អ៊ីស្រាអែលសុខចិត្តដកទ្វារត្រួតពិនិត្យ ដើម្បីបន្ធូរភាពតានតឹង
រដ្ឋាភិបាលអ៊ីស្រាអែល នៅថ្ងៃអង្គារទី ២៥កក្កដា បានប្រកាសថា ដកចេញ ទ្វារត្រួតពិនិត្យសុវត្ថិភាព ដែលអ៊ីស្រាអែលបានដាក់ នៅច្រកចូល ទៅកាន់ទីលានសក្ការៈអ៊ីស្លាម នៅហ្សេរុយសាឡឹមខាងកើត។ អ៊ីស្រាអែលបានដកចេញទៅវិញ ទ្វារត្រួតពិនិត្យ ដែលជាប្រភពនៃភាពតានតឹង នៅប៉ុន្មានថ្ងៃនេះ នៅហ្សេរុយសាឡឹម ប៉ុន្តែ បានប្រកាសថា នឹងប្រើវិធានការតាមដានបែបសម្ងាត់វិញទៅ លើការចេញចូលទៅក្នុងវិហារសំខាន់ទី៣ របស់អ៊ីស្លាម នៅហ្សេរុយសាឡឹម។
ចុះផ្សាយនៅថ្ងៃ៖
រដ្ឋាភិបាលអ៊ីស្រាអែល នៅទីបំផុតទៅបានសម្រេចដកចោល ច្រកទ្វារត្រួតពិនិត្យសុវត្ថិភាព ដែលជាដើមចមនៃភាពតានតឹងការទូត និងការប្រឈមមុខដ៏ហិង្សា នៅប៉ុន្មានថ្ងៃនេះ នៅហ្សេរុយសាឡឹម។ នៅក្នុងសេចក្តីថ្លែងការណ៍ នៅថ្ងៃអង្គារនេះ រដ្ឋាភិបាលអ៊ីស្រាអែលបានបញ្ជាក់ថា ច្រកទ្វារត្រួតពិនិត្យ ទៅកាន់ទីលានសក្ការៈអ៊ីស្លាមនឹងត្រូវដកចោល ប៉ុន្តែ ត្រូវជំនួសដាក់វិញ ដោយវិធានការតាមដានសន្តិសុខ ដែលប្រើបច្ចេកវិទ្យាជាន់ខ្ពស់ និងដែលប្រើគ្រប់មធ្យោបាយដែលរដ្ឋាភិបាលមាន។ តាមការសង្កេតរបស់អ្នកកាសែតរបស់ទីភ្នាក់ងារព័ត៌មានអង់គ្លេស Reuters ទាហានអ៊ីស្រាអែលបានដកចេញ ច្រកទ្វារត្រួតពិនិត្យសុវត្ថិភាព ប៉ុន្តែ ជាមួយគ្នានោះ គេឃើញផងដែរ ការដំឡើងជើងកាមេរ៉ា ត្រួតពិនិត្យនៅតាមផ្លូវចូលទៅកាន់ទីក្រុងចំណាស់។
រដ្ឋាភិបាលអ៊ីស្រាអែលបានចំណាយថវិកា ២៤លានអឺរ៉ូដើម្បី ទិញ និងដំឡើងច្រកទ្វារ ត្រួតពិនិត្យស្វែងរកជាតិលោហៈ នៅលើផ្លូវទៅកាន់ទីលានសក្ការៈអ៊ីស្លាម នៅហ្សេរុយសាឡឹម នៅក្រោយ ហេតុការណ៍ ដែលជនជាតិអ៊ីស្រាអែល កាន់សាសនាអ៊ីស្លាម ចាក់សម្លាក់ទាហានអ៊ីស្រាអែល ២នាក់ កាលពីថ្ងៃទី ១៤កក្កដាកន្លងទៅ។
ប្រជាជនប៉ាឡេស្ទីនដែលចាត់ទុកការដំឡើងច្រកទ្វារត្រួតពិនិត្យ របស់អ៊ីស្រាអែល ជាផ្នែកមួយ នៃមហិច្ឆតាអ៊ីស្រាអែល ក្នុងគោលដៅ សំដៅដណ្តើម កាន់កាប់ផ្តាច់មុខ ទឹកដីហ្សេរុយសាឡឹម បាននាំគ្នាធ្វើបាតុកម្ម ប្រឆាំងអ៊ីស្រាអែល។ ការប្រឈមមុខដ៏ហិង្សាបានសម្លាប់ជនជាតិអ៊ីស្រាអែលបីនាក់ និងយុវជនប៉ាឡេស្ទីន៥នាក់។
នៅប៉ុន្មានម៉ោងក្រោយការប្រកាសរបស់រដ្ឋាភិបាលអ៊ីស្រាអែល មន្រ្តីជាន់ខ្ពស់របស់សមាគមអ៊ីស្លាមដែលគ្រប់គ្រងទ្រព្យសម្បត្តិ និងវិហារអ៊ីស្លាម នៅហ្សេរុយសាឡឹមខាងកើត បានអំពាវនាវឲ្យប្រជាជនកាន់សាសនាអ៊ីស្លាមនៅបន្តធ្វើពហិការ មិនចូលទៅក្នុងទីលានសក្ការៈអ៊ីស្លាម ក្នុងអំឡុងពេលដែលសមាគមកំពុងវាយតម្លៃទៅលើស្ថានភាព នៅក្នុងតំបន់នោះ។ ប៉ុន្មានថ្ងៃមកនេះ ប្រជាជនប៉ាឡេស្ទីន បាននាំគ្នាធ្វើពហិការ មិនចូលទៅក្នុងវិហារសក្ការៈអ៊ីស្លាម និងបាននាំគ្នាសូត្រធម៌នៅតាមផ្លូវ ដើម្បីប្រឆាំងនឹងអ៊ីស្រាអែល ដែលបានដំឡើងច្រកទ្វារត្រួតពិនិត្យ នៅទីលានសក្ការៈ នៅហ្សេរុយសាឡឹម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ