កំដៅនៃភាពតានតឹងកំពុងតែកើនឡើង រវាងអ៊ីស្រាអែល និងប៉ាឡេស្ទីន ក្រោយឃាតកម្មផ្ទួនៗ
ភាពតានតឹងរវាងអ៊ីស្រាអែល និងប៉ាឡេស្ទីន កំពុងតែពុះកញ្ជ្រោលកាន់តែខ្លាំងឡើងនៅក្នុងថ្ងៃអាទិត្យនេះ បន្ទាប់ពីមានហេតុការណ៍ឃាតកម្ម បានកើតឡើងផ្ទួនៗគ្នា។ យប់ថ្ងៃសៅរ៍ឆ្លងចូលថ្ងៃអាទិត្យ នៅក្រុងហ្ស៊េរូសាឡឹម បុរសប៉ាឡេស្ទីនម្នាក់ បានយកកាំបិត ដើរចាក់ប្រជាជនអ៊ីស្រាអែល បណ្តាលឲ្យស្លាប់ពីរនាក់ ហើយជនដៃដល់ ក៏ត្រូវបានប៉ូលីសអ៊ីស្រាអែលបាញ់សម្លាប់ផងដែរ។ កាលពីថ្ងៃព្រហស្បតិ៍ ប្តីប្រពន្ធអ៊ីស្រាអែល ពីរនាក់ ក៏ត្រូវបានគេសម្លាប់ផងដែរ។ អាជ្ញាធរអ៊ីស្រាអែល បានបិទទីលានវិហារម៉ូស្កេបូរាណនៅហ៊្សេរូសាឡឹម ហើយបានទាំងចេញប្រតិបត្តិការរុករកឃាតករ ពាសពេញតំបន់ស៊ីសហ្សកដានីទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៦
បើយើងនិយាយពីភ្លើងសង្រ្គាម ភ្លើងគំនំរវាងដែនដីទាំងពីរ អ៊ីស្រាអែល និងប៉ាឡេស្ទីន គឺថាវាមិនដែលរលត់ទាល់តែសោះ គ្រាន់តែថាមានពេលខ្លះអណ្តាតភ្លើង បានចុះថយ ហើយពេលខ្លះអណ្តាតភ្លើងត្រូវខ្យល់បក់ ឲ្យឆាបឆេះកាន់តែខ្លាំង។ ដូចក្នុងពេលនេះ គឺថា ខ្យល់កំពុងតែបក់ ដែលធ្វើឲ្យភ្លើងកំហឹងរវាងសត្រូវទាំងពីរហ្នឹងឆាបឆេះ ហើយគេបារម្ភខ្លាចថា អ៊ីស្រាអែល នឹងប្រើប្រាស់កម្លាំងយោធា ដូចកាលពីឆ្នាំ២០១៤កន្លងទៅ នៅតំបន់ហ្គាហ្សា។
ឃាតុកម្មនៅស៊ីសហ្សកដានីខាងជើង ភេរវកម្មនៅហ្ស៊េរូសាឡឹម…
មានហេតុការណ៍ច្រើនណាស់ ដែលកំពុងតែដុតកំហឹងទាំងអស់នេះ។ តាមពិតទៅ ជម្លោះសម្លក់សម្លឹងគ្នា មានសឹងតែជាប្រចាំថ្ងៃ ជាពិសេស នៅក្រុងហ្ស៊េរូសាឡឹម ដែលជាទីក្រុងបូរាណ។ នៅទីក្រុងនេះ ខាងលើទីទួល គឺមានវិហារអ៊ីស្លាមបូរាណ ដែលជាទីសក្ការៈខ្ពស់បំផុតទីបី សម្រាប់ប្រជាជនកាន់សាសនាអ៊ីស្លាម។ ហើយនៅក្បែរនេះដែរ គឺមានជញ្ជាំងបូរាណ ដែលជាទីសក្ការៈ របស់ប្រជាជនកាន់សាសនាជ្វីហ្វ។ អញ្ចឹងហើយការប៉ះទង្គិចគ្នា គឺតែងតែមានជារឿយៗ។ ចុងសប្តាហ៍មុននេះ គឺជាបុណ្យចូលឆ្នាំថ្មីប្រពៃណីសាសនាជ្វីហ្វ របស់ប្រជាជនអ៊ីស្រាអែល ហើយវាចៃដន្យចំថ្ងៃបុណ្យធំ តាមប្រពៃណីសាសនាអ៊ីស្លាម របស់ជនជាតិប៉ាឡេស្ទីនដែរ។ អញ្ចឹងទៅ កំហឹងស្អប់គ្នា ក៏វាឡើងទៅតាមហ្នឹងដែរ។
កាលពីយប់ថ្ងៃសៅរ៍ម្សិលមិញ មានហេតុការណ៍ភេរវកម្មមួយ បានកើតឡើង នៅហ្ស៊េរូសាឡឹមតែម្តង ដោយបុរសជនជាតិប៉ាឡេស្ទីនម្នាក់ បានយកកំបិត ដើរចាក់មនុស្ស បង្ករឲ្យស្លាប់ជនជាតិអ៊ីស្រាអែល២នាក់ និងរហួស៨នាក់។ ភ្លាមៗនោះ ប៉ូលីសអ៊ីស្រាអែលបានបាញ់សម្លាប់ជនដៃដល់ ដែលតាមការឲ្យដំណឹង គឺជាសកម្មជនរបស់ក្រុមជីហាដអ៊ីស្លាមីក ប៉ាឡេស្ទីន មានអាយុ១៩ឆ្នាំ។ មិនប៉ុន្មានម៉ោងក្រោយមកផង មានហេតុការណ៏ស្រដៀងគ្នានេះ មួយទៀត ប៉ុន្តែជនរងគ្រោះជាជនជាតិអ៊ីស្រាអែល គ្រាន់តែរងរបួសធ្ងន់ ចំណែកជនដៃដល់ ជាជនជាតិប៉ាឡេស្ទីន ត្រូវបានប៉ូលីសបាញ់សម្លាប់ ដូចជនដៃដល់ទីមួយដែរ។
ហើយកាលពីថ្ងៃព្រហស្បតិ៍ទី ១តុលា មានឃាតកម្មមួយកើតឡើង នៅក្នុងតំបន់ ស៊ីសហ្សកដានី ដែលតាមការសង្ស័យ គឺជាស្នាដៃរបស់ជនជាតិប៉ាឡេស្ទីនដែរ ដែលបានសម្លាប់ប្តីប្រពន្ធអ៊ីស្រាអែល ពីរនាក់ ក្នុងពេលកំពុងតែបើកឡាន ជាមួយនឹងកូនៗបួននាក់នៅពីក្រោយ។ រឿងហេតុទាំងអស់នេះហើយ ដែលធ្វើឲ្យអ៊ីស្រាអែល និងប៉ាឡេស្ទីន តំឡើងសរសៃកដាក់គ្នាឡើងវិញ ក្នុងពេលនេះ ហើយវាបូកផ្សំនឹង ប៉ុន្មានថ្ងៃមុន នៅអង្គការសហប្រជាជាតិ គេបានសម្រេច បង្ហូតទង់ប៉ាឡេស្ទីន ឡើងក្បែរប្រទេសផ្សេងៗ ដែលជាសញ្ញាណ នៃការខិតទៅជិតការទទួលស្គាល់រដ្ឋប៉ាឡេស្ទីនអធិបតេយ្យពេញបរិបូរណ៍។ រឿងនេះធ្វើឲ្យអ៊ីស្រាអែល កាន់តែមួរម៉ៅ ខ្លាំងឡើងផងដែរ។
អ៊ីស្រាអ៊ែលចេញប្រតិបតិ្តការប្រមាញ់នៅស៊ីសហ្សកដានី ហើយបិទក្រុងបូរាណហ៊្សេរូសាឡឹម៖
ក្រោយហេតុការណ៍ឃាតកម្មនៅតំបន់ស៊ីសហ្សកដានី កាលពីថ្ងៃទី ១តុលា ប៉ូលីសអ៊ីស្រាអែល បានបើកប្រតិបត្តិការតាមប្រមាញ់ជនដៃដល់ពាសពេញតំបន់ស៊ីសហ្សកដានីខាងជើងតែម្តង។ ប្រតិបត្តិការនេះ វារិតតែធ្វើឲ្យ ប្រជាជនប៉ាឡេស្ទីន តំបន់ស៊ីសហ្សកដានី មានកំហឹងក្តៅក្រហាយឡើង ព្រោះថាតំបន់ស៊ីសហ្សកដានី ជាដែនដីរបស់ប៉ាឡេស្ទីន ក៏ប៉ុន្តែអ៊ីស្រាអែល បានទន្រា្ទនចូល មកសង់ផ្ទះរស់នៅ ឥតឈប់ឈរ។ ក្នុងប្រតិបត្តិការតាមចាប់ឃាតករនេះ ទាហានអ៊ីស្រាអែល បានបាញ់រះបណ្តាល ឲ្យរងរបួលធ្ងន់ប្រជាជនប៉ាឡេស្ទីន២នាក់ ហើយជិត២០នាក់ផ្សេងទៀតរងរបួស ដោយសារគ្រាប់កាំភ្លើងកៅស៊ូ។
ចំណែកនៅក្រុងហ្ស៊េរូសាឡឹមវិញ អជ្ញាធរអ៊ីស្រាអែល ទើបបានសម្រេចនៅថ្ងៃនេះថា នឹងបិទមិនឲ្យប្រជាជនប៉ាឡេស្ទីនចូលទៅក្នុងទីក្រុងបូរាណ ដែលមានវិហារម៉ូស្កេ ជាទីសក្ការៈរបស់គេទេ ដោយយកលេសថា ខ្លាចមានការប៉ះទង្គិចសាជាថ្មី។ តាមការឲ្យដំណឹង ការហាមឃាត់នេះ គឺមានរយៈពេលបណ្តោះអាសន្នពីរថ្ងៃ ហើយហាមតែទៅលើប្រជាជនប៉ាឡេស្ទីនតែប៉ុណ្ណោះ។ ចំណែកអ្នកទេសចរណ៍ រឺក៏ប្រជាជនអារ៉ាប់អ៊ីស្រាអែល មិនត្រូវបានហាមឃាត់ទេ។ ដោយឡែក វិហារឥស្លាមបូរាណ គឺត្រូវគេហាមមិនឲ្យមនុស្ស អាយុក្រោម៥០ឆ្នាំចូលទៅទេ។
ការចាត់វិធានការនេះ គឺមានលក្ខណៈធ្ងន់ធ្ងរ និងរើសអើងណាស់សម្រាប់ប្រជាជនប៉ាឡេស្ទីន ជាពិសេសក្រុមប្រជាជនប៉ាឡេស្ទីន ៣សែននាក់ ដែលរស់នៅតំបន់ហ្សេរូសាឡឹមខាងកើត ដែលមានទម្លាប់ចេញចូល មកធ្វើការបន់ស្រន់ នៅក្នុងទីក្រុងបូរាណនេះ។ មានប្រជាជនអ្នកកាន់សាសនាអ៊ីស្លាម មួយក្រុម បានធ្វើបាតុកម្មនៅខាងមុខច្រកចូល នៅថ្ងៃនេះ ដោយបានថ្កោលទោសអ៊ីស្រាអែល ថាបានបំបិទសិទ្ធិសេរីភាពគោរពជំនឿសាសនារបស់ពួកគេ។ប៉ូលីសអ៊ីស្រាអែល បានប្រើគ្រាប់បែកផ្សែង ជាច្រើនគ្រាប់ដើម្បីបំបែកក្រុមបាតុករ។
ម្នាក់ថែមអុស ម្ខាងថែមធ្យូង ភ្លើងជម្លោះកាន់តែឆាបឆេះ ៖
អ្វីៗអាចកើតឡើងគ្រប់ពេលវេលា ជាពិសេសក្នុងជម្លោះ រវាងអ៊ីស្រាអែល និងប៉ាឡេស្ទីន ដូចយើងធ្លាប់បានដឹងកន្លងមករួចមកហើយ គឺថា ផ្តើមចេញពីចំណុចតូចមួយ គឺវាក្លាយជាសង្រ្គាមប្រឈមមុខដាក់គ្នាធំតែម្តង។ នៅពីក្រោយអំពើឃាតកម្មដែលបង្កឡើងដោយ ក្រុមសកម្មជនជាតិនិយមប៉ាឡេស្ទីន គឺវាបានបង្កប់នូវសេចក្តីក្រេវក្រោធ ទ្រាំលែងបាន ចំពោះអំពើឈ្លានពានរបស់អ៊ីស្រាអែល មកលើដែនដីតំបន់ស៊ីសហ្សកដានី។ ពោលគឺជាការធ្វើអាណានិគម មកលើដែនដីប៉ាឡេស្ទីន។
មិនត្រឹមតែប៉ុណ្ណោះ ឥឡូវនេះ អ៊ីស្រាអែល បានបិទទីក្រុងបូរាណហ្សេរូសាឡឹម មិនឲ្យប្រជាជនប៉ាឡេស្ទីនចូលទៅទៀត។ ដូចឆ្នេះ យើងឃើញថា គឺវាវិលចុះវិលឡើង គ្មានថ្ងៃបញ្ចប់ទេ។ ខាងប៉ាឡេស្ទីន ធ្វើភេរវកម្ម ខាងអ៊ីស្រាអែលធ្វើប្រតិបត្តិការតាមប្រមាញ់ឃាតករ ដាក់គំនៀបលើប្រជាជនប៉ាឡេស្ទីន អញ្ចឹងវារិតតែធ្វើឲ្យប៉ាឡេស្ទីនកាន់តែខឹង ហើយនាំគ្នាធ្វើភេរវកម្មបន្ថែមទៀត វិលចុះវិលឡើងគ្មានថ្ងៃចប់ទេ។
ចំណែកថ្នាក់ដឹកនាំ ទាំងសងខាង គឺគ្មាននរណា ជួយទប់អ្នកណាទេ គឺមានតែយកសាំងទៅចាក់ពីលើភ្លើងបន្ថែមទៀត។ ជាក់ស្តែង មេដឹកនាំក្រុមហាម៉ាស ប៉ាឡេស្ទីន នៅតំបន់ហ្គាសា បានប្រកាសនៅថ្ងៃនេះ កោតសរសើរចំពោះវីរភាព ភេរវករប៉ាឡេស្ទីន ដែលហ៊ានពលីជីវិត យកកាំបិតដើរសម្លាប់ប្រជាជនអ៊ីស្រាអែល។ ដូចគ្នាដែរ លោក ម៉ាមូដ ហ្សាហារ មេដឹកនាំមួយរូបដ៏សំខាន់របស់ប៉ាឡេស្ទីន បានប្រកាសនៅថ្ងៃនេះដែរថា សូមឲ្យប្រជាជនប៉ាឡេស្ទីន ក្រោកឈរឡើងកាន់អាវុធ ដើម្បីប្រយុទ្ធជាមួយអ៊ីស្រាអែល។ លោកនាយករដ្ឋមន្ត្រីអ៊ីស្រាអែល ទើបបានប្រកាសប្រជុំបន្ទាន់ ដើម្បីដាក់វិធានការថ្មីបន្ថែម សំដៅទប់ស្កាត់ និងឆ្លើយតប រាល់អំពើភេរវកម្មផ្សេងទៀត ដែលបង្ករឡើងដោយ ក្រុមជ្រុលនិយមប៉ាឡេស្ទីន។ អ៊ីស្រាអែល គេអត់ខ្វល់ច្រើនទេ។ គេចាំតែវាយបកទេ ព្រោះកម្លាំងយោធាគេ ខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ