ឥណ្ឌាផ្ដល់សច្ចាប័នលើកិច្ចព្រមព្រៀងក្រុងប៉ារីសស្ដីពីការប្រែប្រួលអាកាសធាតុ
នៅថ្ងៃអាទិត្យទី២តុលានេះ ឥណ្ឌា បានផ្ដល់សច្ចាប័នលើកិច្ចព្រមព្រៀងក្រុងប៉ារីសស្ដីពីការប្រែប្រួលអាកាសធាតុ។ នេះគឺជាដំណឹងមួយដ៏ល្អ ព្រោះឥណ្ឌាជាប្រទេសបញ្ចេញឧស្ម័នពុលច្រើនជាងគេទី៣នៅលើលោក បន្ទាប់ពីចិននិងអាមេរិក។ ការបោះជំហានថ្មីរបស់ឥណ្ឌានាថ្ងៃនេះ កំពុងតែធ្វើឲ្យកិច្ចព្រមព្រៀងស្ដីពីការកាត់បន្ថយកំដៅផែនដី រំកិលទៅរកការពិតជាបណ្ដើរៗហើយ ខណៈអង្គការសហប្រជាជាតិចង់ឲ្យកិច្ចព្រមព្រៀងនេះ ចូលជាធរមានជាស្ថាពរឲ្យបាននៅមុនដំណាច់ឆ្នាំ២០១៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ថ្វីត្បិតតែសម្រេចផ្ដល់សច្ចាប័នជាផ្លូវការលើកិច្ចព្រមព្រៀងទីក្រុងប៉ារីសស្ដីពីការប្រែប្រួលអាកាសធាតុក៏ពិតមែន ប៉ុន្តែឥណ្ឌាមិនបានសន្យាថានឹងទប់ស្កាត់ ឬកាត់បន្ថយការបញ្ចេញឧស្ម័នពុលរបស់ខ្លួនទាំងស្រុងដូចប្រទេសមួយចំនួនទៀតទេ។ ផ្ទុយទៅវិញ ឥណ្ឌាបានបញ្ជាក់ពីការតាំងចិត្តរបស់ខ្លួនថា នឹងបង្កើនការប្រើប្រាស់ថាមពលបៃតង និងកាត់បន្ថយបំភាយឧស្ម័នពុលទាក់ទងទៅនឹងផលិតផលក្នុងស្រុករបស់ខ្លួនឲ្យបាន៣៥ភាគរយនៅឆ្នាំ២០៣០ ពីកម្រិតឧស្ម័នពុលដែលខ្លួនបានបញ្ចេញទៅក្នុងបរិយាកាសនៅឆ្នាំ២០០៥។ នេះមានន័យថា ការបញ្ចេញឧស្ម័នពុលនៅឥណ្ឌានឹងនៅតែកើនឡើងដដែល ប៉ុន្តែក្នុងល្បឿនយឺតជាងមុន។
យ៉ាងណាក៏ដោយ ការបោះជំហានថ្មីរបស់ឥណ្ឌានាថ្ងៃនេះ កំពុងតែធ្វើឲ្យកិច្ចព្រមព្រៀងស្ដីពីការកាត់បន្ថយកំដៅផែនដី រំកិលទៅរកការពិតជាបណ្ដើរៗហើយ ខណៈអង្គការសហប្រជាជាតិចង់ឲ្យកិច្ចព្រមព្រៀងនេះ ចូលជាធរមានជាស្ថាពរឲ្យបាននៅមុនដំណាច់ឆ្នាំ២០១៦ ។ ដើម្បីឲ្យកិច្ចព្រមព្រៀងនេះចូលជាធរមាន គេត្រូវសម្រេចឲ្យបាននូវលក្ខខណ្ឌចំនួន២។ ទីមួយ គឺត្រូវឲ្យមានប្រទេសហត្ថលេខីចំនួនយ៉ាងហោចណាស់ ៥៥ប្រទេស ផ្តល់សច្ចាប័ន ដល់កិច្ចព្រមព្រៀងនេះ។ ហើយលក្ខខណ្ឌទីពីរ គឺប្រទេសទាំង៥៥នេះ ត្រូវតែជាប្រទេសដែលមានចំណែកបញ្ចេញឧស្ម័នពុល សរុបរួម យ៉ាងហោចណាស់៥៥%។ លក្ខខណ្ឌទាំងពីរនេះ គឺមិនអាចខ្វះមួយណាបានទេ។
រហូតមកទល់ពេលនេះ មានប្រទេសចំនួន៦១ហើយ ដែលបានផ្ដល់សច្ចាប័នលើកិច្ចព្រមព្រៀងក្រុងប៉ារីសស្ដីពីការប្រែប្រួលអាកាសធាតុ។ ប៉ុន្តែអត្រាបញ្ចេញឧស្ម័នពុលនៃប្រទេសទាំងអស់នេះរួមគ្នា មានកម្រិតត្រឹមតែប្រមាណ៤៨ភាគរយប៉ុណ្ណោះ។ ឥណ្ឌា ដែលទើបផ្ដល់សច្ចាប័ន បានបញ្ចេញឧស្ម័នពុលជាង៤ភាគរយ។ ដូច្នេះ គេត្រូវការការផ្ដល់សច្ចាប័នពីប្រទេសផ្សេងទៀត ជាពិសេសប្រទេសនៅសហភាពអឺរ៉ុបដែលមានសេដ្ឋកិច្ចនាំមុខ ដើម្បីរុញកិច្ចព្រមព្រៀងក្រុងប៉ារីសស្ដីពីអាកាសធាតុ ឲ្យចូលជាធរមានបាននៅចុងឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ