តុលាការអ៊ីស្រាអែលសម្រេចឲ្យកូនទាហានម្នាក់ជាប់ពិរុទ្ធពីបទបាញ់សម្លាប់ជនប៉ាឡេស្ទីន
នៅអ៊ីស្រាអែលកាលពីថ្ងៃពុធម្សិលមិញ តុលាការយោធាមួយ បានសម្រេចឲ្យទាហានអ៊ីស្រាអែលម្នាក់ឈ្មោះ Elor Azaria អាយុ២០ឆ្នាំនិងដើមកំណើតបារាំង ជាប់ពិរុទ្ធពីបទបានបាញ់សម្លាប់ជនជាតិប៉ាឡេស្ទីនមួយរូបដែលរងគ្រោះនៅដេកស្តូកស្តឹងលើដីមិនទាន់ស្លាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
តុលាការយោធាអ៊ីស្រាអែលកាលពីម្សិលមិញ ទើបសម្រេចអោយពលបាលត្រី Elor Azaria ជាប់ពិរុទ្ធពីបទបាញ់សម្លាប់ជនជាតិប៉ាឡេស្ទីនម្នាក់។ ក៏ប៉ុន្តែតុលាការត្រូវរង់ចាំរយៈពេលជាច្រើនសប្តាហ៍ខាងមុខទៀតមុននឹងប្រកាសទោសរបស់ Elor Azaria ទោសដែលអាចនឹងត្រូវជាប់ក្នុងពន្ធនាគាររហូតដល់ទៅ២០ឆ្នាំ។
ទាហានអ៊ីស្រាអែលនេះ ត្រូវបានតុលាការយកមកជំនំជំរះតាំងពីខែឧសភាឆ្នាំ២០១៦ម្ល៉េះ ពីបទបានបាញ់សម្លាប់ជនប៉ាឡេស្ទីនម្នាក់ដែលរងគ្រោះដេកស្តូកស្តឹងនៅលើដីតែមិនទាន់ស្លាប់ បន្ទាប់ពីជននេះបានប្រើកាំបិតប្រឆាំងទៅលើក្រុមទាហានអ៊ីស្រាអែល។
ការជំនំជំរះទោសលើទាហានវ័យក្មេងនេះ ត្រូវបានរដ្ឋមន្ត្រីក្រសួងវប្បធម៌អ៊ីស្រាអែល ប្រតិកម្មថា ជាការកាត់ទោសមួយពុំគួរត្រូវធ្វើឡើងសោះ ពីព្រោះ Elor Azaria ជាកូនចៅអ៊ីស្រាអែល ហើយអ៊ីស្រាអែលគួរតែចាត់វិធានការដាក់វិន័យនៅក្នុងរង្វង់អង្គភាពរបស់ទាហានរូបនេះ។
សូមបញ្ជាក់ថា នៅពេលដែលតុលាការយោធា សម្រេចអោយកូនទាហាននេះជាប់ពិរុទ្ធ ក៏មានការប៉ះទង្គិចគ្នាមួយដែររវាងក្រុមយុវជនដែលគាំទ្រ Elor Azaria រាប់សិបនាក់តទល់និងកងកម្លាំងរក្សាសណ្តាប់ធ្នាប់ដែលបានការពារនៅទីកន្លែងតុលាការយោធា។
យោងតាមប៉ូលីសអ៊ីស្រាអែល ជនពីរនាក់ត្រូវបានប៉ូលីសចាប់ខ្លួន។ ចំណែកក្រុមអ្នកគាំទ្រទាហានអ៊ីស្រាអែល បាននាំគ្នាលើកប័ណ្ឌប្រកាសមួយដែលសរសេរជាពាក្យពេជន៍ថា “ប្រជាជនអ៊ីស្រាអែលមិនបោះបង់ចោលទាហានរបស់ខ្លួនឡើយ។ រីឯរដ្ឋមន្ត្រីការពារជាតិអ៊ីស្រាអែល លោក Avigdor Lieberman វិញនៅមុនពេលឡើងកាន់មុខតំណែង ធ្លាប់បានបញ្ជាក់ពីការគាំទ្ររបស់លោកចំពោះកូនទាហាននេះ ដោយលោកបានចូលអង្គុយតាមដានស្តាប់ការជំនំជម្រះតាំងតែពីលើកតំបូងម្ល៉េះ។ ប៉ុន្តែចាប់តាំងពីលោកបានឡើងកាន់មុខតំំណែងជារដ្ឋមន្ត្រីការពារជាតិមក លោកបានថ្លែងបញ្ចាក់ថាលោកពុំសប្បាយចិត្តទាល់តែសោះចំពោះការជំនំជំរះទោសនេះ។ លោក ថែមទាំងបានអំពាវនាវសុំឲ្យប្រជាជនអ៊ីស្រាអែលគោរព ចំពោះការសម្រេចនានារបស់តុលាការយោធានិងអំពាវនាវឲ្យប្រជាជនខ្លួនមានអំណត់អត់ធ្មត់ ដោយសុំឲ្យក្រុមអ្នកនយោបាយ បិទបញ្ចប់នូវការបង្ករករឿងជាមួយបណ្តាមន្ត្រីទទួលបន្ទុកក្រសួងសន្តិសុខ កងទ័ពនិងមេបញ្ជាការកងទ័ពរបស់ខ្លួន។
គួរបញ្ជាក់ថា អ៊ីស្រាអែល ជាញឹកញាប់តែងតែត្រូវទទួលរងការវាយប្រហារពីសំណាក់ក្រុមជនប៉ាឡេស្ទីន។ ហើយកងទ័ពអ៊ីស្រាអែលគឺជាស្ថាប័នគន្លិះមួយនៅក្នុងប្រទេស។ ក្នុងន័យនេះហើយ បានជាប្រជាជនអ៊ីស្រាអែលរាប់សិបពាន់នាក់ ពួតដៃគ្នាដើម្បីធ្វើការគាំទ្រចំពោះ ពលបាលត្រី Elor Azaria នៅឱកាសធ្វើបាតុកម្មនានានិងនៅតាមបណ្តាញសង្គមជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ