ប្រេងឆៅបន្តធ្លាក់ថ្លៃ ធ្វើឲ្យទីផ្សាររំជើបរំជួល
តម្លៃប្រេងឆៅនៅលើទីផ្សារអន្តរជាតិបានបន្តធ្លាក់ថ្លៃ ដែលកាលពីល្ងាចថ្ងៃអង្គារទី១២ មករា តម្លៃប្រេងបានចុះមកនៅតែជាង៣០ដុល្លារបន្តិចតែប៉ុណ្ណោះ ក្នុងមួយធុងបារីល។ ការបន្តធ្លាក់ថ្លៃជាគំហុកបែបនេះ បានធ្វើឲ្យក្រុមប្រទេសផលិតប្រេង មានការបារម្ភ ហើយទាមទារឲ្យពិភាក្សាគ្នាដើម្បីកាត់បន្ថយចំនួនផលិត។ ប្រទេសអារ៉ាប៊ីសាអូឌីត ប្រទេសផលិតប្រេងច្រើនជាងគេ នៅតែធ្វើមិនដឹងមិនឮពីបញ្ហានេះ ដោយហេតុថាខ្លួនចង់ប្រជែងទីផ្សារ ជាមួយអ៊ីរ៉ង់ ដែលកំពុងតែត្រៀមខ្លួនបើកលក់ប្រេងជាថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ម៉ោង៦ព្រឹក ម៉ោងសកល នៅទីផ្សារអឺរ៉ុប ប្រេងឆៅបានធ្លាក់តម្លៃ មកនៅត្រឹម៣០ដុល្លារ ៤៣សេន ចំណែកនៅទីផ្សារអាមេរិកវិញ មានតម្លៃ៣០ដុល្លារ៤១សេន។ នេះជាតម្លៃទាបបំផុតមិនធ្លាប់មាន ស្ទើរតែក្បែរ៣០ដុល្លារ តម្លៃទាបបំផុតកាលពី១២ឆ្នាំមុន។ បើគិតទៅ ក្នុងឆ្នាំ២០១៥ តម្លៃប្រេងបានធ្លាក់ចុះចំនួន៣០% ហើយនៅដើមឆ្នាំ២០១៦នេះ បានបន្តធ្លាក់ចំនួន ១៥%បន្ថែមទៀត។
Christopher Dembik អ្នកជំនាញវិភាគទីផ្សារប្រេងបាននិយាយថា គ្មាននរណាម្នាក់អាចប្រាកដថា តម្លៃប្រេងនឹងមិនបន្តធ្លាក់ទៀតនោះទេ។ គ្មាននរណាអាចស្មានបានថា ប្រេងនឹងធ្លាក់ថ្លៃដល់កម្រិតណានោះដែរ។ លោកបន្តថា កាលពីប៉ុន្មានខែមុននេះ គ្មាននរណាជឿថាប្រេងនឹងសល់តែជាង៣០ដុល្លារ ក្នុងមួយធុងបារីលទេ ប៉ុន្តែពេលនេះការពិតគឺនៅនឹងមុខស្រាប់។
មានមូលហេតុជាច្រើន ដែលកំពុងធ្វើឲ្យឧស្សាហកម្មប្រេងឆៅជួបភាពរង្គោះរង្គោះ។ វិបត្តិនយោបាយនៅតាមប្រទេសផលិតប្រេង ដូចជាវ៉េណេហ្ស៊ុយអេឡា ក៏អាចជាមូលហេតុមួយផងដែរ។ ក៏ប៉ុន្តែអ្វីដែលអ្នកវិភាគយល់ស្របគ្នា គឺចំនួនផលិតវាកាន់តែលើសកំណត់ពីតម្រូវការជាក់ស្តែងលើទីផ្សារ ដែលការនេះជម្រុញឲ្យតម្លៃកាន់តែថយចុះ។ ការប្រកួតប្រជែង ក្នុងវិស័យថាមពល រវាងការផលិតប្រេងឆៅ ការផលិតហ្គាសធម្មជាតិ និងឧស្ម័នហ្គាសឈីស្ត៍ ក៏ធ្វើឲ្យទីផ្សារប្រេងឆៅកាន់តែតូចចង្អៀតផងដែរ។
OPEP ត្រូវប្រជុំបន្ទាន់៖
អារ៉ាប៊ីសាអូឌីត ប្រទេសផលិតប្រេងធំជាងគេ កំពុងត្រូវបានប្រទេសសមាជិកអង្គការ OPEP ផ្សេងទៀតសម្លក់សម្លឹង ដោយសារតែ កន្លងមក ប្រទេសនេះនៅរឹងទទឹង មិនព្រមកាត់បន្ថយចំនួនផលិត។ រដ្ឋមន្ត្រីក្រសួងធនធានរ៉ែរបស់នីហ្សេរីយ៉ា បានទាមទារថាអង្គការ OPEP ត្រូវតែធ្វើការប្រជុំជាបន្ទាន់ ដើម្បីនែនាំឲ្យប្រទេសសមាជិកកាត់បន្ថយការផលិត។ រដ្ឋមន្ត្រីរូបនេះ បានថ្លែងបែបផ្លែផ្កា ឲ្យអារ៉ាប៊ីសាអូឌីតថា អង្គការOPEP ធ្លាប់សន្យាថា បើប្រេងធ្លាក់ដល់ ៣៥ដុល្លារ នឹងធ្វើការប្រជុំបន្ទាន់។ ឥឡូវពេលនេះ ប្រេងនៅតែជាង៣០ដុល្លារ បែរជាមិនកំរើកសោះ។
អារ៉ាប៊ីសាអូឌីតសុខចិត្តលក់ខាត ឲ្យតែលក់ឲ្យបានច្រើន៖
ការដែលអង្គការOPEP មិនកំរើក នោះក៏ដោយសារតែអារ៉ាប៊ីសាអូឌីត ជាអ្នកសង្កត់។ កន្លងមកថ្វីត្បិតតែក្នុងនាមជាប្រទេសសមាជិកដូចគ្នាមែន តែអារ៉ាប៊ីសាអូឌីត មានកម្លាំងខ្លាំងជាងគេ ដោយសារបរិមាណនៃចំនួនផលិតរបស់ខ្លួន។ អារ៉ាប៊ីសាអូឌីត សុខចិត្តលក់ថោក តែធ្វើម៉េចលក់ឲ្យបានច្រើន ដើម្បីរក្សាអំណាចរបស់ខ្លួននៅក្នុងទីផ្សារ។
កាលៈទេសៈមួយទៀត ដែលគេជឿថាអារ៉ាប៊ីសាអូឌីត សុខចិត្តលក់ទាំងខាត គឺដើម្បីប្រជែងជាមួយអ៊ីរ៉ង់ ដែលជាសត្រូវរបស់ខ្លួនលើគ្រប់វិស័យ មិនថានយោបាយ សាសនា រឺសេដ្ឋកិច្ច។ អ៊ីរ៉ង់ក៏ជាសមាជិករបស់ អង្គការOPEP ដែរ ហើយពេលនេះអ៊ីរ៉ង់ កំពុងត្រៀមខ្លួនដាក់ប្រេងលក់នៅលើទីផ្សារអន្តរជាតិ នៅពេលណាដែលសហគមន៍អន្តរជាតិ ដកទណ្ឌកម្មចេញជាស្ថាពរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ