លីបង់រងទុក្ខ ដោយសារជម្លោះរវាងអារ៉ាប៊ីសាអូឌីត និងអ៊ីរ៉ង់
ប្រទេសលីបង់ កំពុងតែប្រឈមមុខនឹងបញ្ហា ដោយសារការដាក់គំនៀបពីសំណាក់អារ៉ាប៊ីសាអូឌីត ដែលព្យាយាមរកវិធីបង្អាក់ឥទ្ធិពលរបស់អ៊ីរ៉ង់ នៅតំបន់ដើមបូព៌ា ទាំងមូល។ បន្ទាប់ពីបានផ្តាច់ជំនួយយោធា ក្នុងទឹកប្រាក់៣ពាន់លានដុល្លារ ពីលីបង់ អារ៉ាប៊ីសាអូឌីត មានប្រមែរប្រមូលប្រទេសសមាជិកក្រុមប្រឹក្សាសហប្រតិបត្តិការឈូងសមុទ្រ ឲ្យចាត់ទុកក្រុមចលនាតស៊ូហេសបូឡាលីបង់ ថាជាក្រុមភេរវកម្មទៀត។ អ៊ីរ៉ង់បានមានប្រតិកម្មភ្លាមៗ ថាការចាត់ទុកក្រុមហេសបូឡាជាក្រុមភេរវកម្ម គឺវានឹងឈានទៅបង្ករអស្ថេរភាពនយោបាយរបស់លីបង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ខឹងអ៊ីរ៉ង់ ជះកំហឹងលើអ៊ីរ៉ង់៖
អារ៉ាប៊ីសាអូឌីត កំពុងរិះរកគ្រប់មធ្យោបាយ ដើម្បីវាយប្រហារអ៊ីរ៉ង់ មិនថាដោយផ្ទាល់រឺដោយប្រយោល។ ក្រោយពេលដែល អ៊ីរ៉ង់ និងអាមេរិកផ្តើមមានទំនាក់ទំនងនឹងគ្នាឡើងវិញ អ៊ីរ៉ង់ ចាប់ផ្តើមវាយលុយទីផ្សារប្រេងឡើងវិញ កងទ័ពរដ្ឋាភិបាលបាស្ឆា ដែលគាំទ្រដោយអ៊ីរ៉ង់កំពុងតែមានប្រៀបនៅស៊ីរី ទាំងអស់នេះ បានធ្វើឲ្យអារ៉ាប៊ីសាអូឌីត ក្រហល់ក្រហាយ នៅមិនសុខ។
លីបង់ដែលកន្លងមកនៅកណ្តាល រវាងអ៊ីរ៉ង់ និងអារ៉ាប៊ីសាអូឌីត កំពុងតែក្លាយជាផ្ទាំងស៊ីប ដើម្បីឲ្យអារ៉ាប៊ីសាអូឌីតជះកំហឹង។ កាលពីពេលថ្មីៗនេះ អារ៉ាប៊ីសាអូឌីត បានសម្រេចលប់ជំនួយយោធា ដែលមានទឹកប្រាក់៣ពាន់លានដុល្លារពីលីបង់។ បន្ទាប់មកទៀត រដ្ឋាភិបាលរាជាណាចក្រមហាសេដ្ឋីប្រេង មានអំពាវនាវឲ្យប្រជាជនខ្លួនដែលរស់នៅនិងរកស៊ីនៅលីបង់ ឲ្យចាកចេញពីប្រទេសនេះជាបន្ទាន់។
អារ៉ាប៊ីសាអូឌីត បានកោះប្រជុំប្រទេសសមាជិកក្រុមប្រឹក្សាសហប្រតិបត្តិការឈូងសមុទ្រ ដែលមានប្រទេសកាតា ប្រទេសអេមៀរ៉ាត់អារ៉ាប់រួម ប្រទេសអូម៉ង់ គូវែត និងបារ៉ែន។ ក្រុមប្រឹក្សានេះ បានចេញសេចក្តីសម្រេចរួមគ្នា ទៅតាមការទាមទាររបស់អារ៉ាប៊ីសាអូឌីត ដោយចាត់ទុកថា ក្រុមចលនាតស៊ូហេសបូឡាលីបង់ ថាជាចលនាភេរវវកម្ម។ សេចក្តីសម្រេចនេះ ធ្វើឡើងដោយបានចោទក្រុមហេសបូឡា ថាបានប្រើប្រាស់ឥទ្ធិពលនិងជំនួយរបស់អ៊ីរ៉ង់ ទៅអូសទាញសកម្មជនក្មេងៗ ឲ្យមកធ្វើអំពើភេរវកម្ម និងបង្ករអស្ថិរភាពក្នុងតំបន់។
អ៊ីរ៉ង់៖ចាត់ទុកក្រុមហេសបូឡា ជាក្រុមភេរវកម្ម គឺដូចញុះញង់ឲ្យលីបង់ឈ្លោះគ្នា
សេចក្តីសម្រេចចាត់ថ្នាក់ក្រុមហេសបូឡា ថាជាក្រុមភេរវកម្មនេះ ត្រូវបានរដ្ឋមន្ត្រីការបរទេសរបស់អ៊ីរ៉ង់ បរិហារថា គឺចេតនាបង្កជម្លោះ និងអស្ថិរភាពនយោបាយទៅលើប្រទេសលីបង់។ ធ្វើបែបនេះ គឺធ្វើឲ្យបរិបទនិយោបាយលីបង់ បែកបាក់គ្នា។ លោករដ្ឋមន្ត្រីការបរទេសអ៊ីរ៉ង់ បានបន្ថែមថា អ៊ីរ៉ង់គាំទ្រ និងសូមសរសើរដល់ចលនាតស៊ូរបស់ក្រុមហេសបូឡា ដែលត្រូវបានស្ថាបនាឡើង កាលពីដើមដំបូងដើម្បីប្រឆាំងនឹងការឈ្លានពានរបស់អ៊ីស្រាអែល ទៅលើលីបង់ ហើយក្រោយមកចលនានេះ បានប្រយុទ្ធប្រឆាំងនឹងអំពើភេរវកម្មនៅលីបង់ យ៉ាងសកម្ម។
សូមរំលឹកថា ចលនាហេសបូឡា ជាចលនាតស៊ូអ៊ីស្លាមឈីអ៊ីត ដែលបានបង្កើតឡើងក្រោមគំនិតផ្តួចផ្តើម របស់ក្រុមបដិវដ្តអ៊ីស្លាមអ៊ីរ៉ង់ ក្នុងទសវត្សឆ្នាំ៨០ ដើម្បីប្រយុទ្ធទប់ទល់នឹងការឈ្លានពានរបស់អ៊ីស្រាអ៊ែល មកលើលីបង់។ បើទោះបីសង្រ្គាមស៊ីវីលលីបង់ត្រូវបានបិទបញ្ចប់នៅឆ្នាំ១៩៩០ តែក្រុមហេសបូឡា នេះជាក្រុមតែមួយគត់ ដែលមិនព្រមធ្វើការប្រគល់អាវុធ។ បច្ចុប្បន្ន ក្រុមហេសបូឡា កំពុងជួយធ្វើសង្រ្គាមនៅស៊ីរី ដោយគាំទ្រក្រុមកងទ័ពរដ្ឋាភិបាលបាស្ឆា អាល់អាសាដ។
រដ្ឋាភិបាលលីបង់ ដែលមួយផ្នែកទទួលឥទ្ធិពលពីក្រុមហេសបូឡា កំពុងតែទ័លច្រក ព្រោះតែជម្លោះរវាងខ្លាអារ៉ាប៊ីសាអូឌីត និងខ្លាអ៊ីរ៉ង់។ អ្វីដែលជាការព្រួយបារម្ភបន្ថែមទៀត គឺប្រជាជនលីបង់ប្រមាណជា៥សែននាក់ ដែលរស់នៅធ្វើការនៅតាមប្រទេសតំបន់ឈូងសមុទ្រពែក្ស ហើយក្នុងនោះគឺ៣សែននាក់ ដែលរស់នៅអារ៉ាប៊ីសាអូឌីត។ ប្រជាជនលីបង់ទាំងនោះកំពុងតែព្រួយបារម្ភពីសន្តិសុខផ្ទាល់ខ្លួន ព្រមទាំងការប្រឈមមុខនឹងការបាត់បង់ការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ