អាមេរិកសម្រុកវាយប្រហារតាមផ្លូវអាកាសលើពួកអង្គការរដ្ឋអ៊ីស្លាមនៅស៊ីរីនិងអ៊ីរ៉ាក់
ជនស៊ីវិលរាប់រយនាក់កំពុងនាំគ្នារត់ចេញពីតំបន់ហ្វាលូចា Fallouja ប្រទេសអ៊ីរ៉ាក់ ក្នុងខណៈដែលសម្ព័ន្ធមិត្តអន្តរជាតិ ដឹកនាំដោយអាមេរិក សម្រុកវាយប្រហារផ្លូវអាកាសលើពួកជីហាតនៃអង្គការរដ្ឋអ៊ីស្លាម នៅក្នុងខេត្តនេះ និងនៅខេត្តរ៉ាខា ប្រទេសស៊ីរី។ កម្លាំងសម្ព័ន្ធមិត្តបង្កើនការវាយប្រហារផ្លូវអាកាសដើម្បីជួបទាហានអ៊ីរ៉ាក់ ឱ្យដណ្តើមទីតាំង ពីកណ្តាប់ដៃពួកអង្គការរដ្ឋអ៊ីស្លាមមកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ហ្វាលូចា ស្ថិតនៅចម្ងាយតែប្រមាណ៥០គីឡូម៉ែត្រពីរដ្ឋធានីបាតដាតប៉ុណ្ណោះ ហើយធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាម តាំងពីឆ្នាំ២០១៤មក។ ដើម្បីជួយកងទ័ពអ៊ីរ៉ាក់ ឱ្យចង់ដណ្តើមក្រុងនេះមកវិញ ទើបបានជាកងទ័ពសម្ព័ន្ធមិត្តអន្តរជាតិ សម្រុកបើកយុទ្ធនាការផ្លូវការជាជំនួយ តាំងពីបួនថ្ងៃមក ដោយទម្លាក់គ្រាប់បែក ពីលើអាកាសជាង២០គ្រាប់ អមជាមួយការបាញ់កាំភ្លើងធំយ៉ាងសន្ធាប់លើតំបន់នេះ។ ឯពួកអង្គការរដ្ឋអ៊ីស្លាម នៅតែខ្លាំង និងទប់ទល់បាន ដោយប្រើមធ្យោបាយបំផ្ទុះរថយន្ត បំផ្ទុះគ្រាប់បែកអត្តឃាត និងការលាក់ខ្លួនចាំបាញ់ឆ្មក់។
ជាលទ្ធផល មេកើយជីហាតម្នាក់នៅហ្វាលូចា បានស្លាប់ និងកម្ចាត់យុទ្ធជនអ៊ីស្លាមជីហាតរដ្ឋអ៊ីស្លាម បានជាង៧០នាក់ទៀត។ ប៉ុន្តែជនស៊ីវិលជាអ្នករងគ្រោះខ្លាំង និងអាចត្រូវបានពួកអង្គការរដ្ឋអ៊ីស្លាមប្រើជាខែលសម្រាប់ការពារ។ បើតាមអង្គការសហប្រជាជាតិ មានជនស៊ីវិលប្រមាណ៨០០នាក់ បានសម្រុកគេចខ្លួនចេញពីតំបន់សមរភូមិហ្វាលូចារួច។ យ៉ាងហោចជាង៥ម៉ឺននាក់ផ្សេងទៀត កំពុងជាប់កុន ក្នុងលក្ខខណ្ឌរស់នៅយ៉ាងលំបាកលំបិន ខ្វះស្បៀងអាហារ និងថ្នាំសង្កូវ គ្រប់យ៉ាង។
ទន្ទឹមនឹងការវាយប្រហារខ្លាំងនៅអ៊ីរ៉ាក់ សម្ព័ន្ធមិត្តអន្តរជាតិដឹកនាំដោយសហរដ្ឋអាមេរិក ក៏បានបើកនិងបង្កើនប្រតិបត្តិការ នៅខេត្តរ៉ាខា ទីតាំងសំខាន់ជាងគេរបស់ពួកអង្គការរដ្ឋអ៊ីស្លាម នៅប្រទេសស៊ីរី ដើម្បីបើកផ្លូវឱ្យកម្លាំងអារ៉ាបនិងគួដ ទៅសង្គប់ពួកអង្គការរដ្ឋអ៊ីស្លាម។ ប៉ុន្តែកម្លាំងសម្ព័ន្ធអារ៉ាបគួដ មិនទាន់ព្រមបើកយុទ្ធនការផ្លូវគោករួមគ្នានៅឡើយទេ។
សហគមន៍អន្តរជាតិបានសម្តែងការព្រួយបារម្ភយ៉ាងខ្លាំងចំពោះជោគវាសនារបស់ជនស៊ីវិល ដែលធ្លាក់ក្នុងអន្ទាក់នៃការប្រយុទ្ធគ្នា។ ក្រុមប្រឹក្សាសន្តិសុខអង្គការសហប្រជាជាតិត្រូវពិភាក្សាគ្នាជាថ្មីអំពីមហន្តរាយមនុស្សធម៌នៅស៊ីរី ដែលមានជនស៊ីវិល ជាង២៨ម៉ឺននាក់បានស្លាប់ និងរាប់លាននាក់ត្រូវរត់ភៀសខ្លួន គិតចាប់តាំងពីឆ្នាំ២០១១មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ