ប្រេងឆៅចុះថ្លៃខ្លាំង វ៉េណេហ្ស៊ុយអេឡាសំណូមពរឲ្យប្រទេសផលិតប្រេងធ្វើជំនួបកំពូល
ប្រឈមមុខនឹងតម្លៃប្រេងឆៅ ដែលធ្លាក់ថ្លៃស្មើនឹងពាក់កណ្តាល ក្នុងរយៈពេលមួយឆ្នាំកន្លងមកនេះ ប្រទេសវ៉េណេហ្ស៊ុយអេឡា ដែលជាសមាជិកអង្គការប្រទេសនាំប្រេងចេញ បានអំពាវនាវ ដល់ប្រទេសផលិតប្រេងទាំងអស់ ឲ្យបើកជំនួបកំពូលមួយ ដើម្បីស្វែងរកវិធី ទប់តម្លៃប្រេង កុំឲ្យធ្លាក់ចុះជាងនេះទៀត។ រដ្ឋមន្ត្រីក្រសួងធនធានប្រេងរបស់កាតា បានបញ្ជាក់ថា ក្រុមប្រទេសផលិតប្រេងតំបន់អារ៉ាប់ កំពុងតែពិចារណា លើសំណើនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
លោករដ្ឋមន្ត្រីក្រសួងធនធានប្រេងប្រទេសកាតា បានបញ្ជាក់ឲ្យដឹង នៅថ្ងៃព្រហស្បតិ៍ ទី១០ កញ្ញាថា លោក នីកូឡាស ម៉ាឌូរ៉ូ ប្រធានាធិបតីប្រទេសវ៉េណាហ្ស៊ុយអេឡា បានធ្វើការស្នើសុំ ទៅបណ្តាប្រទេសអ្នកផលិតប្រេងទាំងអស់ ឲ្យរៀបចំធ្វើជំនួបកំពូលបន្ទាន់មួយ ដើម្បីរកវិធីទប់តម្លៃប្រេង មិនឲ្យធ្លាក់ ជាងនេះ។ ថ្លែងក្នុងសន្និសីទកាសែត បន្ទាប់ពីបានជួបប្រជុំ នៅក្រុងដូហា ជាមួយបណ្តារដ្ឋមន្ត្រីក្រសួងប្រេងកាត នៃប្រទេសអារ៉ាប់ នាំប្រេងចេញទាំងអស់ លោករដ្ឋមន្រ្តីកាតា បានបញ្ជាក់ថា ក្រុមប្រទេសអារ៉ាប់ដែលផលិតប្រេង កំពុងតែពិចារណា លើសំណើរបស់ វ៉េណេហ្ស៊ុយអេឡា។
សូមបញ្ជាក់ថា តម្លៃប្រេងឆៅ នៅលើទីផ្សារ មានតម្លៃមិនដល់ ៤៥ដុល្លារផង ក្នុងមួយធុងបារីស។ ប្រទេសវ៉េណេហ្ស៊ុយអេឡា ដែលជាសមាជិកមួយរូប នៃអង្គការប្រទេសអ្នកនាំប្រេងចេញ ហៅកាត់ថា OPEP កំពុងតែជួបនូវការខាតបង់ជាខ្លាំង ដោយសារតែសេដ្ឋកិច្ចរបស់ខ្លួន រំពឹងស្ទើរតែទាំងស្រុង ទៅលើការនាំប្រេងចេញ។ ប្រទេសនេះ បានអំពាវនាវ ម្តងហើយម្តងទៀត ដើម្បីឲ្យប្រទេសផលិតប្រេងទាំងអស់ រកវិធីទប់ស្កាត់ កុំឲ្យប្រេងចេះតែចុះថោក។
យ៉ាងណាក៏ដោយ គេមិនប្រាកដថា ប្រទេសផលិតប្រេងផ្សេងទៀត ទាំងសមាជិកអង្គការ OPEP ទាំងមិនមែនសមាជិក ដូចជារុស្ស៊ីនិងអាមេរិក នឹងព្រមជួបជុំគ្នាទៅតាមសំណើរនេះទេ។ ការរក្សាប្រេង ឲ្យនៅតម្លៃទាប អាចជាយុទ្ធសាស្ត្រមួយ ក្នុងការវាយលុកទីផ្សារ ហើយសម្រាប់ ប្រទេសនៅតំបន់អារ៉ាប់ ទោះបីប្រេងមានតំម្លៃថោកក៏ដោយ ក៏ប៉ុន្តែគេអាចផលិតវាបាន ក្នុងបរិមាណច្រើន ហើយធនធានដែលបានមកពីការលក់ប្រេងឆៅ មានច្រើន និងជាយូរឆ្នាំមកហើយ។
ប្រទេស៦ នៅតំបន់អារ៉ាប់ ដែលជាសមាជិកក្រុមប្រឹក្សាសហប្រតិបត្តិការឈូងសមុទ្រ Conseil de Coopération du Golfe មានកាតា អារ៉ាប៊ីសាអ៊ូឌីត បារ៉ែន អេមៀរ៉ាតអារ៉ាប់រួម កូវ៉េត និងអូម៉ង់ ប្រទេសទាំង៦នេះ ផលិតប្រេងបានដល់ទៅ ១៨លានធុងបារីស ក្នុងមួយថ្ងៃ។ ដូច្នេះទោះបីជាប្រេងថោក ក៏គេនៅតែលក់បានច្រើនដែរ។ មិនមានការបញ្ជាក់ណាមួយ ពីខ្លឹមសារ នៃសេចក្តីសម្រេចរបស់ប្រទេសទាំង៦ ក្នុងពេលប្រជុំកាលពីថ្ងៃព្រហស្បតិ៍ម្សិលមិញទេ ប៉ុន្តែតាមព័ត៌មានមិនផ្លូវការ បញ្ជាក់ថា គេនឹងអាចស្នើឲ្យមាន ការកំណត់តម្លៃប្រេង រួមតែមួយ។
បន្ទាប់ពីបានទៅប្រទេសកាតា កាលពីសប្តាហ៍មុន លោក ប្រធានាធិបតីវ៉េណេហ្ស៊ុយអេឡា ក៏បានអញ្ជើញទៅចិនផងដែរ។ នៅចិន លោកបានជួបជាមួយ លោកពូទីន ប្រធានាធិបតីរុស្សី ដែលតាមការស្មាន លោកបានស្នើសុំការគាំទ្រពីរុស្ស៊ី ដើម្បីរកវិធី ទប់តម្លៃប្រេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ