លីបង់៖ស្លាប់ជន៥នាក់និងរងរបួស១៥នាក់នៅក្នុងភេរវកម្មអត្តឃាតដ៏ហិង្សា
នៅលីបង់ អំពើភេរវកម្មអត្តឃាតមួយចំនួន បានផ្ទុះឡើងផ្ធួនៗគ្នានៅថ្ងៃចន្ទ២៧មិថុនា នៅតំបន់ជិតព្រំដែនជាមួយស៊ីរី ។ ភេរវជន បានចុចបំផ្ទុះគ្រាប់បែកដែលពាក់ជាប់ខ្លួន ប្រឆាំងទៅលើភូមិមួយដែលមានប្រជាជនរស់នៅភាគច្រើនជាគ្រិស្ដសាសនិក ។
ចុះផ្សាយនៅថ្ងៃ៖
ស្តាប់ - ០២:០១
គឺជាអំពើភេរវកម្មអត្តឃាតចំនួន៤ ដែលបានវាយប្រហារទៅលើភូមិមួយនៅជិតព្រំដែនស៊ីរីក្នុងតំបន់ទំនាប Bekaa ខាងកើត ដែលនៅទីនោះ ប្រជាជនរស់នៅភាគច្រើន ជាគ្រិស្ដសាសនិក។
ក្នុងពេលវាយប្រហារ ភេរវជនទីមួយ បានចុចបំផ្ទុះខ្សែក្រវាត់គ្រាប់បែកដែលពាក់ជាប់នឹងខ្លួន នៅទីកន្លែងឆែកឆេរត្រួតពិនិត្យមួយកន្លែងរបស់កងទ័ពលីបង់ និងនៅទីកន្លែងគយលីបង់ផ្សេងៗទៀត។ ហើយ នៅពេលដែលប្រជាជនភូមិ បាននាំគ្នា រត់ទៅជួយយកអាសារដល់ជនរងគ្រោះ ភេរវជនអត្តឃាតម្នាក់ទៀត ក៏បានចុចបំផ្ទុះគ្រាប់បែករបស់គេជាបន្ទាន់ដែរ ហើយជាបន្ទាប់មកទៀត អត្តឃាតជនពីរនាក់ផ្សេងទៀត ក៏បានធ្វើត្រាប់តាមគ្នាដោយបំផ្ទុះគ្រាប់បែករបស់ពួកគេដូចគ្នា។
សរុប មានប្រជាជនរងគ្រោះស្លាប់ចំនួន៥នាក់នៅក្នុងអំពើភេរវកម្មអត្តឃាតនៅលីបង់ក្នុងថ្ងៃចន្ទ២៧មិថុនានិងក៏មានអ្នករងរបួសចំនួន១៥នាក់ផ្សេងទៀត។ នៅពេលនេះ ពុំទាន់ មានខាងចលនាអ៊ីស្លាមណាមួយ ប្រកាសថា ជាស្នាដៃរបស់ពួកគេនៅឡើយទេ ក៏ប៉ុន្តែនៅលីបង់ គេក៏ពុំមន្ទិលសង្ស័យអ្វីឡើយ ថាអំពើភេរវកម្មអត្តឃាតទាំងអស់នេះ ពិតជាមានក្រុមរដ្ឋអ៊ីស្លាមជីហាត ជាអ្នកនៅពីក្រោយដែរ ដោយហេតុថានៅតំបន់នោះ គឺជាទីជម្រកលាក់ខ្លួនរបស់កងប្រដាប់អាវុធជីហាតដ៏សកម្មបំផុត។
ទន្ទឹមនឹងការវាយប្រហារខាងលើនេះ ក្រុមប្រដាប់អាវុធជីហាតនៃអង្គការរដ្ឋអ៊ីស្លាម បានបើកការវាយប្រហារមួយដែរ ប្រឆាំងទៅលើភូមិមួយដែលប្រជាជនរស់នៅភាគច្រើនជាអ្នកកាន់សាសនាអ៊ីស្លាមនិកាយស៊ីអ៊ីត ក៏ប៉ុន្តែ ត្រូវបានកងទ័ព លីបង់ វាយរុញច្រានបណ្តេញចេញវិញពីទីនោះ បន្ទាប់ពី បានវាយប្រយុទ្ធគ្នាយ៉ាងហិង្សារួចមក។
សូមបញ្ជាក់ថា សមរភូមិប្រយុទ្ធរវាងកងទ័ពលីបង់និងកងប្រដាប់អាវុធអ៊ីស្លាមជីហាត មានប្រវែងប្រមាណជា៥០គម នៅតាមតំបន់ព្រំដែនរវាងលីបង់និងស៊ីរី ដែល ក៏ជាទីកន្លែង ដាក់ ជំរំ ទទួលជនភៀសខ្លួនស៊ីរីយ៉ាងច្រើនកន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ