កូឡង់ ដែលមានហេតុការណ៍បាញ់ប្រហារពីសំណាក់ស៊ីរី ដើមឡើយជាដែនដីភាគខាងត្បូងស៊ីរី។ អ៊ីស្រាអែលបានកាន់កាប់តំបន់នេះ តាំងពីឆ្នាំ១៩៦៧មក ក្រោយបានធ្វើសង្គ្រាមជាមួយអេហ្ស៊ីប ហ្សកដានី និងស៊ីរី។ អ៊ីស្រាអែលបានដាក់ផ្ទៃដីតំបន់១២០០គីឡូម៉ែត្រការេ ចូលជាឧបសម្ព័ន្ធ ទោះជាសហគមន៍អន្តរជាតិមិនទទួលស្គាល់ក្តី។ រីឯស៊ីរីគ្រប់គ្រងផ្ទៃដីសេសសល់ ប្រមាណ៥១០គីឡូម៉ែត្រការេ។ គួរបញ្ជាក់ដែរថា អ៊ីស្រាអែលនិងស៊ីរីស្ថិតក្នុងស្ថានភាពសង្គ្រាមជាមួយគ្នា ជាផ្លូវការ។
ហេតុការណ៍ប៉ះទង្គិចរវាងអ៊ីស្រាអែលនិងស៊ីរី ថ្ងៃអាទិត្យម្សិលមិញ ជាហេតុការណ៍គួរអោយកត់សម្គាល់ខ្លាំង នៅព្រំដែនជាមួយស៊ីរី គិតចាប់ពីពេលមានសង្គ្រាមស៊ីវិលមក។ គេនៅចាំបានថា កាលពីខែមិនា កងទ័ពអ៊ីស្រាអែលបានទំលាក់គ្រាប់បែកលើទីតាំងកងទ័ពស៊ីរីជាច្រើនកន្លែងផងដែរ បន្ទាប់ពីមានការផ្ទុះគ្រាប់បែក បង្ករបួសដល់ទាហានអ៊ីស្រាអែល៤រូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ