ក្រុមប្រទេសមហាអំណាចទាមទារឲ្យអ.ស.ប.ចាត់ការរឿងមីស៊ីលបាលីស្ទីកអ៊ីរ៉ង់
កិច្ចព្រមព្រៀងស្តីពីការគ្រប់គ្រងកម្មវិធីនុយក្លេអ៊ែរ ដែលអ៊ីរ៉ង់ បានចុះហត្ថលេខាជាមួយប្រទេសមហាអំណាច បានចូលជាធរមានទើបតែបាន៣ខែ ក៏ប៉ុន្តែបញ្ហាថ្មីកំពុងចោទឡើង ដោយសារអ៊ីរ៉ង់ បានធ្វើការបាញ់សាកល្បងកាំជ្រួចមីស៊ីលបាលីស្ទីកថ្មីមួយ កាលពីថ្ងៃទី៩មីនា កន្លងទៅ។ ប្រទេសមហាអំណាច មានសហរដ្ឋអាមេរិក បារាំង អង់គ្លេស និងអាល្លឺម៉ង់ បានធ្វើលិខិតរួមគ្នាមួយ នៅថ្ងៃទី៣០ មីនានេះ ផ្ញើរទៅកាន់លោកបាន គីមូន ដើម្បីសុំឲ្យអង្គការសហប្រជាជាតិ ដោះស្រាយបញ្ហានេះព្រោះអ៊ីរ៉ង់បានរំលោភលើសេចក្តីសម្រេចចិត្តលេខ 2231 របស់ក្រុមប្រឹក្សាសន្តិសុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៧
វាមិនមែនជាការប្តឹងទេ វាគ្រាន់តែជាការជូនដំណឹង នឹងស្នើរសុំ ដើម្បីឲ្យអង្គការសហប្រជាជាតិធ្វើការដោះស្រាយ រកខុសត្រូវ ទាក់ទិននឹងការបាញ់កាំជ្រួចមីស៊ីលបាលីស្ទីក។ ឈរលើមូលដ្ឋានអ្វី? គឺថាប្រទេសមហាអំណាច សំអាងលើសេចក្តីសម្រេចចិត្តលេខ 2231 របស់ក្រុមប្រឹក្សាសន្តិសុខ ដែលបានអនុម័តជាឯកច្ឆ័នកាលពី ខែកក្កដា ឆ្នំា២០១៥។
ប៉ុន្តែយើងត្រូវចែកគ្នាឲ្យដាច់ រវាងកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់ និងសេចក្តីសម្រេចចិត្តលេខ2231នេះ។ តែយ៉ាងណាក៏ដោយ សេចក្តីសម្រេចចិត្តលេខ2231នេះ គឺត្រូវបានស្ថាបនាឡើងក្នុងទិសដៅស្របគ្នា ហើយនឹងដើម្បីញ៉ាំងឲ្យកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់ មានប្រសិទ្ធភាពកាន់តែល្អ។
សេចក្តីសម្រេចចិត្តលេខ2231 របស់ក្រុមប្រឹក្សាសន្តិសុខ៖
អ្វីដែលប្រទេសមហាអំណាចទាំងបួនសំអាងនាពេលនេះ គឺគេថាអ៊ីរ៉ង់ មិនបានអនុវត្តទៅតាមការសន្យារបស់ខ្លួនទេ ពោលគឺការសន្យាដែលមានកំណត់ក្នុងសេចក្តីសម្រេចចិត្តលេខ2231នេះឯង។ ក្នុងសេចក្តីសម្រេចចិត្តនេះ នៅត្រង់ កថាខណ្ឌចំណុចទី៣ នៃ Annexe B មានកំណត់ជាអាថិ៍ថា អ៊ីរ៉ង់មិនត្រូវធ្វើសកម្មភាពបាញ់គ្រាប់មីស៊ីលបាលីស្ទីក ដែលអាចបំពាក់ដោយក្បាលគ្រាប់នុយក្លេអ៊ែរទេ ហើយសូម្បីតែការបាញ់សាកល្បងដោយប្រើបច្ចេកវិទ្យាបាលីស្ទីក ក៏អ៊ីរ៉ង់មិនត្រូវធ្វើដែរ។
ត្រង់ចំណុចនេះហើយទើបប្រទេសមហាអំណាច គិតថាអង្គការសហប្រជាជាតិ ត្រូវចាត់វិធានការជាបន្ទាន់ ដើម្បីឆ្លើយតបទៅនឹងអាកប្បកិរិយា របស់អ៊ីរ៉ង់ ដែលអាចរំលោភលើសេចក្តីសម្រេចចិត្តលេខ2231។ លិខិតនេះ ត្រូវបានផ្ញើរទៅកាន់លោក បាន គីមូន អគ្គលេខាធិការអង្គការសហប្រជាជាតិ និងលោក អគ្គរដ្ឋទូតអេស្ប៉ាញប្រចាំអង្គការសហប្រជាជាតិ ព្រោះអេស្ប៉ាញមានតួនាទីជាអ្នកសម្របសម្រួលបញ្ហានៅក្រុមប្រឹក្សាសន្តិសុខ ទាក់ទិនទៅនឹងសេចក្តីសម្រេចចិត្តលេខ2231នេះ។
កាំជ្រួចបាលីស្ទីក គ្មានក្បាលគ្រាប់នុយក្លេអ៊ែរ៖
ខាងអ៊ីរ៉ង់ គេនៅតែប្រកែកថា គ្រាប់មីស៊ីលបាលីស្ទីកដែលគេបាញ់សាកល្បង គឺដើម្បីការពារខ្លួនតែប៉ុណ្ណោះ។ កាលពី២សប្តាហ៍មុន លោករដ្ឋមន្ត្រីការបរទេសអ៊ីរ៉ង់បានអះអាងថា កាំជ្រួញបាលីស្ទីករបស់អ៊ីរ៉ង់ ពុំមានបំពាក់ក្បាលគ្រាប់នុយក្លេអ៊ែរទេ។ ដូច្នេះវាជាកាំជ្រួចធម្មតា ដែលគេមិនអាចហាមឃាត់អ៊ីរ៉ងមិនឲ្យធ្វើបានឡើយ។
ប៉ុន្តែចំណោទនៅតែកើតមាន ព្រោះបើយើងពិនិត្យឲ្យច្បាស់ នៅក្នុងអ្វីដែលបានចែងក្នុងសេចក្តីសម្រេចចិត្តលេខ2231 គឺគេកំណត់ច្បាស់ណាស់ថា អ៊ីរ៉ង់មិនត្រូវបាញ់រាល់គ្រាប់មីស៊ីលបាលីស្ទីក ដែលអាចបំពាក់ក្បាលគ្រាប់នុយក្លេអ៊ែរបាន។ ដូច្នេះមានន័យថា ទោះមីស៊ីលនោះមានរឺ អត់មានក្បាលគ្រាប់នុយក្លេអ៊ែរ គឺមិនសំខាន់ទេ។ អ្វីដែលសំខាន់ឲ្យតែជាប្រភេទមីស៊ីលបាលីស្ទីក។ នេះជាការបកស្រាយ របស់ប្រទេសមហាអំណាចកន្លងមក។
អញ្ចឹងហើយ បានជាពេលនេះ គេត្រូវការការបកស្រាយពីអង្គការសហប្រជាជាតិ។ កាលពីថ្ងៃទី១០ មីនា លោកបាន គីមូន គ្រាន់តែបានអំពាវនាវ ឲ្យអ៊ីរ៉ង់បង្ហាញជំហរស្ងប់ស្ងាត់ កុំច្រលោត និងត្រូវប្រុងប្រយ័ត្ននូវរាល់សកម្មភាពរបស់ខ្លួន ចៀសវាងការបង្ករភាពតានតឹងក្នុងតំបន់។ តែលោកបាន គីមូន មិនបានបញ្ជាក់ថាសកម្មភាពបាញ់មីស៊ីលបាលីស្ទីកអ៊ីរ៉ង់ វារំលោភទៅលើសេចក្តីសម្រេចចិត្តលេខ2231ទេ។ យ៉ាងណា គាត់គ្រាន់តែថា វាជាតួនាទីរបស់ក្រុមប្រឹក្សាសន្តិសុខ ដែលត្រូវប្រជុំគ្នាដោះស្រាយបញ្ហានេះ។
តើ អ៊ីរ៉ង់រំលោភលើកិច្ចព្រមព្រាងស្តីពីកម្មវិធីនុយក្លេអ៊ែរ ដែររឺទេ?
យើងត្រូវបែងចែកឲ្យដាច់ រវាងកិច្ចព្រមព្រាងស្តីពីកម្មវិធីនុយក្លេអ៊ែរ និងសេចក្តីសម្រេចចិត្តលេខ2231 របស់ក្រុមប្រឹក្សាសន្តិសុខ។ ទោះបីជាវាជាប់ពាក់ព័ន្ធគ្នា តែវាជាអត្ថបទពីរដាច់ដោយឡែក ដែលយើងមិនអាចយកមកបូលបល់ចូលគ្នាបានទេ។ អត្ថបទនិមួយៗ មានបញ្ញត្តិ និងយន្តការអនុវត្តរៀងៗខ្លួន។ ដូច្នេះបើ ក្នុងករណីដែលអ៊ីរ៉ង់ ត្រូវគេចាត់ទុកថាបានរំលោភលើសេចក្តីសម្រេចចិត្តលេខ2231 ក៏មិនមែនមានន័យថាអ៊ីរ៉ង់ រំលោភលើកិច្ចព្រមព្រាងស្តីពីកម្មវិធីនុយក្លេអ៊ែរដែរ។
ដាក់ទណ្ឌកម្មថ្មីលើអ៊ីរ៉ង់៖
ការដាក់ទណ្ឌកម្ម និងនៅតែអាចមាន បើសិនជាក្រុមប្រឹក្សាសន្តិសុខរបស់អង្គការសហប្រជាជាតិ យល់ថាអ៊ីរ៉ង់ពិតជារំលោភសេចក្តីសម្រេចចិត្តនោះមែន។ ដោយឡែក ទណ្ឌកម្មជាលក្ខណៈបុគ្គល ដែលប្រទេសមួយអាចដាក់ទៅលើអ៊ីរ៉ង់ ក៏អាចធ្វើទៅបានដែរ។ ជាក់ស្តែងសហរដ្ឋអាមេរិក បានដាក់ទណ្ឌកម្មថ្មីទៅលើអ៊ីរ៉ង់ កាលពី២ខែមុន បន្ទាប់ពីអ៊ីរ៉ង់បានបាញ់គ្រាប់មីស៊ីលបាលីស្ទីកចម្ងាយមធ្យម កាលពីខែតុលា ឆ្នាំ២០១៥។ កាលពីពីរសប្តាហ៍មុននេះទៀត លោកស្រីសាម៉ាន់តា ផៅវើ អគ្គរដ្ឋទូតសហរដ្ឋអាមេរិក បានគំរាមថា អាមេរិកនឹងរកទណ្ឌកម្មថ្មីបន្ថែមទៀត។ ចំណែកលោក ហ្សង់ម៉ាក អេរ៉ូ រដ្ឋមន្ត្រីការបរទេសបារាំង ក៏បានថ្លែងផងដែរ កាលពីថ្ងៃទី១៣ មីនា ថា បើចាំបាច់ គឺគេនឹងដាក់ទណ្ឌកម្មសេដ្ឋកិច្ចទៅលើអ៊ីរ៉ង់។
មីស៊ីលបាលីស្ទីក ទុកបាញ់ដាក់សត្រូវ”អ៊ីស្រអែល”៖
បើតាមការរាយការណ៍របស់ទីភ្នាក់ងារព័ត៌មាន Reuters ដែលបានអានលិខិត ដែលប្រទេសមហាអំណាចទាំងបួនបានសរសេររួមគ្នា នៅថ្ងៃនេះ គឺក្នុងលិខិតនេះ មិនបានលើកឡើងដោយចំៗទេ ថាអ៊ីរ៉ង់រំលោភលើសេចក្តីសម្រេចចិត្តលេខ2231 តែគ្រាន់តែបង្ហាញពីការព្រួយបារម្ភ ដែលអ៊ីរ៉ង់បានធ្វើក្នុងន័យគំរាមប្រទេសជិតខាង។ ប្រទេសជិតខាងនោះ គឺគ្មាននរណាក្រៅពីអ៊ីស្រាអែលទេ។
ជាការពិតមែន នៅថ្ងៃធ្វើការបាញ់សាកល្បងមីស៊ីល មានថ្នាក់ដឹកនាំកងទ័ពអ៊ីរ៉ង់ម្នាក់ បាននិយាយបែបគំរាមថា គ្រាប់មីស៊ីលបាលីស្ទីកនេះ គឺអ៊ីរ៉ង់ទុកបាញ់សត្រូវអ៊ីរ៉ង់ទាំងឡាយណា តួយ៉ាងគឺអ៊ីស្រាអែលជាដើម។ ទោះចង់មិនចង់ នេះជាការគម្រាមមួយដែរ សម្រាប់អ៊ីស្រាអែលផ្ទាល់និងក្នុងតំបន់ដើមបូព៌ាទាំងមូល ព្រោះថារវាងអ៊ីរ៉ង់ និងអារ៉ាប៊ីសាអូឌីត ក៏កំពុងតែក្តៅគគុកផងដែរ។
ជាការពិតណាស់ ប្រទេសនីមួយៗ មានសិទ្ធិការពារខ្លួន តែត្រូវស្ថិតក្នុងក្របខណ្ឌកាតព្វកិច្ចអន្តរជាតិ ដែលមានអង្គការសហប្រជាជាតិជាអ្នកគ្រប់គ្រង។ ទាក់ទិននឹងអាវុធនុយក្លេអ៊ែរ គឺវាមានភាពសាំញ៉ាំណាស់ ហើយដែលទាមទារឲ្យប្រទេសហត្ថលេខីទាំងអស់ គោរពឲ្យបានម៉ដ្ឋចត់ ព្រោះបើបច្ចេកវិទ្យានេះរីកសាយភាព ទៅដល់ដៃមនុស្សអាក្រក់ គឺសុខសន្តិភាពពិភពលោក នឹងត្រូវរងការគំរាមកំហែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ