លីបង់ទាំងមូលកាន់ទុក្ខ ក្រោយភេរវកម្មដ៏សាហាវនៅក្រុងបៃរូត
ភេរវកម្មបំផ្ទុះគ្រាប់បែក ពីរផ្ទួនៗគ្នា បានកើតឡើងនៅភាគនិរតី ជាយក្រុងបៃរូត រដ្ឋធានីប្រទេសលីបង់ កាលពីល្ងាចម៉ោង៦ ថ្ងៃព្រហស្បតិ៍ទី ១២ វិច្ឆិកា ម្សិលមិញ។ មានមនុស្សយ៉ាងហោចណាស់ ៤៣ នាក់បានស្លាប់ភ្លាមៗ នៅនឹងកន្លែង ហើយជាង២០០នាក់ទៀត រងរបួសធ្ងន់។ ក្រុមជីហាដអង្គការរដ្ឋអ៊ីស្លាម បានចេញមុខ មកអះអាងថា នេះជាស្នាដៃរបស់ពួកគេ ដែលប៉ងប្រាថ្នា សងសិក ទៅលើក្រុមហេសបូឡា លីបង់ ដែលកំពុងតែប្រយុទ្ធយ៉ាងស្វិតស្វាញជួយខាងក្រុមកងទ័ពរដ្ឋាភិបាល បាស្ឆា អាល់អាសាដ។ លីបង់ កំពុងកាន់ទុក្ខទូទាំងប្រទេស ហើយថ្កោលទោសអំពើដ៏យង់ឃ្នង ដែលគេសង្ស័យថា ជាស្នាដៃរបស់ក្រុមជីហាដអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:៥១
ដូចជារៀងរាល់ថ្ងៃ ម៉ោង៦ល្ងាច ជាពេលដែលមានមនុស្សម្នា អ៊ូអរ កកកុញ នៅក្នុងក្រុងបៃរូត។ បុរសម្នាក់ បានជិះម៉ូតូ សំដៅចូលមកក្នុងផ្សារ នៅខាងមុខហាងលក់នំប៉័ងមួយ ក្នុងចំណោមកណ្តាលហ្វូងមនុស្ស ហើយបានទាញបំផ្ទុះគ្រាប់បែក ដែលចងជាប់នឹងចង្កេះខ្លួន។ គ្រាប់បែកបានបំផ្លាញ ស្ទើរតែខ្ទេចខ្ទីរទាំងស្រុង រថយន្ត អាគារ ជីវិតមនុស្ស នៅក្នុងបរិវេន២០ម៉ែត្រ ជុំវិញកន្លែងផ្ទុះ។
ក្នុងពេលដែលមនុស្សកំពុងតែផ្អើលឈូរឆ រត់ជាន់ជើងគ្នា ៥នាទីក្រោយមក គ្រាប់បែកមួយទៀត បានផ្ទុះឡើង នៅចំងាយប្រមាណជា ៤០ម៉ែត្រ ពីកន្លែងកើតហេតុទីមួយ។ សាកសព មនុស្ស បែកដាច់ខ្ទាត គួរឲ្យតក់ស្លុតជាទីបំផុត។ ហើយបើយោងតាម ប្រសាសន៍ លោករដ្ឋមន្ត្រីមហាផ្ទៃលីបង់ បានបញ្ជាក់ថា មានភេរវករទីបីម្នាក់ទៀត ដែលរំខ្លួន ជាមួយនឹងគ្រាប់បែក៥គីឡូក្រាម តែមិនបានធ្វើឲ្យផ្ទុះទេ ដោយសារតែជននោះបានស្លាប់ ក្នុងករណីបំផ្ទុះទីមួយ រឺក៏ទីពីរ។
បើទោះបីជាមិនទាន់មានការសន្និដ្ឋានជាផ្លូវការ ពីអាជ្ញាធរលីបង់ ក៏ដោយ គេកំពុងតែដាក់ការសន្និដ្ឋានថា ភេរវកម្មនេះ ជាស្នាដៃរបស់ក្រុមជីហាដអង្គការរដ្ឋអ៊ីស្លាម។ បើពិនិត្យទៅលើរបៀបនៃប្រតិបតិ្តការនេះ គឺវាស្រដៀងនឹងទម្លាប់ធ្វើភេរវកម្មរបស់ក្រុមនេះណាស់។ ហើយមួយវិញទៀត ក្រុមជីហាដអង្គការរដ្ឋអ៊ីស្លាមក៏បានចេញមុខ មកប្រកាសដែរថា ភេរវកម្មសម្លាប់ជីវិតជនស្លូតត្រង់លីបង់ គឺជាស្នាដៃរបស់ពួកគេ។
ជាការពិត បើយើងពិនិត្យមើលឲ្យបានច្បាស់ មានហេតុផលច្រើនណាស់ ដែលអាចបញ្ជាក់ថា វាជាភេរវកម្មបង្កឡើងដោយ ក្រុមជីហាដអង្គការរដ្ឋអ៊ីស្លាម ដែលមានមូលដ្ឋាននៅស៊ីរី។ មូលហេតុទីមួយ គឺដើម្បីបង្កការភ័យខ្លាច និងបរិយាកាស ឲ្យកាន់តែតានតឹង នៅមុនពេលមានការចរចាស្វែងរកសន្តិភាពនៅស៊ីរី ដែលនឹងប្រព្រឹតិ្តទៅ នៅទីក្រុងវីយែន នៅថ្ងៃស្អែកនេះ។ មូលហេតុទីពីរ គឺវាជាការសងសិកដោយផ្ទាល់ ទៅលើក្រុមហេសបូឡាលីបង់។ ក្រុមហេសបូឡាលីបង់ ជាក្រុមឧទ្ទាមអ៊ីស្លាមឈីអ៊ីត មួយយ៉ាងសំខាន់ មានគ្នារាប់ពាន់នាក់ ដែលកំពុងតែធ្វើការប្រយុទ្ធនៅស៊ីរី ដែលក្រុមនេះ មាននិន្នាការគាំទ្រ ខាងរដ្ឋាភិបាលរបស់បាស្ឆា អាល់អាសាដ។
សូមបញ្ជាក់ថា លីបង់ មានព្រំប្រទល់ជាប់នឹងស៊ីរី ហើយដែលសង្រ្គាមនៅស៊ីរី កំពុងតែចាប់ផ្តើមឆេះរាលដាលមកដល់លីបង់ផងដែរ។ ចាប់តាំងពីខែឧសភា ឆ្នាំ២០១៤ មកម្លេះ ដែលលីបង់ មិនអាចសម្រុះសម្រួលគ្នា តែងតាំងប្រមុខរដ្ឋាភិបាលបាន។ វិបត្តិនយោបាយផ្ទៃក្នុងលីបង់ គឺជាផលវិបាកដោយផ្ទាល់ ដែលបង្កឡើងដោយការប្រជែងគ្នា រវាងក្រុមអ៊ីស្លាមទាំងពីរនិកាយ ម្ខាងជាក្រុមស៊ុនីត ហើយម្ខាងទៀតជាក្រុមឈីអ៊ីត ហេសបូឡានេះឯង ដែលមានអ៊ីរ៉ង់ និងរដ្ឋាភិបាលស៊ីរី របស់បាស្ឆា អាល់អាសាដ ជាអ្នកនៅពីក្រោយ។
តាមការវិភាគ ភេរវកម្មដ៏សាហាវនេះ អាចនឹងជម្រុញឲ្យភាគីនយោបាយលីបង់ទាំងសងខាង ខិតចូលមកជិតគ្នា ចាប់ដៃគ្នា ក្នុងកាលៈទេសៈអាសន្នបែបនេះ ដើម្បីការពារប្រយោជន៍ជាតិតែមួយ។ ការចរចាស្វែងរកប្រមុខរដ្ឋាភិបាលដើម្បីដឹកនាំប្រទេស អាចនឹងបោះជំហានទៅមុខ លឿនជាងមុន។ ក៏ប៉ុន្តែផ្ទុយទៅវិញ ព្រឹត្តិការណ៍ភេរវកម្មនេះ អាចនឹងជះឥទ្ធិពលអាក្រក់ ទៅដល់សហគមជនភៀសខ្លួនស៊ីរី ដែលកំពុងតែស្នាក់នៅ នៅលើដីលីបង់។ សតិអារម្មណ៍ ស្អប់គំគួន ទៅលើប្រជាជនស៊ីរី ពីសំណាក់ប្រជាជនលីបង់ អាចនឹងកើនឡើង ដោយសារតែពួកគេយល់ថា គ្រប់យ៉ាងគឺបណ្តាលមកពីសង្រ្គាមនៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ