ប្រេសិតពិសេសរបស់ អ.ស.ប.៖លោកអាសាដជាតួអង្គមិនអាចខ្វះបានសម្រាប់ដំណោះស្រាយវិបត្តិស៊ីរី
លោកស្តាវ៉ាន មីទូរ៉ា (Staffan Mistura) ប្រេសិតពិសេសរបស់អង្គការសហប្រជាជាតិទទួលបន្ទុកសំណុំរឿងប្រទេសស៊ីរីបានគូសបញ្ជាក់នៅថ្ងៃសុក្រ ទី១៤ កុម្ភៈថា គេមិនអាចរកដំណោះស្រាយឲ្យវិបត្តិនយោបាយនៅស៊ីរីដោយគ្មានវត្តមានលោកប្រធានាធិបតីស៊ីរីអាសាដបានទេ។ លោកមីទូរ៉ាបាននិយាយយ៉ាងដូច្នេះ បន្ទាប់ពីលោកបានទៅបំពេញទស្សនកិច្ចរយៈពេល ២ថ្ងៃនៅក្នុងប្រទេសស៊ីរី។ គួររម្លឹកជូនថា វិបត្តិនយោបាយនៅស៊ីរីបានអូសបន្លាយ ៤ឆ្នំាមកហើយ និងដែលវិបត្តិដ៏រុំារ៉ៃមួយនេះបែរជាកំពុងធ្វើឲ្យអង្គការរដ្ឋអ៊ីស្លាមទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
៤ឆ្នំាក្រោយពីស៊ីរីបានធ្លាក់ក្នុងវិបត្តិនយោបាយហែកហួរគ្នាមក នេះជាលើកទី១ បង្អស់ដែលមានមន្រ្តីអង្គការសហប្រជាជាតិម្នាក់បានប្រកាសជាសាធារណៈ និងដោយចំហថា គេមិនអាចរកដំណោះស្រាយឲ្យវិបត្តិស៊ីរីដោយទាត់ចោលលោកប្រធានាធិបតីស៊ីរីអាសាដបានទេ។ បន្ទាប់ពីបានបំពេញទស្សនកិច្ចរយៈពេល ៤៨ម៉ោងនៅស៊ីរីមក លោកស្តាវ៉ាន មីទូរ៉ា (Staffan Mistura) ប្រេសិតពិសេសរបស់អង្គការសហប្រជាជាតិទទួលបន្ទុកសំណុំរឿងស៊ីរីបានអះអាងនៅក្រោយជំនួបជាមួយប្រមុខការទូតប្រទេសអូទ្រីសថា លោកប្រធានាធិបតីអាសាដត្រូវតែមានវត្តមាននៅក្នុងដំណោះស្រាយ និងថា លោកនឹងបន្តធ្វើការ និងជជែកជាមួយលោកអាសាដជាបន្តទៀត។ ការថ្លែងរបស់លោកមីទូរ៉ាពេលនេះបានធ្វើឡើង មុនពេលដែលលោកត្រូវផ្ញើរបាយការណ៍មួយស្តីពីការបិទបញ្ចប់សង្រ្គាមស៊ីវិលនៅស៊ីរីទៅឲ្យក្រុមប្រឹក្សាសន្តិសុខអង្គការសហប្រជាជាតិនៅថ្ងៃទី១៧ កុម្ភៈខាងមុខ។
ក្រៅពីបញ្ជាក់ពីវត្តមានចំាបាច់មិនអាចខ្វះបានរបស់លោកអាសាដនៅក្នុងដំណោះស្រាយ មន្រ្តីអង្គការសហប្រជាជាតិរូបនោះក៏បានលើកឡើងពីផ្លូវដំណោះស្រាយតែមួយគត់សម្រាប់ស៊ីរី គឺដំណោះស្រាយតាមផ្លូវនយោបាយ។ លោកមីទូរ៉ាបានយល់ឃើញថា បើគ្មានកិច្ចព្រមព្រៀងនយោបាយបាយទេ នោះស្ថានការណ៍អូសបន្លាយនៅស៊ីរីនឹងផ្តល់ឱកាសច្រើនណាស់ឲ្យអង្គការរដ្ឋអ៊ីស្លាម។ ចំណែកប្រមុខការទូតអូទ្រីសបានបញ្ជាក់ថា នៅក្នុងយុទ្ធនាការប្រយុទ្ធប្រឆំាងនឹងអង្គការរដ្ឋអ៊ីស្លាម គេអាចរួមសហការណ៍ជាមួយលោកអាសាដ ទោះបីជាលោកអាសាដមិនមែនជាមិត្ត ឬជាដៃគូក៏ដោយ។
គួរជម្រាបជូនថា លោកស្តាវ៉ាន មីទូរ៉ា (Staffan Mistura) ជាប្រេសិតពិសេសទី៣ របស់អង្គការសហប្រជាជាតិទទួលបន្ទុកសំណុំរឿងស៊ីរី បន្ទាប់ពីលោកកូហ្វី អាណាន់ និងលោកឡាក់ដា ប្រាហ៊ីមី។ លោកមីទូរ៉ាបានផ្តោតសំខាន់លើបទឈប់បាញ់ ពោលគឺខុសពីលោកប្រាហ៊ីមីដែលបានហៅរដ្ឋាភិបាល និងក្រុមប្រឆំាងឲ្យជួបចរចាគ្នានៅក្រុងហ្ស៊ឺណែវកាលពីដើមឆ្នំា ២០១៤ តែត្រូវបានជាប់គំាងដោយសារតែរបបដាម៉ាស់បដិសេធមិននិយាយពីជោគវាសនារបស់លោកអាសាដ។ សំណើរបស់លោកមីទូរ៉ាឲ្យបញ្ចូលលោកអាសាដនៅក្នុងដំណោះស្រាយបានផ្ទុយទំាងស្រុងនឹងឆន្ទៈរបស់សហគមន៍អន្តរជាតិទូទៅដែលចង់កំចាត់លោកអាសាដចេញពីឆាកនយោបាយស៊ីរី។ ជាការរម្លឹកឡើងវិញ សង្រ្គាមស៊ីវិលនៅស៊ីរីក្នុងរយៈពេល ៤ឆ្នំាកន្លងទៅបានបណ្តាលឲ្យមានមនុស្សស្លាប់ ២២០ ០០០នាក់ របួស ១លាននាក់ និងមានជនភៀសខ្លួន ៤លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ