ខួប១០ឆ្នាំនៃការព្យួរកលោក Saddam Hussein អតីតមេដឹកនាំផ្តាច់ការអ៊ីរ៉ាក់
ថ្ងៃទី ៣០ ធ្នូ ជាថ្ងៃខួប១០ឆ្នាំដែលអតីតមេដឹកនាំអ៊ីរ៉ាក់ លោកសាដាម ហ៊ូសេន ត្រូវគេព្យួរក នៅក្រោយការចូលវាយឈ្លានពានរបស់កងទ័ពអាមេរិកនៅអ៊ីរ៉ាក់។ ១០ឆ្នាំក្រោយពីការប្រហារជីវិតអតីតមេដឹកនាំអ៊ីរ៉ាក់នេះមក ប្រទេសអ៊ីរ៉ាក់នៅតែញាំញីដោយការបែងចែកនយោបាយនិងនិកាយសាសនាដែលជម្រុញឲ្យអ៊ីរ៉ាក់ កាន់តែផុងជ្រៅទៅៗនៅក្នុងសង្គ្រាមរហូតមកទល់ពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ខណៈពេលដែលមេផ្តាច់ការអ៊ីរ៉ាក់ Saddam Hussein ត្រូវគេព្យួរកនៅក្រុងបាកដាតថ្ងៃទី៣០ធ្នូ២០០៦មក ទាំងប្រធានាធិបតីលោកGeorge W Bushនិងមតិសាធារណៈអាមេរិក បានដឹងខ្លួនរួចជាស្រេចទៅហើយថា “ការលុកលុយឈ្លានពានរបស់អាមេរិកនៅអ៊ីរ៉ាក់ ពុំបានផ្តល់លទ្ធផលដូចដែលខ្លួនប្រាថ្នានោះឡើយ ផ្ទុយទៅវិញ អំពើហិង្សានៅអ៊ីរ៉ាក់ កាន់តែធ្លាក់ចុះដុនដាបទៅៗ។ ចំណែក កងទ័ពអាមេរិកវិញ បានបាត់បង់ជីវិតអស់យ៉ាងសម្បើមប្រមាណជា៣០០០នាក់នៅក្នុងសង្គ្រាមនេះ។
១០ឆ្នាំក្រោយមក រដ្ឋបាលអាមេរិកដែលនឹកស្រម័យចង់ឃើញពន្លកលទ្ធិប្រជាធិបតេយ្យមួយលេចចេញជារូបរាងនៅអ៊ីរ៉ាក់នោះ នៅតែពុំទាន់បានសម្រេចជោគជ័យនៅឡើយទេនៅក្នុងការលុបបំបាត់អំពើហិង្សារវាងនិកាយសាសនាដែលកាន់តែរីករាលដាលនៅក្នុងប្រទេសអ៊ីរ៉ាក់។
ម្យ៉ាងទៀត ដោយសារតែកំហឹងរបស់សហគមន៍ភាគតិចនិកាយស៊ុននីតនៅក្នុងការប្រឆាំងទល់នឹងរដ្ឋាភិបាលដែលត្រួតត្រាដោយក្រុមនិកាយស៊ីអ៊ីតដែលមានភាគច្រើននៅក្នុងប្រទេស ជំរុញឲ្យកកើតមានឡើងក្រុមរដ្ឋអ៊ីស្លាមនិន្នាកាជ្រុលនិយមដែលក្នុងនោះ កម្លាំងមួយភាគគឺជាអតីតកងទ័ពរបស់លោកSaddam Hussein។
ដោយសារតែសង្គ្រាមយាយីរបស់រដ្ឋអ៊ីស្លាមជ្រុលនិយមនេះហើយ ដែលអាមេរិកនៅតែបន្តដាក់ពង្រាយកងទ័ពខ្លួនចំនួនជាង៥០០០នាក់នៅលើទឹកដី អ៊ីរ៉ាក់តទៅទៀត ដើម្បីជួយគាំទ្រដល់កងទ័ពអ៊ីរ៉ាក់ដែលនៅពុំទាន់មានសមត្ថភាពពេញលេញនៅក្នុងសង្គ្រាមប្រយុទ្ធប្រឆាំងទល់នឹងពួករដ្ឋអ៊ីស្លាមជីហាត។
នៅក្នុងសង្គមអាមេរិកវិញ ស្នាមរបួសដោយសង្គ្រាមនៅអ៊ីរ៉ាក់ នៅតែដិតដាមជាប់និងរស់រវើកជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ